Sud staŭ na bok telezorki Lucyi Łuščyk u spravie ab abaronie honaru i hodnaści
U sieradu, 3 lutaha, sud Centralnaha rajona Minska admoviŭ Iłonie Hieraščanka ŭ pazovie ab abaronie honaru i hodnaści da telezorki, viadomaj pad psieŭdanimam «Lucyja Łuščyk» (u cyvilnym žyćci Lucyja Hieraščanka).
Koratka nahadajem, z čaho ŭtvaryŭsia kanflikt. Telezorka pabrałasia šlubam z upłyvovym biznesmienam Andrejem Hieraščankam i razam z mužam vychoŭvaje jaho małuju dačku. Rodnaja maci dziaŭčynki, Iłona Hieraščanka, śćviardžaje, što ŭžo bolš za hod nie moža ź joj bačycca: nie dazvalaje były muž. U suviazi z hetym iduć sudovyja raźbiralnictvy.
Dva miesiacy tamu biełaruski internet uskałychnuŭ videazapis, na jakim žančyna, padobnaja da telezorki, u prysutnaści dziaŭčynki abvinavačvaje Iłonu Hieraščanka, što taja «bavić čas z paluboŭnikam», źjaŭlajecca «śpiecyjalistam pa žanatych mužčynach». U suviazi z hetymi abrazami Iłona źviarnułasia ŭ sud.
«Prašu ŭvahi presy, — pramaŭlaje sudździa padčas vyniasieńnia rašeńnia. — Videazdymki, jakija byli pradstaŭlenyja, nie śviedčać pra toje, što jany vialisia adkryta, dapuščalna i na zakonnych padstavach. Sud nie znajšoŭ pravavych padstavaŭ pryniać videa jak dokaz».
U siaredzinie lutaha adnovicca praces, ciaham jakoha sud pavinien vyznačyć paradak adnosinaŭ maleńkaj dački z baćkami. Naŭprost prosim Andreja Hieraščanku prakamientavać infarmacyju pra toje, ci sapraŭdy jon bolš za hod nie dazvalaje dačce bačycca ź jaje rodnaj maci. U takich pytańniach Andrej Alaksandravič bačyć sprobu ŭleźci ŭ jaho pryvatnaje žyćcio. Spasyłajecca na «Kodeks ab šlubie i siamji» i adznačaje, što ŭ sprečkach pamiž byłoj žonkaj i im raźbiarecca sud.
«Na dadzieny momant nivodnym kampietentnym orhanam nie ŭstanoŭleny fakt najaŭnaści niejkich pieraškodaŭ u Iłony Hienadźjeŭny ŭ znosinach z dačkoj. Aproč jaje biaskoncych pastoŭ u internecie, heta nie paćviardžajecca ničym», — vykazvajecca Jaŭhienija Patapava, advakat Andreja Hieraščanki.
Ale kali b žurnalisty atrymali dokazy, što rodnaja maci maje mahčymaść bačycca z dačkoj, adpali b usie pytańni.
Jaŭhienija Patapava: «Źjeździcie ŭ škołu, tam ža nie visić ambarny zamok. Zrazumieła, tudy puściać mamu».
Da dyjałohu dałučajecca Andrej Hieraščanka:
«Prablema ŭ tym, što Iłona Hienadźjeŭna vielmi šmat chłusić. I nichto joj ni ŭ čym nie pieraškadžaje, i ŭ sud jana sama padała».
Andrej Hieraščanka apošnim časam niamała vykazvaŭsia žurnalistam pra svaju byłuju žonku.
Kali koratka, jon bačyć situacyju tak, što ŭ 2014 hodzie Iłona Hieraščanka vyviezła dačku ŭ Maskvu i nie žadała ź im damaŭlacca. Hety i mnohija inšyja arhumienty zmusili jaho ŭziać situacyju pad kantrol i zabrać dačku da siabie.
Iłona Hieraščanka pakazvaje dakumienty i fota, jakija, pa jaje słovach, dakazvajuć, što ŭ Maskvu jana i dačka źjechali nie ŭ 2014-m, a na niekalki hadoŭ raniej. I tady ŭsie pahadnieńni nakont vychavańnia dziaŭčynki paśpiachova dziejničali na dva harady.
«Sam Andrej pryjazdžaŭ i ŭ Maskvie dzicia zabiraŭ. Roŭna jak i moj baćka zabiraŭ dzicia ŭ Minsku i advoziŭ u Maskvu», — raspaviadaje Iłona Hieraščanka.
Jana davodzić, što sa śniežnia 2014 hoda nie moža bačycca z dačkoj, niahledziačy na zvaroty ŭ kampietentnyja orhany. Za hety čas staŭleńnie maleńkaj dziaŭčynki da jaje vielmi źmianiłasia.
«Dajšło da taho, što ŭ apošni raz dačka vyjšli z mašyny, pabačyła mianie i svaju babulu i pry hetym skazała: «Adstańcie, nie čapajcie mianie». Raniej ja čuła ad jaje i takoje: «Tata dobry, ty drennaja. Mnie tata pra ciabie ŭsio raskazaŭ, ty mianie kinuła». Usio z-za taho, što ja nie mahu pravodzić ź joj čas, a jany znachodziacca ź joj 24 hadziny na sutki i takim voś čynam na dačku ŭpłyvajuć», — ličyć Iłona Hieraščanka.
Čaho vy chacieli b dabicca pa vynikach suda?
Iłona Hieraščanka: Abodva baćki abaviazanyja vychoŭvać svajo dzicia. Ja nie kažu pra toje, što vielmi hetaha chaču. Ale były muž na pieramovy nie idzie. Navat pry vas ja zadaju jamu pytańnie, kali zmahu pabačycca z dačkoj, a jon sychodzić ubok.
Heta supraćstajańnie pamiž byłymi mužam i žonkaj padniało vostraje pytańnie: ci zdolnaja biełaruskaja pravaachoŭnaja sistema zabiaśpiečyć kožnamu z baćkoŭ roŭnyja pravy. Chaciełasia b, kab psichiku dziciaci nie złamali, a dziaržava dapamahła bakam damovicca, razabraŭšysia ŭ situacyi.
Ciapier čytajuć
«Pra jaki sajuz možna havaryć?» Łukašenka ŭ Astanie raskrytykavaŭ Rasiju za naviazvańnie utylzboraŭ21
Kamientary