Ekapčalnik u Połackim rajonie prapanuje turystam son na vullach i ŭroki pčalarstva
Škoła junych pčalaroŭ i turystyčny abjekt pa sumiaščalnictvie adkryjecca ŭ Połackim rajonie, paviedamili ŭ pres-słužbie Połackaha rajvykankama.
Adkryćcio novaha turystyčnaha abjekta z adukacyjnymi funkcyjami — ekapčalnika «Sakrety zdaroŭja» ŭ vioscy Bułaŭki — adbudziecca 11 červienia. Na tematyčnym śviacie dzieci daviedajucca pra sakrety technałohii vytvorčaści miodu, paŭdzielničajuć u interaktyŭnych prahramach z «žyvoj» połackaj pčołkaj, paznavalnych hulniach, majstar-kłasach. Zaprošanyja na adkryćcio i kiraŭniki turystyčnych arhanizacyj, ekskursavody, pradstaŭniki turbiznesu.
«Abjekt unikalny ŭ svajoj śfiery: jon stanie miescam pryciahnieńnia turystaŭ, jakim tut prapanujuć azdaraŭlenčy son na pčalinych vullach — dakładniej, u domiku na lažancy, pad jakimi jany raźmieščanyja», — adznačyŭ namieśnik načalnika adździeła adukacyi, sportu i turyzmu rajvykankama Alaksiej Klinišoŭ.
Jak śćviardžajuć arhanizatary, azdaraŭlenčy efiekt hetaha pryjomu apiterapii zaklučajecca ŭ tym, što čałaviečaje enierhietyčnaje pole čyścicca ad napłastavańniaŭ niehatyŭnaj enierhii. Zdymajucca enierhietyčnyja błoki i zaciski, jakija vyklikajuć roznyja chvaroby cieła. A ŭsio tamu, što pčoły stvarajuć vakoł siabie azdaraŭlenčaje bijapole. Dvuchhadzinny son na vullach roŭny 8 hadzinam zvyčajnaha snu i ŭzmacniaje bijapole čałavieka ŭ 5 razoŭ. Ciapło, jakoje idzie ad hniazda pčoł, rassłablaje myšcy śpiny, palapšaje krovazvarot, zdymaje boli i azdaraŭlaje chrybietnik.
Akramia taho, połacki ekapčalnik «Sakrety zdaroŭja» kompleksna prapanuje navučalnyja mierapryjemstvy ab technałohijach vytvorčaści miodu i žyćciadziejnaści pčoł, majstar-kłasy pa łozaplacieńni ŭ śpiecyjalna abstalavanym pakoi, pačastunak miadovymi praduktami. Dadzienyja mierapryjemstvy źjaŭlajucca kampanientam miascovaj inicyjatyvy «Umacavańnie patencyjału sumiesnych inicyjatyŭ u sielskaj miascovaści Połackaha rehijonu praz ukaranieńnie ŭnikalnych mietodyk azdaraŭlenčaha snu na pčalinych vullach jak efiektyŭnaha srodku rełaksacyi i prafiłaktyčnaha lačeńnia hramadzian i inavacyjnaha turystyčnaha praduktu» Prajekta EC/PRAAN «Sadziejničańnie raźvićciu na miascovym uzroŭni ŭ Respublicy Biełaruś».
Ciapier čytajuć
18‑hadovy były palitviazień raskazaŭ, što jon svajak Cichanoŭskaj. Jaho zatrymali, kali jon jechaŭ vajavać za Ukrainu3
Kamientary