Biełarusy Kanady praviali Dzień Voli ŭ Taronta

U niadzielu 20 sakavika Zhurtavańnie Biełarusaŭ Kanady adznačyła 98-uju hadavinu abviaščeńnia Biełaruskaj Narodnaj Respubliki śviatočnym šeściem ź biel-čyrvona-biełymi ściahami pa centralnaj vulicy Taronta – najbujniejšaha horadu Kanady.

Paśla słužby ŭ carkvie śv. Kiryły Turaŭskaha (BAPC) udzielniki skiravalisia ŭ park Kryści dzie prajšoŭ karotki mitynh. Było adznačana, što 20 sakavika padvojnaja data: akramia hadaviny Dniu Voli ŭ toj ža dzień 10 hadoŭ tamu na placy Kalinoŭskaha (Kastryčnickim pł.) ŭ Miensku byli ŭstalavanyja pieršyja namioty j pačałasia varta, jakuju šmat chto kliča «Biełaruskim Majdanam».

Šeście prajšło vulicaj Blur (adna z dvuch centralnych vulic Taronta) da Biełaruskaha Centru, što na skryžavańni z vulicaj Łensdaŭn. Padčas šeścia ŭdzielniki skandavali «Freedom to Belarus!» («Svabodu Biełarusi!»), «Žyvie Biełaruś!». Taksama było ŭzhadanaje imia ukrainskaj zmaharki Nadziei Saŭčanka, što znachodzicca ŭ pucinskich zaścienkach: zaklik «Freedom to Savchenko!» («Svabodu Saŭčanka!») łunaŭ pa-nad vulicami Taronta. Ułady horadu zabiaśpiečyli supravadžeńnie palicejskich na rovarach.

Pa skančeńni šeścia ŭ Biełaruskim Centry adbyłasia ŭračystaja impreza. Sa śviatočnym zvarotam pa telefonie z ZŠA (dzie napiaredadni adbyvałasia pasiedžańnie Rady BNR) da ŭdzielnikaŭ mierapryjemstva źviarnułasia Staršynia Rady BNR Ivonka Surviła. Jana adznačyła, što Biełaruś jość niezaležnaj, ale nie svabodnaj i jaje mara – pieradać paŭnamoctvy Ŭradu ŭ vyhnańni demakratyčnamu ŭradu novaj volnaj Biełarusi.

Sakratar Hałoŭnaj Upravy ZBK Vital Košaleŭ padrabiaźniej raspavioŭ ab padziejach u Miensku ŭ 2006 hodzie, udzielnikam jakich jon byŭ sam, žyvučy tady na Biełarusi. Taksama prahučaŭ zaklik da Premjer-ministra Kanady dałučyć svoj hołas u padtrymku Nadziei Saŭčanka da hałasoŭ Prezydentaŭ ZŠA i krain Eŭraźviazu.

Siabra Rady BNR Aleś Kot raspavioŭ pra histaryčnuju misiju Rady, a taksama pradstaviŭ kalekcyju partretaŭ Prezydentaŭ BNR, što budzie dadadzienaja da halerei ŭ Biełaruskim Centry ŭ Taronta.

Pavodle spadara Alesia, «Abviaščeńnie niezaležnaści Biełaruskaj Narodnaj Respubliki było samaj važnaj padziejaj u historyi sučasnaj Biełarusi. Bieź jaho Maskva nie pahadziłasia b stvaryć u 1919 hodzie savieckuju Biełaruskuju respubliku (SSRB, potym – BSSR). Kali b nie było BSSR, Biełaruś nia stała by znoŭ niezaležnaj u 1991 hodzie. Takim čynam, dziakujučy BNR siońnia isnuje niezaležnaja Respublika Biełaruś, jakoj by niedaskanałaj jana ni była.

Siońnia Rada BNR dziejničaje, hruntujučysia na toj idei, što jana – častka šlachu Biełarusi da demakratyi i da roskvitu. Rada pieršaju, jašče z 20-ch hadoŭ minułaha stahodździa, vystupała i vystupaje pasiarednikami pamiž Biełaruśsiu i volnym śvietam. Što jašče bolš važna – jana zastajecca zachavalnikam tradycyj biełaruskaj dziaržaŭnaści i baraćby biełarusaŭ za toje, kab mieć ułasnuju svabodnuju i demakratyčnuju dziaržavu naroŭnie ź inšymi narodami Eŭropy. Usio heta dla taho, kab nablizić dla Biełarusi pieramieny da lepšaha.»

Naprykancy aficyjnaje častki słova ŭziaŭ Barys Kirka, badaj najstarejšy siabra ZBK. Jon zaklikaŭ biełarusaŭ da jednaści, a taksama padtrymaŭ ideju šyrejšaha achopu biełaruskaj hramady Kanady praz kulturnickija mierapryjemstvy (jak, prykładam, seryja urokaŭ «Mova Nanova», što prachodzić sioleta ŭ Biełaruskim Centry ŭ Taronta).

Sapraŭdy śviatočny nastroj stvaryŭ vystup viadomaj śpiavački Śviatłany Litvinavaj, jakaja na praciahu 15 hadoŭ była salistkaj Nacyjanalnaha akademičnaha narodnaha choru Respubliki Biełaruś imia H. I. Citoviča. Narodnyja pieśni pra viasnu, luboŭ da Baćkaŭščyny j žartaŭlivyja prypieŭki zakranuli ŭsich słuchačoŭ. Publika prasiła praśpiavać jašče bolej ulublonych pieśniaŭ.

Bolej fatahrafij možna pahladzieć tut

• 0
• 0
• 0
• 0
• 0
• 0
• 0
• 0