Prezident Małdovy Ihar Dadon zajaviŭ, što na budynku rezidencyi kiraŭnika dziaržavy nadalej budzie visieć tolki ściah krainy. Pra heta jon skazaŭ 26 śniežnia ŭ efiry telekanała Pro TV.
«Zakanadaŭstva respubliki Małdova nie praduhledžvaje, što na dziaržaŭnych ustanovach pavinny łunać inšyja ściahi. U budučyni ŭ abaviazkovym paradku heta budzie tolki ściah krainy», — padkreśliŭ małdaŭski lidar.
Razam z tym jon adznačyŭ, što nie maje ničoha suprać Jeŭraźviaza. «My budziem praciahvać ź im partniorskija adnosiny, jany zastanucca dobrymi nadalej i buduć raźvivacca», — zapeŭniŭ Dadon.
Akramia taho, jon patłumačyŭ, čamu sajt prezidenta ciapier na małdaŭskaj movie, a nie na rumynskaj, jak heta było da jaho ŭstupleńnia na pasadu. «Prezident pavinien vykonvać zakony i Kanstytucyju, u jakoj vyrazna skazana, što dziaržaŭnaj movaj respubliki Małdova źjaŭlajecca małdaŭskaja. Ja pavažaju asnoŭny zakon, i tak budzie na praciahu ŭsiaho dziejańnia majho mandata», — paabiacaŭ Dadon.
Jon taksama raskrytykavaŭ niadaŭniaje rašeńnie Kanstytucyjnaha suda (KS) pryznać pryjarytetnaj Dekłaracyju ab niezaležnaści, u jakoj dziaržaŭnaj movaj nazvanaja rumynskaja. Pa słovach prezidenta Małdovy, Kanstytucyja maje pryjarytet pierad inšymi dakumientami, a z rašeńniem KS «jašče treba budzie razabracca».
26 śniežnia z budynku rezidencyi prezidenta Małdovy źniali ściah Jeŭrasajuza. Paźniej hrupa deputataŭ ad Libieralnaj partyi pasprabavała viarnuć simvał ES na budynak, nazvaŭšy jaho źniaćcie antykanstytucyjnym i niezakonnym, a taksama zajaviŭšy, što heta moža pryvieści da achaładžeńnia adnosin Kišyniova i Brusela.
Prezidenckija vybary ŭ Małdovie prajšli ŭ dva tury, 30 kastryčnika i 13 listapada, pieramohu atrymaŭ Ihar Dadon. Padčas pieradvybarčaj kampanii jon nie raz krytykavaŭ uziaty ŭradam respubliki kurs na ščylnuju intehracyju ź ES.
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary