Alfa-bank nazvaŭ krainy, dzie niebiaśpiečna zdymać hrošy ŭ bankamatach
U suviazi z prychodam pary adpačynkaŭ «Alfa-Bank» (Biełaruś) nazvaŭ krainy, dzie vysokija šancy stać achviaraj machlaroŭ pry źniaćci najaŭnych hrošaj u bankamacie. U zonie ryzyki apynulisia Kitaj, ZŠA, Indyja i navat Paŭnočnaja Kareja, paviedamili ŭ pres-słužbie banka sa spasyłkaj na źviestki mižnarodnych płaciežnych sistem.
Biełarusam rajać być aściarožnymi pry źniaćci najaŭnych hrošaj prykładna ŭ 100 krainach. Surjoznyja ryzyki dla ŭładalnikaŭ kart moža ŭjaŭlać naviedvańnie nievialikich astraŭnych dziaržaŭ Karybskaha basiejna kštałtu Hrenady abo Daminiki, bolšaści krain Łacinskaj Amieryki — ad Vieniesueły da Arhienciny, ZŠA.
Składalniki śpisa rekamiendujuć aściarožna zdymać hrošy ŭ Aŭstralii i krainach Paŭdniova-Uschodniaj Azii. U pryvatnaści varta być napahatovie ŭ Kitai, Indyi, Indaniezii, Vjetnamie i Kambodžy. U śpis taksama ŭvajšli Japonija, Hankonh i Sinhapur, niahledziačy na ekanamičny dabrabyt. Što cikava, ekśpierty rajać być pilnymi ŭ Paŭnočnaj Karei.
«Źniaćcie najaŭnych u bankamatach na terytoryjach hetych krain, jak praviła, ažyćciaŭlajecca pa mahnitnaj pałasie, a nie pa mikrapracesary (abo «čypie»), što stvaraje pavyšanuju ryzyku machlarstva dla trymalnikaŭ kartak.
Tamu pierad pajezdkaj u hetyja krainy my raim być aściarožnymi i nie mianiać limity na źniaćcie srodkaŭ — lepš heta zrabić užo na miescy pry dapamozie internet- abo mabilnaha banka, kali vy pierakanajeciesia, što patrebny vam bankamat znachodzicca, naprykład, u faje hatela», — adznačyli ŭ «Alfa-Banku». Pry hetym nahadali, što z 1 lipienia minułaha hoda ŭ Biełarusi vypuskajucca tolki čypavanyja kartki, jakija majuć taksama mahnitnuju pałasu.
Peŭnaj strachoŭkaj ad machlarstva moža stać pasłuha SMS-abviaščeńnia. «Kali vy atrymajecie paviedamleńnie pra toje, što z kartki śpisanaja niejkaja suma biez vašaha ŭdziełu, to zmožacie imhnienna adreahavać — zabłakavać kartu z dapamohaj internet- abo mabilnaha banka i paźbiehnuć straty hrašovych srodkaŭ», — rastłumačyli ŭ banku.
Kab źnizić pahrozy dla biełaruskich padarožnikaŭ, «Alfa-Bank» 8 červienia abmiežavaŭ limity na źniaćcie najaŭnych hrošaj u krainach z hetaha śpisa — pamienšyŭ ich u dva razy ŭ paraŭnańni ź limitami na anałahičnyja apieracyi ŭ astatnich dziaržavach. Zrešty, hetyja limity mohuć być admienienyja na padstavie prośby ŭładalnika kartki.
Kamientary