Z 31 žniŭnia Dziaržaŭny litaraturny muziej Janki Kupały zaprašaje na vystavu «Kuźnia biełaruskaha duchu».
Upieršyniu ŭ Biełarusi buduć pradstaŭleny ŭnikalnyja materyjały z historyi biełaruskaha školnictva sa zboraŭ Hramadskaj arhanizacyi «Biełaruski muziej imia Ivana Łuckieviča» (Vilnius, Litva) i Dziaržaŭnaha litaraturnaha muzieja Janki Kupały. Realizacyja prajekta stała mahčymaj dziakujučy Pasolstvu Litoŭskaj Respubliki ŭ Respublicy Biełaruś.
Vystava prapanoŭvaje retraśpiektyŭny pohlad na historyju Vilenskaj biełaruskaj himnazii — centra biełaruskaha školnictva 1920-30-ch hadoŭ, na ŭzor jakoha stvaralisia himnazii na tahačasnych abšarach Zachodniaj Biełarusi: Navahradku, Radaškovičach, Klecku. U 1920 i 1941 hodzie pačesnym hościem vučniaŭ Vilenskaj biełaruskaj himnazii byŭ Janka Kupała.
Asoba i Słova Pieśniara byli dla moładzi ŭzoram žyćcia dziela svajoj Radzimy, jaho paetyčnyja radki stalisia nacyjanalnym himnam dla biełaruskich himnazistaŭ:
Nie zahasnuć zorki ŭ niebie,
Poki nieba budzie, —
Nie zahinie kraj zabrany,
Poki buduć ludzi.
Vystavačny prajekt «Kuźnia biełaruskaha duchu» skiravany na vyvučeńnie i pierajmańnie najlepšych tradycyj biełaruskaha školnictva — spaznańnia spadčyny prodkaŭ i suśvietnaj kultury na svajoj rodnaj movie. Bo nacyjanalnaja aśvieta — krajevuholny kamień budaŭnictva dziaržaŭnaści Biełarusi.
Interaktyŭnaja prahrama vystavy daść mahčymaść aznajomicca z rarytetnymi vydańniami 1920—30-ch hadoŭ: tvorami Daniela Defo, Marka Tviena, Vitala Bijanki pa-biełarusku. Možna budzie adčuć siabie vučniem Vilenskaj biełaruskaj himnazii: paznajomicca z vučebnaj prahramaj, pahartać vučnioŭskija sšytki i narešcie pravieryć svaju kiemlivaść — vykanać zadańni taho času.
Vystavačny prajekt skiravany na naviedvalnikaŭ roznych katehoryj, i ŭ pieršuju čarhu dla vučnioŭskaj moładzi.
Dla arhanizavanych hrup pry papiarednim zapisie mohuć być praviedzieny tematyčnyja interaktyŭnyja ekskursii.
Naviedać vystavu možna da 27 vieraśnia 2017 hoda.
Ciapier čytajuć
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam4
Kamientary