Urad źniziŭ kolkaść nasielenych punktaŭ, jakija adnosiacca da radyjeaktyŭnaj zony

U Biełarusi źnižanaja kolkaść nasielenych punktaŭ, jakija adnosiacca da zony radyjeaktyŭnaha zabrudžvańnia. Adpaviednaja pastanova Savieta ministraŭ № 9 padpisanaja 11 studzienia 2016 hoda, paviedamlaje pres-słužba ŭrada.

Zhodna z novym pieralikam da zon radyjeaktyŭnaha zabrudžvańnia adnosiacca 2.193 nasielenyja punkty i 52 abjekty. U paraŭnańni ź pieralikam, zaćvierdžanym pastanovaj Savieta ministraŭ ad 1 lutaha 2010 hoda № 132, kolkaść nasielenych punktaŭ, jakija znachodziacca ŭ zonach radyjeaktyŭnaha zabrudžvańnia, źmianšajecca na 203, kolkaść abjektaŭ — na 20. U nasielenych punktach, jakija vyviedzienyja z zon radyjeaktyŭnaha zabrudžvańnia, pražyvaje 30.912 čałaviek.

«Pry padrychtoŭcy pieraliku vykarystanyja źviestki ab ščylnaści zabrudžvańnia hlebaŭ cezijem-137, stroncyjem-90, płutonijem-238, 239, 240 pavodle stanu na 1 studzienia 2015 hoda, a taksama źviestki «Katałoha siarednich hadavych efiektyŭnych doz apramieńvańnia žycharoŭ nasielenych punktaŭ Respubliki Biełaruś», — havorycca ŭ kamientaryi da pastanovy.

Akramia taho, 133 nasielenych punkty pieraviedzienyja ŭ mienš žorstkija zony radyjeaktyŭnaha zabrudžvańnia ŭ suviazi sa źmianšeńniem ščylnaści zabrudžvańnia hlebaŭ radyjenuklidami, źnižeńniem siarednich hadavych efiektyŭnych doz apramieńvańnia nasielnictva, paviedamlaje pres-słužba.

U paraŭnańni z papiarednim pieralikam kolkaść nasielenych punktaŭ u zonie pražyvańnia ź pieryjadyčnym radyjacyjnym kantrolem źmienšyłasia z 1.900 da 1.827, u zonie z pravam na adsialeńnie — z 478 da 353, u zonie nastupnaha adsialeńnia — z 18 da 13.

Jak praduhledžana novaj pastanovaj, u suviazi sa źmianšeńniem ščylnaści zabrudžvańnia i źnižeńniem dozy apramianieńnia nasielnictva 128 nasielenych punktaŭ, jakija znachodziacca ciapier u zonie z pravam na adsialeńnie, piarojduć u zonu pražyvańnia ź pieryjadyčnym radyjacyjnym kantrolem. Z zony nastupnaha adsialeńnia ŭ zonu z pravam na adsialeńnie piarojduć piać nasielenych punktaŭ.

Kolkaść hramadzian, jakija pražyvajuć u zonach radyjeaktyŭnaha zabrudžvańnia i na jakich raspaŭsiudžvajucca normy zakona ad 6 studzienia 2009 hoda «Ab sacyjalnaj abaronie hramadzian, paciarpiełych ad katastrofy na Čarnobylskaj AES, inšych radyjacyjnych avaryj», źmienšycca na 2,7%.

Pastanova nabyvaje moc z dnia jaje aficyjnaha apublikavańnia.

• 0
• 0
• 0
• 0
• 0
• 0