Na Dzień Niezaležnaści ŭ minskim chramie dzieci śpiavali «A ja v Rośsiju domoj choču». Nastajaciel: «Karani prablemy hłybiejšyja»
U biełaruskich sacyjalnych sietkach kipić niezadavalnieńnie praz akcyju «Ja pamiataju, ja hanarusia», jakuju 3 lipienia zładziŭ minski pravasłaŭny chram imia Mikałaja Japonskaha.
Padčas mierapryjemstva dla prychadžanaŭ śpiavali vajennyja pieśni, arhanizavali palavuju kuchniu, rabili «majstar-kłasy» pa akazańni pieršaj dapamohi — niekatorych dziaciej navat abmotvali, niby ranienych, a tyja achvotna fatahrafavalisia.
Pra heta možna mierkavać, hlanuŭšy fotaspravazdaču z akcyi.
Ale abureńnie internaŭtaŭ vyklikała toje, jakija pieśni śpiavali na hetym mierapryjemstvie.
Sprava ŭ tym, što napiaredadni Dnia Niezaležnaści supołka chrama «UKantakcie» vykłała śpis pieśniaŭ, prapanavanych dla razvučvańnia, kab potym razam śpiavać ich na akcyi «Ja pamiataju, ja hanarusia».
Siarod niekalkich pieśniaŭ akazałasia i takaja, jak «A ja v Rośsiju domoj choču».
U tekście jość, naprykład, takija słovy:
«Poślednij raz sojdiomsia zavtra v rukopašnoj,
Poślednij raz Rośsii smožiem posłužiť.
A za niejo i pomierieť sovsiem nie strašno,
Choť každyj vsio-taki nadiejetsia dožiť!»
Čamu słovy mienavita z takim źmiestam prapanoŭvalisia dla razvučvańnia i sumiesnaha vykanańnia ŭ Dzień biełaruskaj Niezaležnaści? Čamu jaje śpiavali dzieci?
Z hetym pytańniem my dazvanilisia da nastajaciela chrama imia Mikałaja Japonskaha Paŭła Sierdziuka.
Toj pačaŭ razmovu pa-biełarusku, adnak vykazaŭ ździŭleńnie, što «napisanaja šmat hadoŭ tamu pieśnia» vyklikała takija sprečki.
Razam z hetym ijerej Pavieł padkreśliŭ, što tolki niadaŭna vypisaŭsia z balnicy i ŭdziełu ŭ składańni prahramy nie braŭ.
«Ja viedaju, što była havorka pra toje, što ludzi buduć śpiavać pieśni, jakija adnosiacca da temy vajny. A hetaja pieśnia — vielmi znakamitaja, jana nie marhinalnaja i nie napisana na kalency. Ja nie baču tut nijakaj… A čamu takaja pieśnia abranaja? Dyk heta vodhuk našych prychadžan. I čamu jany tak robiać, čamu takija pieśni śpiavajuć? Nu dyk heta treba hłybiej bačyć prablemu», — skazaŭ nam śviatar.
Razam z hetym Pavieł dadaŭ, što zaprašaje ŭsich aburanych u chram i hatovy vysłuchać pryčyny niezadavalnieńnia, razam razabracca ŭ situacyi.
Ciapier čytajuć
«Kab Biełaruś nie addali Pucinu ŭ jakaści suciašalnaha pryza». Cichanoŭskaja zaklikaje ŭklučyć biełaruskaje pytańnie ŭ mirnyja pieramovy Ukrainy i Rasii3434
Kamientary