Ci praŭda, što mužčyny chočuć seksu bolš, čym žančyny? Daśledavali navukoŭcy

Adnym z najbolš viadomych daśledavańniaŭ pra adroźnieńni ŭ seksualnym žadańni pamiž mužčynami i žančynami stała praca navukoŭcaŭ z Univiersiteta štata Ahaja.

Jany vyvučyli, jak časta pra seks dumajuć 283 studenty i studentki ŭ vieku ad 18 da 25 hadoŭ. Akazałasia, što miedyjana dla mužčyn skłała kala 19 dumak za dzień, a dla žančyn — kala 10. Heta prykmietnaja roźnica, ale jana vielmi dalokaja ad papularnaha śćviardžeńnia, nibyta mužčyny dumajuć pra seks kožnyja siem siekund.

Pry hetym indyvidualnyja adroźnieńni akazalisia vielmi vialikimi. Niekatoryja mužčyny paviedamlali tolki pra adnu dumku pra seks za dzień, a adzin z udzielnikaŭ — pra 388. U žančyn pakazčyki vahalisia ad adnoj da 140 dumak. Bolš za toje, raźmierkavańnie značna pierakryvałasia: mnohija žančyny dumali pra seks čaściej, čym mnohija mužčyny. Inšymi słovami, choć siarednija pakazčyki i adroźnivajucca, indyvidualnyja adroźnieńni pamiž ludźmi značna bolšyja, čym siaredniaja roźnica pamiž pałami.

Čamu ž uźnikaje roźnica pamiž pałami? Navukoŭcy vyłučajuć dźvie vialikija hrupy faktaraŭ — bijałahičnyja i sacyjalnyja.

Bijałohija: mozh, harmony i zadavalnieńnie

Častka adroźnieńniaŭ źviazanaja z asablivaściami budovy mozhu. Važnuju rolu ŭ farmiravańni seksualnaha žadańnia adyhryvaje miedyjalnaja preaptyčnaja vobłaść, jakaja ŭ mužčyn u siarednim bolšaja. Daśledavańni na žyviołach pakazvajuć, što jaje paškodžańnie prykmietna źnižaje seksualnuju aktyŭnaść. Ličycca, što hetyja asablivaści zakładvajucca jašče padčas raźvićcia arhanizma pad upłyvam harmonaŭ.

Nie mienš važnuju rolu adyhryvaje testasteron — hałoŭny harmon, jaki adkazvaje za spantannaje seksualnaje žadańnie jak u mužčyn, tak i ŭ žančyn. Mužčyny vypracoŭvajuć jaho prykładna ŭ 10—20 razoŭ bolš, tamu ŭ siarednim čaściej adčuvajuć seksualnuju ciahu bieź źniešnich stymułaŭ.

U mužčyn uzrovień testasteronu adnosna stabilny z dnia ŭ dzień (choć pastupova źnižajecca z uzrostam), tamu i bazavy ŭzrovień seksualnaha žadańnia zvyčajna zastajecca adnosna pastajannym.

U žančyn situacyja inšaja. Ich seksualnaje žadańnie źmianiajecca razam ź miesiačnym harmanalnym cykłam. Padčas avulacyi mnohija adznačajuć pavyšeńnie libida, paśla jaje cikavaść da seksu moža źnižacca, a z nadychodam mienapaŭzy mnohija žančyny paviedamlajuć pra istotnaje asłableńnie spantannaha seksualnaha žadańnia.

Jašče adzin važny faktar — jakaść seksualnaha dośviedu. Pavodle daśledavańniaŭ, kala 20% žančyn nie dasiahajuć arhazmu rehularna padčas seksu z partnioram, tady jak siarod mužčyn hety pakazčyk składaje kala 1,2%. Kali seks nie zaŭsiody prynosić čakanaje zadavalnieńnie, cikavaść da jaho moža naturalnym čynam źnižacca.

Pavialičyć

Kultura: stereatypy i adnosiny

Adnak tolki bijałohijaj hetyja adroźnieńni nie tłumačacca. Na praciahu doŭhaha času hramadstva bolš talerantna staviłasia da mužčynskaj seksualnaj aktyŭnaści, čym da žanočaj. Tamu žančyny mohuć mienš adkryta havaryć pra svajo seksualnaje žadańnie abo navat nieśviadoma zanižać jaho, adkazvajučy na pytańni daśledčykaŭ. Heta aznačaje, što častka vyjaŭlenaj roźnicy moža być źviazanaja nie tolki ź bijałohijaj, ale i z sacyjalnymi normami.

