Ukrainskija dypłamaty robiać usio mahčymaje, kab vyśvietlić miescaznachodžańnie źnikłaha ŭ Homieli Paŭła Hryba, niahledziačy na adsutnaść naležnaha ŭzroŭniu supracoŭnictva ź biełaruskaha boku. Pra heta ŭ intervju «5 kanału» zajaviła namieśnik ministra zamiežnych spraŭ Alena Zierkal, piša Tut.by.
«My sprabujem vyśvietlić situacyju (sa źnikłym Paŭłam Hrybam). I naohuł zrabić usio mahčymaje dla taho, kab źmianić hetuju situacyju. Viadoma, skazać, što biełarusy supracoŭničajuć tak, jak treba, my, na žal, nie možam, — skazała Zierkal. — My padniali ŭsich konsułaŭ, usie pracujuć, i ŭsie sprabujuć vyśvietlić situacyju. My nie razumiejem, dzie faktyčna, fizična jon znachodzicca».
Taksama Alena Zierkal zajaviła, što «Biełaruś na słovach pavodzić siabie jak partnior, a nasamreč dziejničaje zusim inakš».
«Nasamreč da Biełarusi, mnie zdajecca značna bolš pytańniaŭ, čym adkazaŭ ciapier. U pryvatnaści, naprykład toje ža ŭstupleńnie Biełarusi ŭ Suśvietnuju handlovuju arhanizacyju. Ci budziem my padtrymlivać Biełaruś u hetym ustupleńni, z pryčyny naprykład taho, što Biełaruś — heta apošniaja kraina Jeŭraazijackaha ekanamičnaha sajuza, jakaja ŭstupaje ŭ SHA. I što budzie, jakija buduć nastupstvy hetaha ŭstupleńnia? Ci my ŭsio ž budziem hladzieć na svaje intaresy, i naviazvać užo Biełarusi, praź Biełaruś JEAES svaje intaresy, uklučajučy tranzit, uklučajučy ŭsie zabarony, uklučajučy ŭsie licenzii i ŭsie astatnija pytańni, a taksama, viadoma, vyrašajučy pytańni i ŭjezdu hramadzian Ukrainy, i biaśpieki hramadzian Ukrainy ŭ Biełarusi. I ŭsie budziem vyrašać kompleksna», — zajaviła namieśnik kiraŭnika MZS Ukrainy.
Nahadajem, pra źniknieńnie 19-hadovaha ŭkrainca stała viadoma 28 žniŭnia. Pavieł Hryb pajechaŭ u Homiel na sustreču z rasijankaj, ź jakoj paznajomiŭsia ŭ internecie. Mierkavanaja dziaŭčyna Paŭła paviedamiła, što nie bačyła, kab padčas sustrečy maładoha čałavieka chtości zatrymlivaŭ. Adnak dadomu Pavieł nie viarnuŭsia, i jaho baćka Ihar Hryb pajechaŭ u Homiel, kab vyśvietlić miescaznachodžańnie syna. Tam jamu nieaficyjna paviedamili, što Pavieł znachodzicca ŭ vyšuku pa art. 205 KK RF (Terakt) pa zapycie FSB Krasnadarskaha kraja. U ŚMI pačała źjaŭlacca infarmacyja, što Pavieł Hryb užo ŭ Rasii, ale hetaja infarmacyja pakul nie paćvierdžanaja.
Čarnihaŭskaja prakuratura 29 žniŭnia paviedamiła ab zaviadzieńni kryminalnaj spravy pa fakcie źniknieńnia Paŭła Hryba. Mierkavanaja dziaŭčyna, ź jakoj źnikły Pavieł sustrakaŭsia ŭ Homieli, u intervju biełaruskim žurnalistam pryznałasia, što sustreča adbyłasia ź inicyjatyvy FSB.
Ciapier čytajuć
Analityk Hienštaba, jaki malavaŭ kartu «adkul rychtavałasia napadzieńnie», apynuŭsia ŭ SIZA KDB za pracu na ŭkrainskuju raźviedku7
Kamientary