1 sakavika ŭ Administracyju prezidenta byŭ adpraŭleny prajekt ukaza «Ab udaskanaleńni sistemy apłaty za žyllova-kamunalnyja pasłuhi, jakija akazvajucca nasielnictvu». Što źmienicca, kali prajekt ukaza prymuć?
Prajekt raspracoŭvała rabočaja hrupa, u jakuju ŭvachodzili pradstaŭniki ministerstvaŭ ekanomiki i žyllova-kamunalnaj haspadarki. U pres-słužbie Savieta ministraŭ Naviny.by paviedamili, što prajekt dakumienta adpraŭleny ŭ Administracyju prezidenta jašče 1 sakavika. Što źmienicca ŭ taryfach, kali dakumient prymuć?
Zhodna z prajektam novaha ŭkaza, taryfy, jakija subsidujucca dziaržavaj, zastanucca praktyčna bieź źmien za vyklučeńniem vodazabieśpiačeńnia i kanalizacyi, a taksama taryfaŭ na elektraenierhiju i pryrodny haz.
Taryf na vodazabieśpiačeńnie ŭ ciapierašni čas składaje 4765,9 rubla za kubičny mietr, a na vodaadviadzieńnie — 4148,9 rubla. Takim čynam, ahulny taryf - 8914,8. Zhodna z prajektam novaha ŭkaza, ahulny taryf pavinien značna źnizicca — da 4653 rubloŭ (2790 rubloŭ — vodazabieśpiačeńnie i 1863 rubla — vodaadviadzieńnie).
Ci moža raptam nastolki patańnieć vada?
U «Minskvodakanale» nie adkazvajuć na hetaje pytańnie, adznačajučy, što ŭ košt vady, akramia inšaha, uvachodziać vydatki pradpryjemstva na elektraenierhiju (praca pompaŭ, naprykład), a taksama ačyščalnyja mierapryjemstvy.
Darečy, u Minsku ekanamična abhruntavany taryf na vadu źjaŭlajecca samym nizkim u paraŭnańni z užyvalnymi ŭ abłasnych centrach. Naprykład, u Minskaj vobłaści jon pavialičany da 15 141 rubla z 19 lutaha 2016 hoda.
Jašče ŭ kancy lutaha śpiecyjalisty «Minskvodakanała» kazali prama supraćlehłaje — ab chutkim roście taryfaŭ.
«Pakul składana skazać, na kolki pavialičacca taryfy. Ciapier vyrablajucca raźliki, jakija pavinny prajści ŭzhadnieńnie na ŭsich uzroŭniach. Na heta spatrebicca kala dvuch tydniaŭ», — kazała 25 lutaha ŭ kamientary ahienctvu «Minsk-Naviny» namieśnik dyrektara pa ekanomicy i finansach «Minskvodakanała» Inesa Ksiandzova.
Jak u takoj situacyi možna źnizić taryfy, zastajecca tolki zdahadvacca.
Taksama ŭ prajekcie ŭkaza prapisana, što taryfy na ciepłavuju i elektryčnuju enierhiju dla nasielnictva, a taksama na haz pryrodny i zvadkavany ŭvodziacca adpaviedna z pastanovaj Savieta ministraŭ ad 30 śniežnia 2013 hoda. Heta pastanova ŭžo niekalki razoŭ ŭdakładniałasia ŭ suviazi ź indeksacyjaj niekatorych taryfaŭ. Apošni raz — 30 listapada 2015 hoda na taryfy, jakija nabyli moc 1 śniežnia 2015 hoda. Ale ŭ lubym vypadku heta značyć, što košt elektraenierhii i hazu pavinna źnizicca.
Voś jak vyhladaje paraŭnalnaja tablica pa niekatorych taryfach.
I jašče adno źmianieńnie ŭ vypadku pryniaćcia ŭkaza — płata za techničnaje absłuhoŭvańnie lifta, sanitarnaje ŭtrymańnie dapamožnych pamiaškańniaŭ žyłoha doma budzie unosicca, zychodziačy z kolkaści čałaviek, «zarehistravanych pa miescy žycharstva ŭ žyłym pamiaškańni, a taksama što majuć prava vałodańnia i karystańnia žyłym pamiaškańniem kamiercyjnaha vykarystańnia, pryvatnaha žyllovaha fondu pa dahavorach najmu».
Vykanaŭčy dyrektar Mižnarodnaj asacyjacyi mieniedžmientu nieruchomaści (MAMN) u Biełarusi Hienadź Kalonaŭ ličyć, što kali heta pałažeńnie zastaniecca va ŭkazie, zahałoŭki navin možna rabić takija «U Biełarusi bahatyja žyvuć za košt biednych».
«Šmatdzietnaja siamja zapłacić šmat za lift, — skazaŭ Hienadź Kalonaŭ — bo ŭsie členy siem, jak praviła, zarehistravanyja. Piać čałaviek z adnapakajovaj kvatery, dzie žyvuć dźvie siamji, jakija raźjechacca nie mohuć, zapłaciać. Biednyja, adnym słovam, zapłaciać i šmat. A ŭładalniki vialikich kvater, dzie nichto nie zarehistravany, płacić nie buduć naohuł. A jak nazyvajecca kraina, dzie biednyja płaciać za bahatych? Nie sacyjalna aryjentavanaja».
Tut uźnikaje pytańnie, jaki tyčycca kvater, jakija zdajucca na sutki ci pamiesiačna. Chto budzie zajmacca kantrolem kolkaści ludziej, jakija tam pražyvajuć? Dla hetaha stvorać asobnuju słužbu abo hety abaviazak paviesiać na ŭžo isnujučuju?
U lubym vypadku, kolkaść žycharoŭ — vieličynia niepastajannaja. I lepš płacić u zaležnaści ad płoščy kvatery, tak jak heta vieličynia nie źmianiajecca, ličyć Hienadź Kalonaŭ.
Taksama prajekt zahadvaje da 15 sakavika zabiaśpiečyć pieraraźlik «pad piersanalnuju adkaznaść staršyniaŭ abłvykankamaŭ i Minskaha harvykankama za akazanyja spažyŭcam u studzieni 2016 hoda žyllova-kamunalnyja pasłuhi» za vyklučeńniem pasłuh vodazabieśpiačeńnia i vodaadviadzieńnia.
U prajekcie ŭkaza akcentujecca, što takaja sistema apłaty ŭvodzicca na 2016 hod. Takim čynam, heta ŭskosna pakazvaje na toje, što ŭ nastupnym hodzie taryfy i sistema znoŭ mohuć źmianicca.
Ciapier čytajuć
Analityk Hienštaba, jaki malavaŭ kartu «adkul rychtavałasia napadzieńnie», apynuŭsia ŭ SIZA KDB za pracu na ŭkrainskuju raźviedku12
Kamientary