Doŭh Biełarusi «Hazpromu» za studzień—krasavik pieravysiŭ 125 młn. dołaraŭ, paviedamiŭ žurnalistam ministr enierhietyki Rasii Alaksandr Novak 12 maja ŭ Mahilovie, dzie prachodzić pasiadžeńnie Savieta ministraŭ Sajuznaj dziaržavy.
Pry hetym jon adznačyŭ, što rasijski bok nie maje namieru padymać heta pytańnie na siońniašnim pasiadžeńni. «Ja nie mahu skazać za biełaruski bok, u nas niama hetaha pytańnia (u paradku dnia)», — cytuje Novaka RIA Novosti.
U svaju čarhu ministr enierhietyki Biełarusi Uładzimir Patupčyk zajaviŭ, što Minsk nie pryznaje najaŭnaści doŭhu pierad «Hazpromam» za pastaŭleny haz. Pavodle jaho słoŭ, baki pa-roznamu traktujuć mižuradavyja damoŭlenaści. «Rasija ličyć, što jość cana «Jamała», a my ličym, što z 1 studzienia 2015 hoda pavinny dziejničać rynačnyja roŭnadachodnyja ceny», — rastłumačyŭ Patupčyk.
Pieramovy na hetu temu viaducca sa studzienia. Pradstaŭniki Rasii nieadnarazova zajaŭlali ab niemetazhodnaści źnižać canu na haz dla Biełarusi. Biełaruski bok ličyć, što maje prava raźličvać na źnižeńnie cany da 80 dołaraŭ za tysiaču kubamietraŭ zamiest ciapierašnich 142.
U krasaviku dziaržsakratar SD Ryhor Rapota zajaviŭ, što Sajuznaja dziaržava hatova pry nieabchodnaści ŭmiašacca ŭ situacyju. «My hatovyja pravieści analiz. Hatovyja pahladzieć na heta razam ź fiederalnymi orhanami ŭłady, ale pakul idzie toje, što my nazyvajem «torh», — skazaŭ jon. Pry hetym Rapota nahadaŭ, što damova pamiž «Hazpromam» i Biełaruśsiu praduhledžvaje roŭnyja ŭmovy dla sub`iektaŭ haspadarańnia.
U pačatku maja stała viadoma, što biełaruskaje daččynaje pradpryjemstva «Hazproma» — AAT «Hazprom transhaz Biełaruś» — padało ŭ mižnarodny arbitražny sud pry Biełaruskaj handlova-pramysłovaj pałacie isk na biełaruskija hazazabieśpiačalnyja arhanizacyi ŭ suviazi z najaŭnaściu ŭ ich zapazyčanaści pa apłacie pastaŭlenaha pryrodnaha hazu.
Ciapier čytajuć
U Mahilovie adbyłosia šeście da miesca masavych represij 1930‑ch — ź ikonaj rasijskaha cara i impierskim trykałoram7
U Mahilovie adbyłosia šeście da miesca masavych represij 1930‑ch — ź ikonaj rasijskaha cara i impierskim trykałoram
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1616
Kamientary