AHP choča sumiaścić čarhovuju akcyju pradprymalnikaŭ z «sacyjalnym maršam». Šumčanka: Nam pasažyry nie patrebnyja

Abjadnanaja hramadzianskaja partyja (AHP) padała ŭ Minharvykankam zajaŭku na praviadzieńnie 14 sakavika ŭ Minsku «Sacyjalnaha maršu za hodnaje žyćcio».

Pavialičyć

Heta akcyja anansavałasia padčas mitynhu indyvidualnych pradprymalnikaŭ, jaki prajšoŭ u centry Minska 28 lutaha.

Jak paviedamiŭ BiełaPAN staršynia AHP Anatol Labiedźka, zajaŭka ŭ harvykankam padadziena 29 lutaha. Lidar AHP udakładniŭ, što čas i miesca zboru, a taksama maršrut šeścia całkam supadajuć z časam i miescam praviadzieńnia maršu pradprymalnikaŭ, zapłanavanaha na 14 sakavika. Zajaŭka na marš pradprymalnikaŭ była padadziena na minułym tydni eks-palitviaźniem Mikałajem Statkievičam i lidaram RHA «Pierśpiektyva» Anatolem Šumčankam. U joj paznačana, što šeście płanujecca pravieści z 13.00 da 16.00 ad Akademii navuk pa vulicach Surhanava i Arłoŭskaj da parku Družby Narodaŭ.

Pavodle słoŭ Labiedźki, roźnica pamiž dvuma zajaŭkami tolki ŭ tym, što aktyvisty AHP pakul nie płanujuć pravodzić mitynh na płoščy Banhałor. Praviadzieńnie dvuch maršaŭ u adzin i toj ž čas palityk rastłumačyŭ nieabchodnaściu kansalidacyi hramadstva. «Siońnia jość usie padstavy, kab abjadnoŭvać namahańni. Nie tolki indyvidualnyja pradprymalniki, ale i studenty, i piensijaniery stali załožnikami toj ekanamičnaj palityki, jakuju pravodziać ułady», — zajaviŭ jon.

Šumčanka, sa svajho boku, źviarnuŭ uvahu na toje, što z prapanovaj abjadnać dźvie akcyi Labiedźka da jaho i Statkieviča nie źviartaŭsia.

«Meta luboj akcyi — heta nie pryhožyja łozunhi pra toje, što treba być razam. «Pierśpiektyva» padniała chvalu, jakaja pryviała da abmierkavańnia norm ukaza № 222 ab pradprymalnickaj dziejnaści, i «pasažyry» na akcyi nam nie patrebnyja», — zajaviŭ jon.

Dziejańni pradstaŭnikoŭ AHP Šumčanka rasceńvaje jak sprobu sarvać marš pradprymalnikaŭ, bo z-za supadzieńnia času i miesca dvuch mierapryjemstvaŭ u Minharvykankama farmalna źjaŭlajecca mahčymaść admović zajaŭnikam adnaho ź ich. Hetu situacyju Šumčanka maje namier abmierkavać sa Statkievičam.

Varta adznačyć, što paśla padačy zajaŭki na praviadzieńnie 14 sakavika maršu pradprymalnikaŭ Šumčanka padkreślivaŭ: meta mierapryjemstva — nie palityčnaja, a ekanamičnaja. Akcyja zaklikana źviarnuć uvahu kiraŭnika dziaržavy na nieabchodnaść jak maha chutčej vyrašyć prablemy IP, jakija z-za ŭkaza № 222 i šerahu inšych zakonaŭ nie mohuć lehalna vieści svoj biźnies.

• 0
• 0
• 0
• 0
• 0
• 0
• 0
• 0