Biełaruś moža ŭziać udzieł u prahramie pa raśsialeńni siryjskich biežancaŭ, jakija ciapier znachodziacca ŭ dziaržavach Jeŭrapiejskaha sajuza. Takoje mierkavańnie vykazaŭ siońnia ŭ Homieli žurnalistam pradstaŭnik Upraŭleńnia Viarchoŭnaha kamisara AAN pa spravach biežancaŭ (UVKB AAN) u Biełarusi Žan Iŭ Bušardzi.
Pavodle jaho słoŭ, u kancy sakavika biahučaha hoda adbudziecca sustreča na vysokim uzroŭni, jakuju arhanizuje UVKB AAN, dzie buduć prysutničać pradstaŭniki mnohich krain. Adna z metaŭ hetaj sustrečy — zaklikać urady dziaržaŭ padzialić ciažar adkaznaści i kłopatu ab zmušanych mihrantach, u pieršuju čarhu ab biežancach ź Siryi. Biełaruś taksama stanie adnym z udzielnikaŭ dadzienaha mierapryjemstva. U čas sustrečy pavinny być pryniaty adpaviednyja dakumienty.
«Mahčyma, dla vašaj krainy budzie raspracavanaja novaja prahrama, jakaja budzie tyčycca nie tolki Homielskaj vobłaści, ale i ŭsioj Biełarusi. Heta moža być pryjom 50, a, moža, 100 čałaviek ź liku biežancaŭ ź Siryi», — adznačyŭ jon.
U ciapierašni čas u Homielskaj vobłaści pražyvajuć niekalki siemjaŭ biežancaŭ ź Siryi, pierasialeńnie jakich było ažyćcioŭlena pry finansavaj padtrymcy UVKB AAN i pry ciesnym uzajemadziejańni ź biełaruskimi ŭładami.
«Hety prajekt u cełym možna ličyć paśpiachovym. Orhany ŭłady pahadzilisia padzialić ciažar adkaznaści ŭ akazańni dapamohi siryjskim biežancam. Ludzi tut pražyvajuć užo hod. Siońnia my naviedajem hetyja siemji i pahladzim, nakolki hetyja ludzi efiektyŭna intehrujucca ŭ biełaruskaje hramadstva, jaki dasiahnuty prahres z taho momantu, jak jany siudy pryjechali», — adznačyŭ Žan Iŭ Bušardzi.
Kamientary