Jarmošyna sustrełasia z pradstaŭnikami misii BDIPČ ABSIE
Staršynia Centrvybarkama Lidzija Jarmošyna 2 žniŭnia sustrełasia ŭ Minsku z kiraŭnikom misii Biuro pa demakratyčnych instytutach i pravach čałavieka (BDIPČ) ABSIE pa nazirańni za parłamienckimi vybarami ŭ Biełarusi Kaetanaj de Zułujetaj Aŭtram.
«Heta pieršaja sustreča, padčas jakoj byli ŭzhodnieny asnoŭnyja pytańni supracoŭnictva pamiž misijaj BDIPČ i Centrvybarkamam. U chodzie hetaj sustrečy staršynia CVK Lidzija Jarmošyna prainfarmavała ab minułych etapach vybarčaj kampanii, pra źmieny, jakija byli ŭniesieny ŭ vybarčaje zakanadaŭstva paśla minułych parłamienckich vybaraŭ, i pra tyja dziejańni, jakija raspačała CVK pa vykanańni rekamiendacyj BDIPČ ABSIE», — paviedamiŭ BiełaPAN sakratar CVK Mikałaj Łazavik.
U pryvatnaści, pavodle jaho słoŭ, Jarmošyna adznačyła, što šerah pałažeńniaŭ, jakija vynikajuć z rekamiendacyj BDIPČ, uklučany ŭ mietadyčnyja materyjały dla členaŭ vybarkamaŭ.
Sakratar CVK taksama paviedamiŭ, što baki damovilisia «ab dalejšym supracoŭnictvie, srodkach suviazi». «Heta była pieršaja aznajamlalnaja sustreča. My damovilisia, što ŭ dalejšym budziem imknucca supracoŭničać ź minimalnym farmalizmam, kab členy misii ABSIE mieli mahčymaść napramuju źviartacca ŭ Centralnuju kamisiju pa lubych pytańniach, jakija ich cikaviać», — skazaŭ Łazavik.
Raniej u toj ža dzień, 2 žniŭnia, kiraŭnik misii naziralnikaŭ sustrełasia z namieśnikam ministra zamiežnych spraŭ Alenaj Kupčynoj. Pavodle infarmacyi pres-słužby biełaruskaha MZS, baki abmierkavali chod biahučaj vybarčaj kampanii ŭ Biełarusi, a taksama šerah pytańniaŭ, źviazanych z arhanizacyjaj mižnarodnaha nazirańnia, u tym liku pa linii BDIPČ.
Nahadajem, misija BDIPČ ABSIE prybyła ŭ Biełaruś 31 lipienia. Kiraŭnik misii Kaetana de Zułujeta Aŭtram — pradstaŭnik Italii. Naradziłasia ŭ Kałumbii, z 1981 hoda pracavała žurnalistam, zaraz błohier. Z 1996 hoda abirajecca ŭ italjanski parłamient. U jakaści kiraŭnika misii BDIPČ ABSIE Kaetana de Zułujeta Aŭtram pracavała ŭ Azierbajdžanie, Turcyi, Čechii, Francyi, va Uźbiekistanie, Ukrainie.
Dla pracy na parłamienckich vybarach u Biełarusi BDIPČ ABSIE płanuje nakiravać 40 doŭhaterminovych i 400 karotkaterminovych naziralnikaŭ. Pa stanie na 2 žniŭnia ad misii akredytavany 51 naziralnik.
Kamientary