U Homieli aktyvist «hučna łajaŭsia matam». Choć paśla ankałohii ledź razmaŭlaje šeptam

U sudzie Homielskaha rajonu 4 krasavika razhladałasia administracyjnaja sprava ŭ dačynieńni da rehijanalnaha pradstaŭnika Biełaruskaha niezaležnaha prafsajuzu REP Viktara Kazłova za «drobnaje chulihanstva».

Pavialičyć

Amapaŭcy zatrymali Kazłova ŭranku 25 sakavika ŭ vioscy Ciareškavičy, kali jon vypraŭlaŭsia jechać u Homiel, kab udzielničać u «Maršy niedarmajedaŭ — 2». Zavieźli ŭ rajadździeł, adtul jaho preventyŭna adpravili ŭ izalatar, dzie jon dvoje sutak pravioŭ za kratami. Amapaŭcy ŭ svaich rapartach napisali, što, maŭlaŭ, jany 25 sakavika achoŭvali hramadzki paradak, a Kazłoŭ brydka łajaŭsia na vulicy, na zaŭvahi nie reahavaŭ, sprabavaŭ uciačy, chapaŭsia za formu.

Sudździa Tamara Zastaŭnieckaja dapytała najpierš u jakaści śviedki miascovaha žychara Viktara Tamašova, jaki razmaŭlaŭ na vulicy z Kazłovym, kali ich padrezaŭ amapaŭski UAZik. Kazłova schapili i zapichnuli ŭ mašynu.

«Ja moža dva kroki zrabiŭ, jak milicejskaja mašyna z Kazłovym adjechała. Takoje tolki ŭ kino pa televizary bačyŭ», — raspavioŭ sudu śviedka.

Paśla hetaha troje amapaŭcaŭ adzin za adnym pačali raspaviadać, jak jany nieśli słužbu pa achovie hramadzkaha paradku ŭ ahraharadku Ciareškavičy. Maŭlaŭ, jechali pa vulicy z chutkaściu nia bolš za 20 kilametraŭ, kali pačuli, što Kazłoŭ «hučna kryčaŭ, łajaŭsia matam». Jany spynilisia, papiaredžvali, ale Kazłoŭ na zaŭvahi nie reahavaŭ.

Viktar Kazłoŭ pradstaviŭ sudu daviedki z ankalahičnaha centru, što jamu vydalili paŭlohkaha. Jon patłumačyŭ, što naahuł nia moža kryčać i što razmaŭlaje ledź nia šeptam.

Sami amapaŭcy, darečy, nazyvali svaje proźviščy nadzvyčaj cicha, havaryli nievyrazna. Mnohija prysutnyja nie mahli razabrać, pra što havorka.

Sudździa Zastaŭnieckaja rabiła zaŭvahi i navat vydaliła dvuch čałaviek z sudovaha pasiedžańnia, jakija pryjšli padtrymać Viktara Kazłova. Ale kali j kamandzir hrupy Siardziuk pačaŭ ledź čutna vymaŭlać svajo proźvišča, prysutny ŭ zale piensijanier Uładzimier Kacora paraiŭ: «Kažy hučniej: «Paskudaŭ Paskuda Paskudavič» — ustaŭ i vyjšaŭ z zali.

Sudździa Zastaŭnieckaja abviaściła pierapynak, vyjšła ŭ kalidor i zahadała milicyjantu na vachcie nie vypuskać Kacoru. Pierapyniŭšy razhlad administracyjnaj spravy pra chulihanstva Viktara Kazłova, sudździa tut ža raspačała administracyjny praces u dačynieńni da Ŭładzimiera Kacory za niepavahu da sudu.

I litaralna praz try chviliny prahučaŭ vyrak: štraf Kacoru pamieram 10 bazavych vieličyniaŭ, albo 230 rubloŭ.

«Ciapier budu viedać, kolki kaštuje skazać u sudzie praŭdu, — padsumavaŭ palityk. — Ja sam užo nia raz traplaŭ na taki kanvejer, kali mianty sami chapajuć, sami łžeśviedčać. Ja aburyŭsia, vykazaŭ takim čynam svoj pratest. Naŭprost nazvaŭ rečy svaimi imionami. Biełaruś Alaksandar Łukašenka i sapraŭdy za cyvilizavanym śvietam nie viadzie».

Što da administracyjnaj spravy Viktara Kazłova, to sudździa Zastaŭnieckaja abviaściła pierapynak, kab atrymać adkaz ad orhanaŭ unutranych spraŭ, na padstavie jakoha rasparadžeńnia hrupa AMAPaŭcaŭ apynułasia ŭranku 25 sakavika ŭ ahraharadku Ciareškavičy, što za 20 kilametraŭ ad Homiela.

• 0
• 0
• 0
• 0
• 0
• 0
• 0
• 0