Kampanija DTEK (Ukraina) i kancern «Biełenerha» viaduć pieramovy ab adnaŭleńni pastavak u Biełaruś ukrainskaj elektraenierhii, a taksama ab pryciahnieńni biełaruskich enierhietykaŭ da prahramy pa rekanstrukcyi i ramontu błokaŭ TES.
Jak paviedamiŭ pradstaŭnik DTEK, hetyja pytańni abmiarkoŭvalisia na sustrečy ŭ Kijevie 3 śniežnia. Čarhovy etap pieramoŭ adbudziecca na hetym tydni.
DTEK pastaŭlała elektraenierhiju ŭ Biełaruś z 2010 hoda — tady dola Biełarusi ŭ ahulnym ab`iomie ekspartu elektraenierhii z Ukrainy dasiahała 70%. U 2014 hodzie ŭ suviazi z deficytam mahutnaści ŭ enierhasistemie Ukrainy pastaŭki ŭ Biełaruś skaracilisia, a ŭ 2015 hodzie ekspart nie ažyćciaŭlaŭsia zusim.
Tym časam, pavodle słoŭ dyrektara pa kamiercyjnaj dziejnaści DTEK Vitala Butenki, situacyja na ŭkrainskim enierharynku stabilizavałasia. Dziakujučy adnaŭleńniu čyhunačnaj infrastruktury, razburanaj u vyniku bajavych dziejańniaŭ, byŭ naładžany vyvaz vuhalu antracytavaj hrupy z Danbasa na TES Ukrainy. Na składach usich ukrainskich TES nazapašana 2,1 młn. ton vuhalu, što na 55% bolš za pakazčyk minułaha hoda. U listapadzie ŭ dastupnym reziervie znachodzilisia 11 enierhabłokaŭ sumarnaj mahutnaściu 2,3 tys. MVt. Akramia taho, zavieršanyja raboty pa mantažy pierachodu VŁ 750 kv Ryŭnienskaja AES — PS «Kijeŭskaja», dziakujučy čamu enierhasistema Ukraina dadatkova atrymaje jašče 1 MVt mahutnaści.
Ukrainski bok zacikaŭleny ŭ adnaŭleńni pastavak elektraenierhii ŭ Biełaruś, padkreśliŭ Butenka. 15 śniežnia ŭ Kijevie adbyŭsia aŭkcyjon pa dostupie da miždziaržaŭnych linij elektrapieradačy dla ekspartu ŭkrainskaj elektraenierhii ŭ 2016 hodzie. Pavodle vynikaŭ tarhoŭ DTEK nabyła 86% ad vystaŭlenaha siačeńnia. Kampanija, u pryvatnaści, nabyła łoty ŭ napramku Biełarusi mahutnaściu da 687 MVt.
Pavodle słoŭ Butenki, «Biełaruś była i zastajecca stratehičnym partnioram Ukrainy ŭ enierhietyčnym siektary». «Zaraz ciažkaja ekanamičnaja situacyja va ŭsich. Treba pracavać razam i stvarać mahčymaści adzin dla adnaho ŭ hety składany čas, — adznačyŭ kamiercyjny dyrektar kampanii. — Z adnaho boku, impart ukrainskaj elektraenierhii dazvalaje dyviersifikavać ryzyki i zabiaśpiečyć nadziejnaść pracy enierhietyčnych sistem abiedźviuch krain. Ź inšaha boku, my dobra znajomyja z vysokim techničnym uzroŭniem padrychtoŭki biełaruskich enierhietykaŭ. I heta daje mahčymaści dla pašyreńnia efiektyŭnaha supracoŭnictva i pryciahnieńnia biełaruskich enierhietykaŭ da ŭdziełu ŭ tendarach dla praviadzieńnia ramontaŭ i rekanstrukcyj na našych TES i sietkach».
Pieramovy ab pastaŭkach elektraenierhii va ŭkrainskaj kampanii raźličvajuć zaviaršyć da kanca śniežnia.
Kamientary