Najbujniejšaja avaryja enerhasystemy za ŭsiu historyju Biełarusi źviarnuła ŭvahu na Novałukomskuju DRES.
Najbujniejšaja avaryja enerhasystemy za ŭsiu historyju Biełarusi źviarnuła ŭvahu na Novałukomskuju DRES.
Nahadajem, što ŭ vyniku avaryi adnaho z vysakavoltnych vyklučalnikaŭ na Navałukomlskaj DRES 25 červienia i łancuhovaha efektu, jaki heta vyklikała, u 17 % spažyŭcoŭ u Biełarusi była adklučana elektraenerhija. Elektryčnaść źnikła ŭ niekatorych nasielenych punktach Viciebskaj, Bieraściejskaj, Haradzienskaj, Mienskaj abłaściej i niekatorych rajonach Miensku.
Vusnami namieśnika dyrektara stancyi pa idealohii Michaiła Bondara było zajaŭlena, što čałaviečy faktar, jak pryčyna avaryi vyklučany, jak i mahčymaść dyversii. Pry hetym inšyja pryčyny avaryi taksama zastalisia nie ahučanymi.
Niedachop elektraenerhii byŭ kampensavany za košt pastavak z Rasiei, Łatvii i Litvy.
Tolki na nastupny dzień źjaviłasia aficyjnaja versija nakont adnoj z pryčynaŭ zdareńnia — avaryja adnaho z vysakavoltnych vyklučalnikaŭ.
U ŚMI zahučali vykazvańni pra znošanaść i sastarełaść abstalavańnia. Havaryłasia pra toje, što z momantu pabudovy ŭłasnaj AES, biełaruskija DRES u Navałukomli i Biełaaziorsku spyniać svaju pracu. Razam z tym, kiraŭnictva stancyi i «Viciebskenerha» bačać u joj patencyjał, jaki moža dazvolić Biełarusi pierajści ad impartu elektraenerhii da jaje ekspartu. U studzieńskim numary časopisu «Enerhietyka i PEK» hetaha hodu byŭ nadrukavany artykuł pra značeńnie, stan i perspektyvy DRES u Navałukomli. U artykule śćviardžajecca, što abstalavańnie, jakoje hieneryruje elektraenerhiju, padyšło da miažy svajho motaresursu. Pieravod stancyi na bolš sučasnaje i ekanamičnaje abstalavańnie abydziecca ŭ $4 młrd, zasvoić jakija mahčyma tolki ciaham 10-12 hod. Takim čynam, davodziać aŭtary artykułu, u nastupnyja 15–20 hod DRES zastaniecca asnoŭnaj, najbolš mahutnaj i ekanamičnaj krynicaj vypracoŭki elektraenerhii ŭ Biełarusi ŭ mižaciaplalny peryjad.
Adnym z šlachoŭ aptymalnaha raźvićcia stancyi admysłoŭcam bačycca pavyšeńnie ekanamičnaści pracy DRES, dasiahnuć jakoj možna za košt pavieličeńnia siaredniaj zahruzki enerhablokaŭ. Bloki Navałukomlskaj DRES raźličanyja na siaredniuju nahruzku ŭ pamiery 300 MVt, ale jany zdolnyja pry hetym efektyŭna pracavać pry pavyšeńni nahruzki na 30 MVt. Pavodle aŭtaraŭ artykułu, vykarystoŭvajučy enerhabloki ŭ takim režymie, možna dasiahnuć značnaj ekanomii resursaŭ i ŭ vyniku admovicca ad impartu elektraenerhii z Rasiei, a ŭ aciaplalny peryjad navat naładzić jaje ekspart na Zachad. Dziela hetaha, na dumku specyjalistaŭ, dastatkova «realizavać rynačnyja metady stymulavańnia vytvorčaści ŭłasnaj elektraenerhii na Navałukomlskaj DRES».
Asnoŭnymi pryčynami źnižeńnia ekanamičnaści pracy stancyi źjaŭlajucca spynieńnie navukova-daślednickich pracaŭ, strata suviaziaŭ z vytvorcami abstalavańnia, istotnaje abmiežavańnie abjomaŭ finansavańnia asnoŭnych nakirunkaŭ, što vyznačajuć efektyŭnaść pracy elektrastancyi, havorycca ŭ artykule.
Na siońnia mahutnaści Navałukomlskaj DRES składajuć bolš za 30% ustalavanaj mahutnaści enerhasystemy Biełarusi (2400 MVt z 8000 MVt). Stancyja budavałasia na praciahu 10 hadoŭ z 1964 pa 1974 hod. Ad 2002 hodu realizujecca prahrama pa jaje techničnym pieraŭzbrajeńni, raźličanaja da 2010 h.
Kamientary