Urad Biełarusi inicyjuje pierahlad stavak uvaznych mytnych pošlin u JEAES i choča pačuć mierkavańnie biźniesu pa hetym pytańni, paviedamili BiełaPAN u pres-słužbie Biźnies-sajuza pradprymalnikaŭ i najmalnikaŭ imia prafiesara M.S.Kuniaŭskaha (BSPN).
Rašeńnie źviarnucca ŭ Jeŭrazijskuju ekanamičnuju kamisiju z prapanovaj pierahledzieć staŭki Adzinaha mytnaha taryfu JEAES pryniataje 20 vieraśnia na pasiadžeńni mižviedamasnaha savieta pa źniešniehandlovaj palitycy, jaki dziejničaje pry Saŭminie. Biźnies-sajuzam krainy daručana vyvučyć dumku ajčynnych pradpryjemstvaŭ adnosna dziejnaha ŭzroŭniu mytnych pošlin i ŭnieści svaje prapanovy, paviedamiŭ člen savieta, sustaršynia praŭleńnia BSPN Dźmitryj Dzičkoŭski. Pavodle jaho słoŭ, vyniasieńnie hetaha pytańnia na abmierkavańnie dziełavoj hramadskaści — pryncypovaja pazicyja kiraŭnika savieta, pieršaha vice-premjera Vasila Maciušeŭskaha.
Jak zaznačyła pres-słužba, z pryniaćciem Adzinaha mytnaha taryfu pošliny na mnohija hatovyja tavary apynulisia supastaŭnyja albo bolšyja za pošliny na syravinu i kamplektujučyja, nieabchodnyja dla vytvorčaści hetych tavaraŭ. Dyspraporcyja stavak mytnych pošlin niehatyŭna adbiłasia na ekanomicy pierapracoŭčych pradpryjemstvaŭ krainy i zrabiła ich bolš uraźlivymi pierad impartam z-za miežaŭ JEAES.
Na dumku BSPN, situacyja moža pahoršycca paśla zakančeńnia pierachodnaha pieryjadu, na praciahu jakoha Rasija, staŭšy členam SHA, abaviazałasia źnizić staŭki mytnych pošlin na mnohija hatovyja tavary. Nahadajem, Adziny mytny taryf karektujecca ŭ adpaviednaści z abaviazacielstvami Rasijskaj Fiederacyi pierad SHA.
Dla vykanańnia daručeńniaŭ urada BSPN raspracavaŭ apytalny list i pačaŭ rassyłać jaho pa pradpryjemstvach. Vyniki apytańnia zapłanavana abmierkavać u druhoj pałovie kastryčnika na kruhłym stale ŭ Ministerstvie zamiežnych spraŭ. Čakajecca, što abmierkavańnie dazvolić vypracavać kansalidavanuju pazicyju ŭładaŭ i pradstaŭnikoŭ biźniesu z nahody ŭzroŭniu mytnych stavak i dapamoža padrychtavać arhumientavanyja prapanovy pa ich karekciroŭcy dla razhladu nadnacyjanalnym orhanam JEAES.
Kamientary