Stroj lelikaŭskaj svaćci z Kobrynskaha rajona pretenduje na ŭklučeńnie ŭ Dziaržaŭny śpis historyka-kulturnych kaštoŭnaściej Biełarusi, paviedamili BiełTA ŭ hałoŭnym upraŭleńni ideałahičnaj raboty, kultury i pa spravach moładzi Bresckaha abłvykankama.
Staradaŭni žanočy stroj byŭ raspaŭsiudžany ŭ vioskach Lelikava i Pavićcie Kobrynskaha, a taksama Radastava Drahičynskaha rajonaŭ. Tradycyi jaho stvareńnia zachavalisia da našych dzion.
Stroj svaćci apranaŭsia tolki ŭ čas viasiellaŭ. Charakternaj asablivaściu hetaha ŭboru źjaŭlajucca arnamientalnyja elemienty ŭ vyhladzie vačej, jakija našyvalisia na saročku, spadnicu i fartuch svaćci. Akramia taho, stroj dapaŭniaje niezvyčajny hałaŭny ŭbor — kakošnik, upryhožany roznakalarovymi pieŭnievymi piorami.
«Svaćcia adyhryvała asablivuju rolu na viasielli. Jana kiravała ŭsim pracesam, pavinna była dobra viedać viasielny abrad i ŭsio bačyć — adsiul «vočy» na kaściumie, — raskazała zahadčyca aŭtakłuba Kobrynskaj rajonnaj kłubnaj sistemy Volha Pjancava. — Svaćciaŭ na viasielli pavinna było być nie mienš za piać-siem. A samyja bahatyja žanichi zaprašali da 15 svaćciaŭ. Jany viedali mnostva piesień, prypievak, častušak i ŭciahvali ŭ viasielny vodavarot usich haściej».
U svoj čas u vioskach Lelikava i Pavićcie ŭbor svaćci byŭ praktyčna ŭ kožnaj žančyny. U pryvatnych kalekcyjach zachavalisia aryhinalnyja kamplekty hetaha adzieńnia. U apošnija hady tradycyju vykarystańnia stroju svaćci stali adradžać na sučasnych viasiellach. Pry hetym varyjanty aŭtentyčnaha ŭboru jaho nośbity šyjuć sami z fabryčnaj tkaniny.
«My ŭžo niekalki hadoŭ pracujem nad hetaj temaj. Kansultacyjnuju i mietadyčnuju dapamohu ŭ padrychtoŭcy adpaviednych dakumientaŭ nam akazali ŭ adździele mietadyčnaha zabieśpiačeńnia dziejnaści pa achovie historyka-kulturnaj spadčyny instytuta kultury Biełarusi. Stvorany dakumientalny film, sabrany dadatkovyja materyjały, jość kalektyŭnaje piśmo ad žycharoŭ vioski Lelikava za nadańnie stroju svaćci statusu pomnika materyjalnaj i duchoŭnaj spadčyny nacyi. Ciapier idzie zbor podpisaŭ u vioscy Pavićcie», — paviedamiła Volha Pjancava.
Materyjały z chadajnictvam ab uklučeńni ŭ Dziaržaŭny śpis historyka-kulturnych kaštoŭnaściej Biełarusi stroju lelikaŭskaj svaćci płanujecca nakiravać na razhlad Biełaruskaj respublikanskaj navukova-mietadyčnaj rady pa pytańniach historyka-kulturnaj spadčyny pry Ministerstvie kultury.
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony10
Kamientary