Biełarusy buduć zajazdžać pa śpiecyjalnym propusku ŭ pahranzonu z boku Rasii z 1 kastryčnika
Z 1 kastryčnika biełarusam, kab patrapić u pryhraničnuju zonu z boku Rasii, treba budzie atrymać śpiecyjalny propusk. Dakumient vydajecca na hod.
3 lipienia na sajcie Fiederalnaha partała prajektaŭ narmatyŭnych pravavych aktaŭ byŭ apublikavany prajekt ukaza, jaki tyčycca novych praviłaŭ režymu ŭ pamiežnaj zonie Rasii, piša Tut.by.
U dakumiencie skazana, što novaŭviadzieńni datyčacca piacikiłamietrovaj pamiežnaj zony na miažy Biełarusi i Rasii i ŭstupajuć u siłu z 1 kastryčnika 2017 hoda. Z hetaj daty biełarusy buduć ŭjazdžać u pahranzonu pa śpiecyjalnym propusku i dakumiencie, jaki paćviardžaje asobu. Praciahłaść znachodžańnia budzie ŭkazanaja ŭ propusku, akramia taho, čałaviek moža znachodzicca tolki ŭ tym miescy, jakoje paznačana ŭ dakumiencie. Heta značyć, jon nie maje prava adchilicca ad maršrutu.
Kali biełaruski aŭtamabil jedzie tranzitam praź miažu RF, to budzie dazvoleny vymušany prypynak, kab kiroŭca moh schadzić u kafe abo zapravić aŭto.
Jak tolki praviły ŭstupiać u zakonnuju siłu, biełarus užo nie zmoža prosta tak źjeździć u hości da svajakoŭ, jakija žyvuć u pamiežnaj zonie RF. Dla pačatku jamu nieabchodna budzie dabracca da Smalenska (kala 50 kiłamietraŭ ad miažy, napisać zajavu na propusk u FSB ci pakinuć zapoŭnieny błank na bližejšym pamiežnym punkcie. Ale pa sam propusk pryjdziecca ŭžo jechać u Smalensk.
«Pry niemahčymaści svoječasova pakinuć miežy pamiežnaj zony z pryčyny abstavin niepieraadolnaj siły dapuskajecca znachodžańnie hramadzian u miežach miescaŭ ich časovaha znachodžańnia da zakančeńnia nazvanych abstavin pry ŭmovie paviedamleńnia ab takich abstavinach pahraničnamu orhanu abo bližejšamu padraździaleńniu pamiežnaha orhana, dakumientalnaha i inšaha dakładnaha ich paćvierdžańnia», — havorycca ŭ dakumiencie.
Kamientary