Экапчальнік у Полацкім раёне прапануе турыстам сон на вуллях і ўрокі пчалярства
Школа юных пчаляроў і турыстычны аб'ект па сумяшчальніцтве адкрыецца ў Полацкім раёне, паведамілі ў прэс-службе Полацкага райвыканкама.
Адкрыццё новага турыстычнага аб'екта з адукацыйнымі функцыямі — экапчальніка «Сакрэты здароўя» ў вёсцы Булаўкі — адбудзецца 11 чэрвеня. На тэматычным свяце дзеці даведаюцца пра сакрэты тэхналогіі вытворчасці мёду, паўдзельнічаюць у інтэрактыўных праграмах з «жывой» полацкай пчолкай, пазнавальных гульнях, майстар-класах. Запрошаныя на адкрыццё і кіраўнікі турыстычных арганізацый, экскурсаводы, прадстаўнікі турбізнэсу.
«Аб'ект унікальны ў сваёй сферы: ён стане месцам прыцягнення турыстаў, якім тут прапануюць аздараўленчы сон на пчаліных вуллях — дакладней, у доміку на ляжанцы, пад якімі яны размешчаныя», — адзначыў намеснік начальніка аддзела адукацыі, спорту і турызму райвыканкама Аляксей Клінішоў.
Як сцвярджаюць арганізатары, аздараўленчы эфект гэтага прыёму апітэрапіі заключаецца ў тым, што чалавечае энергетычнае поле чысціцца ад напластаванняў негатыўнай энергіі. Здымаюцца энергетычныя блокі і заціскі, якія выклікаюць розныя хваробы цела. А ўсё таму, што пчолы ствараюць вакол сябе аздараўленчае біяполе. Двухгадзінны сон на вуллях роўны 8 гадзінам звычайнага сну і ўзмацняе біяполе чалавека ў 5 разоў. Цяпло, якое ідзе ад гнязда пчол, расслабляе мышцы спіны, паляпшае кровазварот, здымае болі і аздараўляе хрыбетнік.
Акрамя таго, полацкі экапчальнік «Сакрэты здароўя» комплексна прапануе навучальныя мерапрыемствы аб тэхналогіях вытворчасці мёду і жыццядзейнасці пчол, майстар-класы па лозапляценні ў спецыяльна абсталяваным пакоі, пачастунак мядовымі прадуктамі. Дадзеныя мерапрыемствы з'яўляюцца кампанентам мясцовай ініцыятывы «Умацаванне патэнцыялу сумесных ініцыятыў у сельскай мясцовасці Полацкага рэгіёну праз укараненне ўнікальных методык аздараўленчага сну на пчаліных вуллях як эфектыўнага сродку рэлаксацыі і прафілактычнага лячэння грамадзян і інавацыйнага турыстычнага прадукту» Праекта EC/ПРААН «Садзейнічанне развіццю на мясцовым узроўні ў Рэспубліцы Беларусь».
Каментары