Ad nieanacyzmu i zmahańnia z «juda-chryścijanskaj akupacyjaj» da studyi Davydźki: śpiecmateryjał pra kiraŭnika «Rumoła» Siarhieja Łušča
Niadaŭna staršynia Biełteleradyjokampanii Hienadź Davydźka zaprasiŭ u efir prahramy «Kłub redaktaraŭ» Siarhieja Łušča — lidara prarasijskaj arhanizacyi «Rumoł» (ad «Ruś mołodaja») — razam ź im Davydźka abmiarkoŭvaŭ listapadaŭski numar «Našaj Nivy».
Źjaŭleńnie kiraŭnika «Rumoła» ŭ efiry centralnaha biełaruskaha kanała naviało «Našu Nivu» na dumku raskazać čytačam pra žyćciovy šlach Łušča, jaki jašče zusim niadaŭna byŭ «vałchvom» nieanacysckaj pahanskaj siekty «Schoron Jež Słavien», a ciapier staŭ hościem dziaržaŭnaha telebačańnia.
Najpierš, chto taki Siarhiej Łušč? Siabie jon pazicyjanuje jak ruskaha, jaki žyvie ŭ Biełarusi, vystupaje za jednaść słavian i ideały «ruskaha śvietu», jamu 33 hady.
Jon — «namieśnik staršyni kardynacyjnaj rady kiraŭnikoŭ hramadskich abjadnańniaŭ rasijskich suajčyńnikaŭ u Respublicy Biełaruś».
Padnačalenaja Łušču arhanizacyja «Rumoł» aktyŭna ŭdzielničaje ŭ mierapryjemstvach Fondu Harčakova i «Rassupracoŭnictva», aktyvisty ładziać mierapryjemstvy pa razdačy hieorhijeŭskich stužak, roznyja sieminary-dyjałohi «rasijskich suajčyńnikaŭ» dy inšaje.
Toj ža ž pryjezd čarnasocienskaha prapahandysta Starykava i inšych hastraloraŭ u Minsk i Mahiloŭ arhanizoŭvaŭ «Rumoł».
Słovam, ruch całkam vykonvaje dekłaravanuju metu pašyreńnia ruskaj kultury ŭ Biełarusi i stvareńnia «biezbarjernaj ruskamoŭnaj prastory».
Mienavita Łušč — asnoŭny ideołah i ruchavik «Rumoła», jon jaho i stvaryŭ na pačatku 2000-ch.
«Naša arhanizacyja ŭźnikła na bazie Biełaruskaha respublikanskaha hramadskaha abjadnańnia «Ruś» u 2004 hodzie i była jaho moładzievym kryłom. Pastupova kalektyŭ raźvivaŭsia i staviŭ pierad saboj novyja ambitnyja mety. U 2010 našaja arhanizacyja była aficyjna zarehistravanaja ŭ Ministerstvie justycyi Biełarusi», — raskazvaŭ sam Łušč vydańniu «Sajuz».
Jak farmiravalisia słavianafilskija pohlady Siarhieja Łušča?
Voś tut i pačynajecca samaje cikavaje.
Praz svaje krynicy «Naša Niva» zdabyła šakujučyja padrabiaznaści ideałahičnaj evalucyi kiraŭnika «Rumoła».
Hetaje fota zroblena ŭ 2007 hodzie — u lesie pad Minskam, vykinuŭšy ruki ŭ nacysckim vitańni, stajać udzielniki pahanskaj antysiemickaj siekty «Schoron Jež Słavien» — jany śviatkujuć viasielle pary svaich paplečnikaŭ (na fota źleva).
U jakaści hościaŭ zaprošanyja skinchiedy i siabry biełaruskaha adździaleńnia ekstremisckaj arhanizacyi «Nacyjanał-sacyjalistyčnaha adzinstva» (Rus — NSO).
Sam Łušč na vierchnim fota ŭ kadr nie trapiŭ, ale jon hałoŭny na hetym śviacie, heta pa jahonym zakliku ludzi «zihujuć» — jon «vołchv», jaki pravodzić abrad.
Voś jon nižej na tym ža śviacie, u siniaj vopratcy vałchva, lohka paznajucca «maładyja».
«Schoron Jež Słavien»
Što tam uvohule adbyvajecca? — spytajecie vy.
«Schoron Jež Słavien» — heta pahanska-nieanacyscka-antysiemickaja arhanizacyja, jakuju stvaryŭ i dahetul uznačalvaje «Narodny haspadar, žrec usich słavian, viarchoŭny vołchv usieja Rusi Uładzimir Bahumił II Halak, Jark Voŭk Schoron Jež Słovien Žreckaha vojska słavianskaha naroda» (Uładzimir Halakoŭ).
Siekta stvoranaja ŭ Rasii, ale maje svaje adździaleńni ŭ «Bieła Rusi», «Mała Rusi», «Čyrvona Rusi» i hetak dalej.
Ideałohija hruntujecca na niekalkich «śviatych» knihach, napisanych «Bahumiłam»: «Soncavarot», «Tryzna», «Społach»; i niasie tradycyjnyja dla nieanacysckich supołak na postsavieckaj prastory idei ab abranaści «słavianskaj nacyi» i škodnikach-žydach.
«Na słavianskaj ziamli tolki adzin narod — słavianie, astatnija — nami nie zabityja», — vytrymka z bahumiłaŭskaj «Razmovy Duchoŭnaha cara Usioj Rusi z žyda-chazarskimi prychvastniami».
Udzielniki siekty pakłaniajucca kamianiam, jakija palivajuć pivam ci kvasam, a taksama ŭtykajuć u svaje ałtary chałodnuju zbroju, što simvalizuje achviaraprynašeńnie.
