«Sup, kali jość, i kaša z katletaj». Jak trenieru vyžyć na 2 miljony — adkaz vice-premjeru Kačanavaj

Vice-premjer krainy Natalla Kačanava — najbolš abmiarkoŭvajemy čynoŭnik apošnich dzion. Jaje vystup na kalehii Minsportu vyjšaŭ rezanansnym.

— Voś prychodzić małady trenier na zarpłatu 1,3 miljona. Nu što rabić, taki zarobak! Naohuł čałaviek, jaki skončyŭ škołu, vyrazna pavinien pradstaŭlać, jaki zarobak jaho čakaje na miescy treniera nizavoha źviana. Raźličvać na toje, što tam jaho dahoniać vielizarnyja finansavyja bonusy, naŭrad ci varta, - kazała žančyna, paprasiŭšy ŭ dadatak pačatkoŭcaŭ trenieraŭ adekvatna ŭsprymać hetyja hrošy. Paźniej Kačanava adznačyła, što 2,3 miljona rubloŭ - minimalnaja zarpłata, nižej jakoj atrymlivać u Biełarusi nie mohuć.

Pavialičyć

Andreju Kachniuku 22 hady. Jon zavočna navučajecca na čaćviortym kursie BDUFK i pracuje dziciačym trenieram pa lohkaj atletycy ŭ BFST «Dynama».

— Na słovy Kačanavaj ab zarpłacie ŭ 1,3 miljona rubloŭ nijak nie adreahavaŭ, bo ničoha novaha dla siabie nie pačuŭ. Prykładna stolki atrymlivaŭ raniej i atrymlivaju ciapier.

Zrazumieła, što pražyć na takuju sumu niemahčyma. Heta navat mienš, čym pražytačny minimum (1 591 310 rubloŭ)!

U svoj čas Andrej zajmaŭsia lohkaj atletykaj, chacieŭ stać sprynteram. Ale z-za traŭmaŭ pryjšłosia skončyć.

— Dźvie hryžy i ŭsio. Žadańnie treniravacca było, ale fizična nie moh. Vyrašyŭ vučyć inšych — trenieram u «Dynama» pracuju paŭtara hoda. Śpiarša atrymlivaŭ paŭtara miljona, potym 1,7.

I tolki za studzień upieršyniu vyjšła dva miljony. Heta na staŭku — 18 hadzin u tydzień.

Kali išoŭ pracavać, viedaŭ, što treniery mała atrymlivajuć, ale dumaŭ, što budzie chacia b dva miljony. Praŭda, za hod pryvyk i da takich sumaŭ. Mienš 2,3 miljona nielha? Mahčyma, žančyna nie ŭličyła padatki. Kali ich adniać, to miljona dva i budzie.

Zarpłata treniera ŭ «Dynama» zaležyć ad katehoryi, stažu i premij.

— Premiju dajuć, kali tvoj vučań vyjhraŭ spabornictva. A kali vykanaŭ narmatyŭ na razrad — ty atrymlivaješ pastajannuju nadbaŭku. Nakštałt kala 400 tysiač, ale nie ŭpeŭnieny. Ale ŭ pačatkoŭca treniera tolki hadoŭ praź piać źjaŭlajecca vučań, jaki moža zdać na razrad. Da hetaha atrymlivać vialikija hrošy niemahčyma.

Zaraz u Andreja jość adzin pierśpiektyŭny chłopiec. Jamu amal 16. Jon pačaŭ zajmacca niadaŭna, ale chutka prahresuje. U treniera jość nadzieja na nadbaŭku. Pakul ža davodzicca čakać i padpracoŭvać.

— Zrazumieła, što heta nie adzinaja maja praca. Na paŭstaŭki vykładaju fizkulturu ŭ Architekturna-budaŭničym kaledžy i viadu siekcyju ŭ trenažornaj zale. Atrymlivaju taksama dva miljony. Z ranicy ŭ kaledžy viadu pary. Da čatyroch hadzin jedu siudy, treniruju rabiat, a potym paśla šaści laču znoŭ u kaledž na siekcyju.

Z sumarnaha čatyrochmiljonnaha dachodu Andrej ź niepracujučaj žonkaj-studentkaj traciać na ježu bolš za pałovu.

— Niadaŭna padličvaŭ. Za studzień na pradukty syšło dva miljony dźvieście rubloŭ. Kuplajem usio samaje prostaje: baton, chleb, harodnina, małočnyja pradukty, syry, sasiski, krupy. Miasa biarem hałoŭnym čynam na rynku — tańniej. Baćki taksama dapamahajuć. Niejkija prysmaki, nakštałt šampińjonaŭ, nie kuplajem. Pry hetym zdarovaje charčavańnie zachoŭvajecca. Dla narmalnaha enierhazabieśpiačeńnia arhanizma dosyć prostych kaš i harodniny. Śniedaju zvyčajna albo miuśli, albo amletam z sasiskami. Na abied - sup, kali jość (čaściej jość), i kaša z katletaj. A voś viačera zaŭsiody roznaja. Starajemsia, kab byli aharodninnyja sałaty. Tak što na chlebie i vadzie nie siadzim.

Pražyć možna, ale čahości smačnaha sabie nie dazvoliš. Zatoje ŭ źnižkach i akcyjach u kramach aryjentujemsia dobra:).

Trenier vielmi ŭdziačny baćkam, jakija paśla viasiella vyrašyli, što dzieci pavinny žyć asobna, i ŭziali na siabie vydatki pa arendzie adnapakajovaj kvatery. Za žyllo jany płaciać 200 dalaraŭ.

— Usio astatniaje na nas. Na internet sychodzić 120 tysiač. Čatyry telefonnyja simki ciahnuć jašče 200 tysiač. Stolki ž addajom za «kamunałku». Z adzieńnia sabie asabliva ničoha nie kuplajem. Usio, što na mnie — kuplena da pracy. Tamu pa handlovych centrach daŭno nie chadziŭ. U kino i restarany - taksama.

Andrej pryznajecca, što dumaŭ pra źmienu pracy, ale jamu nie chočacca kidać dziaciej.

- Zaraz znajści niešta składana. Dy i heta ž treba budzie kidać dziaciej. A ja da ich pryvyk, pryviazaŭsia. Ja ž sam išoŭ siudy pracavać — mnie padabajecca treniravać. Pryjemna bačyć, jak u chłopcaŭ atrymlivajecca. Vydatna nie tolki biehu vučyć, ale i hadavać chłopcaŭ i dziaŭčat dobrymi ludźmi.

Niahledziačy na nizkuju zarpłatu ŭ «Dynama», trenierskaj ciakučki niama. Ludzi pracujuć hadami. Skaračeńniaŭ taksama niama.

- U asnoŭnym u trenieraŭ staž pracy bolš za 30 hadoŭ. Ich zarpłata nabližajecca da siaredniaj pa krainie. Darečy, u instytucie raspaviali, što ŭ spartsmienaŭ i rabotnikaŭ fizkultury jana 7,5 miljona. Heta jak kazka pra hałubcy. Adny jaduć miasa, inšyja - kapustu. A razam my jamo hałubcy.

Adnak maleńkaja zarpłata nie pieraškadžaje Andreju sumlenna pracavać.

- Ja nie fiłoniu ŭ zale. Mahčyma z-za taho, što ja adkazny. Mnie pryjemna pracavać i nazirać za padapiečnymi.

• 0
• 0
• 0
• 0
• 0
• 0
• 0
• 0