Sud Maskoŭskaha rajona Minska pakaraŭ hramadskaha aktyvista štrafam u pamiery 25 bazavych vieličyniaŭ (4,5 miljony rubloŭ) za ŭdzieł u «Maršy studentaŭ» — vuličnaj akcyi pratestu studenckaj moładzi suprać apłaty pierazdačy zalikaŭ i ispytaŭ, jakaja adbyłasia ŭ Miensku 2 śniežnia.
Sudździa Taćciana Matyl pryznała jaho vinavatym u parušeńni č.1 artykuła 23.34 KaAP ab udziele ŭ niesankcyjanavanym masavym mierapryjemstvie. Pavał Siarhiej svajoj viny nie pryznaŭ i namierany abskardžvać hetaje rašeńnie ŭ sudzie vyšejšaj instancyi. Jon taksama adznačyŭ, što nie maje namieru admaŭlacca ad dalejšaj hramadskaj dziejnaści.
Raniej Pavał Siarhiej byŭ aktyvistam «Maładoha frontu», udzielničaŭ u roznych palityčnych akcyjach, nieadnarazova jaho pryciahvali da adkaznaści. Padčas masavych palityčnych vajskovych pryzyvaŭ, byŭ zabrany ŭ vojska, adsłužyŭ paŭtara hoda, nie prymajučy vajskovuju prysiahu.
Padtrymać Paŭła Siarhieja ŭ sudovym pracesie pryjšoŭ adzin z vykładčykaŭ BDU, jaki pažadaŭ nie nazyvać svajho imia.
Jon paviedamiŭ, što pracuje ŭ VNU tolki da novaha hodu, bo paśla vykazvańniaŭ u padtrymku studentaŭ, administracyja BDU nie pradoŭžyła ź im kantrakt. Pavodle vykładčyka, rektar VNU parušyŭ Kanstytucyju ŭ častcy atrymańnia biaspłatnaj adukacyi, padpisvajučy rasparadžeńnie ab płatnaj pierazdačy ispytaŭ. Hetym rasparadžeńniem jon taksama stvaryŭ umovy dla karupcyi ŭ asiarodku vykładčykaŭ. Jon taksama pierakanany, što rektar BDU nie adpaviadaje zajmanaj pasadzie, kali admoviŭsia sustrecca sa studentami, jakija źviarnulisia da jaho, sabraŭšy podpisy. Taksama vykładčyk rasčaravany biaździejnaściu baćkoŭ studentaŭ, jakija buduć vymušanyja kampensavać dadatkovyja vydatki za vučobu svaich dziaciej. Jon taksama miarkuje, što vinavatymi ŭ składzienaj sytuacyi źjaŭlajucca nie studenty, a kiraŭnictva BDU.
Za «Marš studentaŭ» 2 śniežnia byli taksama składzienyja administracyjnyja pratakoły na inšych udzielnikaŭ: Jaŭhiena Amialkova, Hleba Vajkula. Niekatorych studentaŭ, u tym liku i Hleba Vajkula, vyklikali na nastupny dzień na kamisiju ŭ dekanaty BDU.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»1
Kamientary