MZS ab pryznačeńni Litvoj śpiecpasła pa BiełAES: Biełaruś — za kampietentny dyjałoh

«Biełaruś niaźmienna vystupaje za kampietentny dyjałoh pa ŭsich pytańniach budaŭnictva AES pa linii profilnych viedamstvaŭ», — zajaviŭ na bryfinhu 5 studzienia ŭ Minsku pres-sakratar MZS Dźmitryj Mirončyk, kamientujučy pryznačeńnie Litvoj śpiecyjalnaha pasła pa asobych daručeńniach pa pytańniach budaŭnictva Biełaruskaj AES.

Pry hetym Mirončyk padkreśliŭ, što na hety momant litoŭski bok aficyjna nie paviedamiŭ Biełarusi ab hetym pryznačeńni.

«Kali litoŭskamu boku dla najbolš efiektyŭnaha dyjałohu z nami patrabujecca śpiecyjalny kaardynatar ŭ MZS, to heta jaje prava, i heta možna tolki vitać. Kali hetaja pasada zasnavanaja tolki ŭ metach dalejšaj palityzacyi pytańnia i pieranosu dyskusii na mižnarodnyja placoŭki, jakija časta nie majuć nijakaha dačynieńnia ni da jadziernaj tematyki, ni da enierhietyki, ni da ekałohii, to ŭ hetym vypadku heta, chutčej, kontrpraduktyŭny zachad», — skazaŭ Mirončyk.

4 studzienia śpiecpasłom Litvy pa asablivych daručeńniach pa pytańniach budaŭnictva BiełAES byŭ pryznačany Darus Dehucis. Jon pracuje ŭ MZS Litvy z 1991 hoda. Byŭ pasłom u Polščy i Izraili, pracavaŭ u litoŭskich dypłamatyčnych pradstaŭnictvach u Danii i ZŠA. Zaraz jon budzie vykładać «sfarmavanuju pazicyju Litvy» pa Biełaruskaj AES u pytańniach jadziernaj biaśpieki i prablemach navakolnaha asiarodździa, sačyć za situacyjaj na nacyjanalnym, rehijanalnym i mižnarodnym uzroŭniach, a taksama spryjać kaardynacyi litoŭskich viedamstvaŭ. Akramia taho, śpiecpasoł budzie pradstaŭlać pazicyju Litvy pry supracoŭnictvie ź mižnarodnaj supolnaściu, abmieńvacca infarmacyjaj ź inšymi krainami, uradavymi i niaŭradavymi arhanizacyjami, parłamientami.

Rašeńnie ab pryznačeńni śpiecpasła pa pytańniach budaŭnictva Biełaruskaj AES było pryniataje 3 studzienia na sustrečy litoŭskich ministraŭ zamiežnych spraŭ, navakolnaha asiarodździa i enierhietyki, ale jaho imia nie nazyvali da padpisańnia ŭkaza.

Try ministry taksama nakiravali listy vysokapastaŭlenym pradstaŭnikam Jeŭrakamisii i dyrektaru Mižnarodnaha ahienctva pa atamnaj enierhii, u jakich źviartajuć uvahu na ŭžo šosty pa liku incydent, źviazany z budaŭnictvam AES u Astraŭcy (Hrodzienskaja vobłaść). Ministry prosiać zabiaśpiečyć kantrol hetych arhanizacyj nad realizacyjaj biełaruskaha prajekta. Litva ŭ listach vykazvaje pierakananaść u tym, što Biełaruś praciahnie niebiaśpiečnaje raźvićcio AES, jakaja budzie znachodzicca za 50 km ad Vilni, a kali prajekt i dalej budzie realizoŭvacca biez vykanańnia mižnarodnych patrabavańniaŭ biaśpieki, to jon budzie ŭjaŭlać pahrozu dla biaśpieki ŭsiaho rehijona.

Jak paviedamlałasia, viečaram 28 śniežnia na budaŭničuju placoŭku atamnaj stancyi dastavili z Rasii novy korpus reaktara dla AES. U darozie ź im adbyŭsia incydent. Pavodle infarmacyi administracyi BiełAES, 26 śniežnia padčas manieŭravańnia na stancyi Słaŭnaje zdaryłasia «niaznačnaje dakranańnie achoŭnaha mietaličnaha transpartnaha kažucha zvyšniehabarytnaha hruzu, što pieravoziŭsia, da apory kantaktnaj sietki». Pry hetym paškodžańniaŭ na korpusie reaktara nie vyjavili.

29 śniežnia MZS Litvy ŭručyła biełaruskamu pasłu Alaksandru Karalu notu z prośbaj terminova padać poŭnuju infarmacyju pra zdareńnie z novym korpusam reaktara dla BiełAES. Litoŭski bok vykazaŭ «vialikuju zakłapočanaść u suviazi z paŭtoram incydentaŭ na AES», ab jakich stanovicca viadoma nie z aficyjnych krynic, a sa ŚMI.

Litoŭskaje źniešniepalityčnaje viedamstva paprasiła adkaznych asob u Biełarusi «dbajnym čynam rasśledavać incydent i prainfarmavać Litvu, susiednija dziaržavy i MAHATE ab vynikach rasśledavańnia». MZS Litvy taksama znoŭ zapatrabavała ad Biełarusi terminova pravieści SEED-misiju MAHATE pa acency vybaru placoŭki budaŭnictva.

Ź pieršym reaktarnym korpusam dla BiełAES taksama zdaryŭsia incydent. 10 lipienia na budplacoŭcy stancyi padčas vyprabavalnaj trenirovačnaj ustanoŭki 330-tonny ahrehat sarvaŭsia i ŭpaŭ. Na patrabavańnie biełaruskaha boku Rasija pahadziłasia jaho zamianić.

Biełaruskaja AES budujecca pry ŭdziele Rasii pad Astraŭcom ŭ Hrodzienskaj vobłaści. Jana budzie składacca z dvuch enierhabłokaŭ sumarnaj elektryčnaj mahutnaściu da 2.400 miehavat. Dla jaje budaŭnictva vybrany prajekt AES-2006 — typavy rasijski prajekt atamnaj stancyi novaha pakaleńnia.

• 0
• 0
• 0
• 0
• 0
• 0