Nie mienš važny i kantekst adnosin. Daśledavańnie z udziełam bolš jak 11 tysiač čałaviek pakazała, što 34% žančyn za apošni hod hublali cikavaść da seksu jak minimum na try miesiacy, tady jak siarod mužčyn hety pakazčyk skłaŭ 15%. Asabliva časta žančyny paviedamlali pra źnižeńnie libida paśla praciahłaha sumiesnaha žyćcia.

Navukoŭcy miarkujuć, što svaju rolu mohuć adyhryvać pryvykańnie, bytavaja rucina i razmyvańnie rolaŭ (kali partnior adnačasova stanovicca surazmoŭcam, baćkam dziaciej, susiedam pa domie i naparnikam pa haspadarcy). Heta moža macniej pryhniatać žanočaje seksualnaje žadańnie, čym mužčynskaje.

Inšymi słovami, reč nie ŭ tym, što žančyny ad pryrody chočuć mienš seksu. Chutčej za ŭsio, mienavita kantekst doŭhaha sumiesnaha žyćcia macniej asłablaje ich libida.

Pavialičyć

Pohlad praz pryzmu evalucyi

Z punktu hledžańnia evalucyjnaj bijałohii siaredniaja roźnica ŭ seksualnym žadańni pamiž mužčynami i žančynami maje svajo tłumačeńnie.

Adna z najbolš viadomych kancepcyj — teoryja baćkoŭskich układańniaŭ, jakuju ŭ 1972 hodzie prapanavaŭ bijołah Robiert Tryviers.

Jana śćviardžaje, što poł, jaki niasie bolšyja bijałahičnyja vydatki na źjaŭleńnie i vychavańnie patomstva — ciažarnaść, hrudnoje vykormlivańnie i praciahły dohlad dziaciej, — budzie bolš aściarožna vybirać, kali i z kim ustupać u pałavyja adnosiny. Dla połu, čyje bijałahičnyja vydatki značna mienšyja, evalucyjna bolš vyhadnaj moža być stratehija čaściejšaha pošuku seksualnych partnioraŭ.

Hetaja teoryja vykarystoŭvajecca dla tłumačeńnia nie tolki adroźnieńniaŭ u častacie seksualnaha žadańnia, ale i asablivaściaŭ seksualnaj reŭnaści, vybaru partnioraŭ, staŭleńnia da vypadkovych seksualnych suviaziaŭ i navat spažyvańnia parnahrafičnaha kantentu.

Pry hetym jana nie śćviardžaje, što pavodziny čałavieka žorstka zadadzienyja evalucyjaj abo što ludzi nie mohuć dziejničać inakš. Chutčej heta adna z navukovych madelaŭ, jakaja dapamahaje zrazumieć, čamu ŭ roznych kulturach i na praciahu historyi mužčyny ŭ siarednim čaściej i bolš nastojliva šukajuć seksualnych kantaktaŭ, čym žančyny.

Što nasamreč aznačaje adroźnieńnie

U siarednim mužčyny sapraŭdy čaściej adčuvajuć spantannaje seksualnaje žadańnie, čym žančyny. Adnak na libida ŭpłyvaje nie adzin, a kompleks faktaraŭ: asablivaści budovy mozhu, uzrovień testasteronu, harmanalnyja vahańni, jakaść seksualnaha dośviedu, hramadskija stereatypy i kantekst adnosin. Pry hetym nivodzin ź ich nie vyznačaje pavodziny čałavieka sam pa sabie.

Tamu žančyna moža mieć značna bolš vysokaje libida, čym bolšaść mužčyn, a mužčyna moža amal nie cikavicca seksam praź nizki ŭzrovień testasteronu, depresiju abo prablemy ŭ adnosinach.

Hałoŭnaja vysnova navukoŭcaŭ u tym, što adroźnieńni ŭ seksualnym žadańni pamiž ludźmi — heta narmalnaja i čakanaja źjava. Jany adlustroŭvajuć składanaje ŭzajemadziejańnie bijałohii, žyćciovaha dośviedu i žyćciovych abstavin, jakoje moža istotna źmianiacca na roznych etapach žyćcia.

• 1
• 0
• 0
• 1
• 0
• 0
• 0
• 0