Staŭki padatku za vałodańnie sabakami ŭ Minsku źnižany z 1 studzienia 2017 hoda. Takoje rašeńnie pryniata siońnia na čarhovaj siesii Minskaha haradskoha Savieta deputataŭ.
Źmianieńni i dapaŭnieńni ŭniesienyja ŭ rašeńnie Minskaha haradskoha Savieta deputataŭ ad 24 listapada 2010 hoda numar 60 «Ab ustanaŭleńni i ŭviadzieńni ŭ dziejańnie padatku za vałodańnie sabakami». Dakumient ustanaŭlivaje staŭki padatku ŭ zaležnaści ad vyšyni sabak u karku. Zychodziačy ź dziejučaha pamieru bazavaj vieličyni Br21, staŭki padatku składajuć ad Br4,2 da Br12,6 u miesiac, dla parod, uklučanych u pieralik patencyjalna niebiaśpiečnych, — Br15,75 (0,75 BV).
Jak paviedamiŭ načalnik hałoŭnaha finansavaha ŭpraŭleńnia Minharvykankama Alaksiej Afanaśjeŭ, ciapier staŭka padatku ŭstanoŭlena ŭ pamiery 0,3 BV (dla sabak patencyjalna niebiaśpiečnych parod — 1 BV), abo Br6,9 i Br23 u kvartał z ulikam płanujemaha z 2017 hoda pavieličeńnia bazavaj vieličyni.
«Rašeńnie daść mahčymaść źnizić padatkovuju nahruzku na ŭładalnikaŭ sabak u siarednim na 67 pracentaŭ. Pastupleńni ŭ biudžet Minska pa hetaj krynicy źmienšacca na sumu amal Br300 tys. Ciapier u hod u Minsku z haspadaroŭ chatnich hadavancaŭ źbirajecca amal Br450 tys.», — adznačyŭ Alaksiej Afanaśjeŭ.
Zakon Respubliki Biełaruś ad 18 kastryčnika 2016 hoda numar 432-Z unosić źmianieńni ŭ Padatkovy kodeks, u adpaviednaści ź jakimi staŭki padatku za vałodańnie sabakami źmienšany da 0,3 BV za kvartał (sabakami patencyjalna niebiaśpiečnych parod — da 1,5 BV). Miascovym Savietam deputataŭ pradastaŭlena prava źmianšać staŭki padatku, ale nie bolš jak u 2 razy.
Źmianieńni ŭstupiać u siłu z 1 studzienia 2017 hoda.
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak44
Kamientary