Minsuviazi Biełarusi i Microsoft padpisali miemarandum ab uzajemarazumieńni
Ministerstva suviazi i infarmatyzacyi Biełarusi i karparacyja Microsoft padpisali miemarandum ab uzajemarazumieńni, paviedamiŭ siońnia žurnalistam ministr suviazi i infarmatyzacyi Siarhiej Papkoŭ pierad pačatkam cyrymonii adkryćcia mižnarodnaha śpiecyjalizavanaha forumu pa telekamunikacyjach, infarmacyjnych i bankaŭskich technałohijach «TIBO-2016».
«My padpisali miemarandum ab tym, što abodva baki buduć imknucca sadziejničać adzin adnamu ŭ raźvićci biznesu. Na siońniašni momant dakumient źjaŭlajecca pieršym krokam u supracoŭnictvie pamiž uradam i kampanijaj Microsoft pa realizacyi roznych prajektaŭ u halinie IT-technałohij», — adznačyŭ Siarhiej Papkoŭ. U pryvatnaści, Microsoft moža ŭziać udzieł u prajekcie pa stvareńni ŭ Biełarusi ličbavaj ekanomiki.
Taksama Siarhiej Papkoŭ raspavioŭ, što abmiarkoŭvajecca košt prahramnych praduktaŭ Microsoft dla Biełarusi.
U svaju čarhu pieršy namieśnik ministra suviazi i infarmatyzacyi Dźmitryj Šadko nahadaŭ, što ŭ ramkach Suśvietnaj handlovaj arhanizacyi vialiki kompleks pytańniaŭ źviazany z pravami na intelektualnuju ŭłasnaść, u tym liku na prahramnaje zabieśpiačeńnie.
«I tut Microsoft — adzin z klučavych hulcoŭ na rynku. Nie adziny, ź jakim my viadziom pieramovy, ale klučavy. My jakraz viadziom razmovu pra toje, kab nacyjanalnyja intaresy krainy byli ŭzhodnienyja ź mižnarodnymi pryncypami viaršenstva abarony intelektualnaj ułasnaści, ale kab hetaja intelektualnaja ŭłasnaść abychodziłasia nie tak doraha, jak moža abychodzicca, kali kiravacca standartnym prajs-listom. Pa sutnaści, my prapanujem pryniać da ŭvahi nacyjanalnyja asablivaści, patreby sistemy adukacyi, achovy zdaroŭja i prapanavać nam umovy, jakija b byli vyhadnymi», — rastłumačyŭ jon.
Vystava «TIBO-2016» projdzie ŭ Minsku 19-22 krasavika. Udzieł u joj płanujuć uziać bolš za 100 kampanij z 18 krain (Biełaruś, Rasija, Ukraina, Kazachstan, Azierbajdžan, Litva, Łatvija, Polšča, Čechija, Hiermanija, Finlandyja, Šviecyja, Vialikabrytanija, Turcyja, Kitaj, Respublika Kareja, Japonija, ZŠA).
-
Navukoŭcy dakazali marnaść internet-sprečak: nichto nie mianiaje dumku, a vyniki nie reprezientujuć bolšuju častku hramadstva
-
ŠI biaśsilny pierad mastactvam: vieršavanyja zapyty zmusili jaho raskazać, jak stvarać atamnyja bomby i łamać sajty
-
U Ziamli jość chvost, jaki ciahniecca jak minimum na 2 miljony kiłamietraŭ
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary