«Troli-olhincy»: błohiera Palčysa zabłakavali ŭ fejsbuku ŭ čaćviorty raz
Akaŭnt u fejsbuku viadomaha błohiera Eduarda Palčysa (Džona Silviera) hetymi dniami byŭ zabłakavany ŭžo ŭ čaćviorty raz. Pryčynaj staŭ post pra adyjoznaha piersanaža Viačasłava Safronava, viadomaha svaimi prarasijskimi i antysiemickimi vykazvańniami.
«Vyhladaje, što Safronaŭ ź siabrami, u ich jość takaja hrupoŭka «vatnikaŭ», dasyłali zapyty pra majo błakavańnie», — kaža Palčys.
U vyniku akaŭnt praź nievialiki pramiežak času adnavili, ale ź jaho źnik dopis pra Safronava.
Eduard raskazvaje, što heta ŭžo daloka nie pieršy padobny vypadak, jaki zdarajecca ź im.
«Moj pieršy akaŭnt u fejsbuku byŭ ananimny, jak «Džon Silvier», jon praisnavaŭ paŭtara hoda. Kali ja znachodziŭsia ŭ SIZA, to jaho zabłakavali pa masavych skarhach trolaŭ-olhincaŭ», — raskazvaje błohier.
Užo pa vyzvaleńni Palčys stvaryŭ rachunak na sapraŭdnaje imia. Ale jon pratrymaŭsia ŭvohule ŭsiaho tolki try hadziny. Heta było 7 listapada letaś, tady Eduard Palčys napisaŭ post pra Kliševiča, funkcyjaniera BRSM, jaki napaŭ na maładafrontaŭca Źmitra Daškieviča padčas adkryćcia pomnika Lenina na MTZ.
«U BRSM jość mini-sietka botkaŭ, jakija, vidać, skardzilisia na moj dopis», — vykazvaje zdahadku błohier.
Treci akaŭnt isnavaŭ 7 miesiacaŭ. I jon byŭ zabłakavany ŭ mai sioleta biez nazyvańnia pryčyn.
Jak paźbiehnuć takoha? «Samy lepšy sposab — vieryfikavać akaŭnt, ale heta praściej zrabić na Zachadzie, čym u nas. Kali ž taki varyjant nie prachodzić, to treba vielmi aściarožna stavicca da taho, što pišaš, nie dazvalać nijakich abrazaŭ», — skazaŭ Eduard Palčys.
Pryčym, jak kaža błohier, padobnych prablem z akaŭntami Ukantakcie ci Tvitary ŭ jaho nikoli nie ŭźnikała.
Eduard Palčys — stvaralnik sajta 1863x.com. U kastryčniku minułaha hoda jon byŭ asudžany da 1 hoda i 9 miesiacaŭ «chatniaj chimii» pa abvinavačvańni ŭ raspalvańni varožaści pa prykmiecie rasavaj, nacyjanalnaj, relihijnaj, moŭnaj ci inšaj sacyjalnaj prynaležnaści (č. 1 art. 130), a taksama vyrabie i raspaŭsiudzie parnahrafičnych materyjałaŭ (art. 343 KK).
Kamientary