Hałoŭny antahanist — «Čarnaboh», u samarobnyja idały jakoha ŭdzielniki siekty kidali nažy padčas abradaŭ.
Voś uzor «kapišča», pierad im staić Łušč (tvar byŭ zamazany aŭtaram fota). Fota bolš śviežaje, ź inšaha mierapryjemstva «Schoron Jež Słoviena» u 2009 hodzie.
Udzielniki rytuałaŭ nazyvajuć siabie «Słavienami» ad słoŭ «słava» i «viena»: maŭlaŭ, u ichnich vienach ciače kroŭ słaŭnych słavian.
Hetyja tłumačeńni, jak i inšyja detali abradaŭ i vopratki, vydumlaŭ «Bahumił Druhi», jaki vyvodzić svaju bijahrafiju ad niejkich «naŭharodskich vałchvoŭ XII stahodździa».
Svajoj metaj centralnaja rada «Schoron Jež Słaviena» nazyvaje ŭźjadnańnie «padzielenych słavianskich plamionaŭ» i zachop ułady, dakładniej, «mirny pierachod ułady ad niesłavianskaha kiravańnia ŭ našyja zakonnyja i prahnyja da ŭłady ruki. Ułada daść nam kostku, miasa, tłušč i mahčymaści».
Adepty siekty «Bahumiła» taksama vystupajuć suprać «dziasiatkaŭ stahodździaŭ juda-chryścijanskaj akupacyi». Na pytańnie, jak spałučałasia jahonaje «radnavierstva» z chryścijanskimi dohmami, Łušč «Našaj Nivie» nie adkazaŭ.
Aznajomicca z teoryjami vieščuna «Bahumiła» možna, pahladzieŭšy hetaje videa za 2011 hod — jon vystupaje ŭ adnoj ź biełaruskich škoł, dzie administracyja pa niedahladzie pradastaviła pamiaškańnie pad schodku jahonych adeptaŭ.
«Viarchoŭnaha vołchva» zaprasiła biełaruskaja filija arhanizacyi.
U pakazalnaj pramovie «vołchv» raskazvaje pra ŭładu «mienšaści» (habrejaŭ) nad «słavianskaj bolšaściu», nie adnojčy ŭskidaje pravuju ruku ŭ nacysckim vitańni, hukajučy słovy «Słava Rusi — śmierć nierusi! Słava rodu — śmierć urodam!» Z zały ŭsie jahonyja vokličy choram paŭtarajuć.
Taksama jak uzor — «abrad» «parušeńnia carstva Iŭdziejskaha».
A voś fota ź mierapryjemstva filijała «Schoron Jež Słoviena» u «Čyrvona Rusi».
Dadać štości ciažka, aproč taho, što znamiony padazrona nahadvajuć łahatyp «Rumoła» — padzieleny na čatyry častki romb z kropačkami; tolki što ŭ «Rumoła» hety simvał na čyrvonym, a nie čornym fonie.
Taksama nam udałosia zdabyć videa na paciechu hledačam, dzie «Bahumił II» i Siarhiej Łušč razam u kadry: «vołchv Viečasłaŭ» — takoje imia ŭ psieŭdapahanstvie ŭziaŭ sabie Łušč — trymaje za ruku svajho idejnaha načalnika, patresvajučy siakieraj «Pieruna».
«Bahumił» u hety momant zaklikaje «adsiakać ad siabie inarodnych».
Hetaje videa zroblena pad Minskam u 2012 hodzie, kali «Rumoł» užo daŭno dziejničaŭ.
Darečy, kab rukapakłaścisia ŭ «vałchva» «śviatoha vojska słavianskaha», treba było piersanalna źjeździć u Rasiju da «Bahumiła» i prajści navučańnie — hetak sam «vołchv usich słavian» apisaŭ nam praceduru.
My źviarnulisia da Siarhieja Łušča z prośbaj adkazać na pytańni «NN» adnosna jahonaj dziejnaści ŭ «Rumole» i siekcie «Schoron jež słavien», adnak jon admoviŭsia, spasłaŭšysia na zaniataść.
Asabliva ŭsprymajucca paśla hetaha supolnyja mierapryjemstvy «Rumoła» i Pravasłaŭnaj carkvy.
Pra ideałahičnyja pierakanańni byłych «prychadžan» Łušča, a ciapier aktyvistaŭ «Rumoła», taksama varta skazać paru słovaŭ z ulikam taho, što «Rumoł» — ruchavik roznych akcyj pamiaci da ŭhodkaŭ zakančeńnia Vialikaj Ajčynnaj vajny.
Voś zusim niadaŭniaje fota — chto paznaje ŭ hetym chłopcy, što abdymajecca z Łuščom i nosić stylizavanuju majku «88», razdatčyka hieorhijeŭskich stužak u Minsku?
Voś jašče adzin z kiraŭnikoŭ «Rumoła» na momant pieršych hadoŭ pracy arhanizacyi.
Voś jašče adzin paplečnik Łušča — «palityčny analityk «Rumoła» Siarhiej Śmirnoŭ razvažaje pra Hitlera ŭ kamientarach da fota na svajoj staroncy «UKantakcie»…
Darečy, sumnaviadomy «baciuška sa svastykaj» taksama braŭ udzieł u mierapryjemstvach «Rumoła», adno ź jakich razahnali fanaty futbolnaha kłuba «Partyzan».
Jak bačym, u arhanizacyju pa prasoŭvańni «ruskaha śvietu» sabralisia piersanažy ź niajasnymi, časam ekstremisckimi ideałami i kumirami.
Pry ŭsich namahańniach schavać svaje raniejšyja pryhody, jany nie ŭ stanie ścierci ŭsiaho.
Dziŭna, što asobnyja kiraŭniki dziaržaŭnych ŚMI dajuć trybunu takim ludziam.
Kamientary