Rajvykankam pra prymusovuju padpisku ŭ Lidzie: «Z metaj palapšeńnia jakaści infarmavańnia»
Niekalki tydniaŭ tamu ŭ biełaruskich ŚMI źjaviłasia infarmacyja pra prymusovuju padpisku na dziaržaŭnyja vydańni, arhanizavanuju Lidskim rajvykankamam.
U liście namieśnik staršyni vykankama źviartaŭ uvahu kiraŭnikoŭ pradpryjemstvaŭ «na nieabchodnaść pryniaćcia mier pa praviadzieńni padpisnoj kampanii na 4 kvartał na vydańni «Sovietskaja Biełoruśsija», «Respublika», «Źviazda», «Hrodzienskaja praŭda», «Lidskaja hazieta» i inšyja… » Kolkaść vypisanych vydańniaŭ pavinna składać nie mienš za 50 % ad kolkaści pracaŭnikoŭ pradpryjemstva, — adznačałasia ŭ dakumiencie, što trapiŭ u presu.
Zvyčajna ŭ padobnych vypadkach čynoŭniki abviarhajuć fakty svajoj padpisnoj aktyŭnaści. Adnak staršynia Lidskaha rajvykankama Michaił Karpovič u adkaz na zvarot pres-sakratara HA «BAŽ» Barysa Hareckaha nie staŭ admaŭlać udziełu čynoŭnikaŭ u spravie padpisnoj kampanii. Michaił Karpovič tłumačyć nieabchodnaść arhanizacyj padpisvacca na dziaržaŭnyja vydańni nastupnym čynam:
— U suviazi z tym, što infarmacyja pa pytańniach praviadzieńnia adzinych dzion infarmavańnia nasielnictva da čalcoŭ infarmacyjna-prapahandysckich hrup publikujecca ŭ srodkach masavaj infarmacyi, a hramadzianie praciahvajuć uzdymać adny i tyja ž pytańni, jakija nieadnarazova aśviatlalisia ŭ respublikanskich, abłasnych i rajonnych vydańniach, Lidski rajonny vykanaŭčy kamitet źviarnuŭ uvahu kiraŭnikoŭ na nieabchodnaść aktyvizacyi padpisnoj kampanii u pracoŭnych kalektyvach.
Arhanizacyja padpisnoj kampanii spryjaje praviadzieńniu infarmacyjnaj raboty z nasielnictvam na bolš vysokim uzroŭni, — havorycca ŭ adkazie.
HA «Biełaruskaja asacyjacyja žurnalistaŭ» nieadnarazova źviartała ŭvahu na toje, što padpisnyja dyrektyvy čynoŭnikaŭ istotna parušajuć roŭnaść umoŭ pracy dziaržaŭnych i niedziaržaŭnych ŚMI ŭ Biełarusi.
Da taho ž šerah niedziaržaŭnych vydańniaŭ pa-raniejšamu nie ŭklučanyja ŭ padpisny katałoh RUP «Biełpošta», kudy nieadnarazova sprabavali trapić, ale atrymlivali admovy.
Ciapier čytajuć
Maryna Adamovič apublikavała novyja FOTY Mikoły Statkieviča2
Kamientary