Tryler, drama, kamiedyja, viestern — «Ahidnaja vaśmiorka» Tarancina
Žanr: tryler, drama, kamiedyja, viestern
Režysior: Kviencin Tarancina
U rolach: Kurt Raseł, Semiueł Ł. Džeksan, Cim Rot, Majkł Medsan, Dženifier Džejsan Li, Uołtan Hohins, Demijan Bišyr, Brus Dern.
Adznaka: 7.
ZŠA paśla hramadzianskaj vajny. Lehiendarny palaŭničy za hałovami Džon Rut, pa mianušcy Viešalnik, kanvairuje złačyncu Dejzi Domierh praz zaśniežanyja prastory Vajominha ŭ Red-Rok, kab addać jaje ŭ ruki pravasudździa i atrymać uznaharodu.
Pa darozie da ich prybivajucca jašče adzin palaŭničy i šeryf Red- Roka. Zavirucha zmušaje ich šukać prytułku ŭ karčmie, dzie ŭžo raźmiaściłasia vielmi niaprostaja kampanija: hienierał, mieksikaniec, francuz i kaŭboj… I niechta ź ich — nie toj, za kaho siabie vydaje.
Dziejańnie adbyvajecca padčas strašnaha śniežnaha buranu. Całkam mahčyma, što Tarancina mieŭ na ŭvazie Vialikuju zaviruchu 1888, adnu z samych mocnych zaviej u historyi krainy.
Pa słovach Kviencina Tarancina, ideja filma naviejanaja viesternami 1960-ch. «Mnie padabajecca ŭ viesternach toje, što možna pahladzieć pałovu filma, pakul zrazumieješ, dobry heta piersanaž abo drenny. A voś kali takich chłopcaŭ zamknuć niedzie, dy kab zvonku bušavała zavirucha, i dać im zbroju, to budzie cikava pahladzieć, što z hetaha vyjdzie», — raskazaŭ viadomy režysior.
U stužcy nadzvyčajnaja kolkaść kryvavych scen, razbaŭlenych doŭhimi razmovami piersanažaŭ. Tut film mała čym roźnicca ad papiarednich tvoraŭ režysiora. Zdymki adbyvalisia ŭ štacie Kałarada, na ranča Šmid na płaskahorji kala Tełuryda i na 900 akrach prylehłaj ziamli. Na zdymačnaj placoŭcy admysłova padtrymlivałasia nulavaja tempieratura.
Heta vośmy film Tarancina, i šosty raz jon pracuje razam z Semiuełam Ł. Džeksanam.
«Vaśmiorka» zaśviaciłasia na ŭsich bujnych kinafiestyvalach. Jana atrymała «Załaty hłobus»— 2016 za najlepšy saŭndtrek, jaki stvaryŭ dla filma Enia Marykone.
Na «Oskary»-2016 film pradstaŭleny taksama ŭ naminacyjach «Najlepšaja žanočaja rola druhoha płana» (Dženifier Džejsan Li)» i «Najlepšy scenar».
Kamientary