Hałoŭnym «zabojcam» ludziej źjaŭlajecca nie VIČ, virus šalenstva abo malaryja, a roznyja štamy virusa hiepatytu, jakija štohod zabirajuć žyćci bolš za 1,3 młn čałaviek, havorycca ŭ artykule, apublikavanym u časopisie Lancet. Koratka pra daśledavańni piša RIAN.
«Hetyja vysnovy vyklikajuć u nas złość, ale my zusim nie ździvilisia tamu, što hiepatyt hubić bolš ludziej, čym VIČ, malaryja i suchoty. Padobny sumny chod padziej źviazany z tym, što baraćba z hiepatytam nikoli nie ŭvachodziła ŭ palityčnyja pryjarytety ŭsich viadučych krain śvietu i što nie isnuje niejkich hłabalnych sistem dla finansavańnia padobnych prajektaŭ», — prakamientavaŭ adkryćcio Čarlz Hor, prezident Suśvietnaha aljansu pa baraćbie z hiepatytam.
Kožny hod SAAZ i inšyja słužby achovy zdaroŭja AAN publikujuć u časopisie Lancet spravazdačy, pryśviečanyja tamu, jakija chvaroby i prablemy sa zdaroŭjem siońnia turbujuć čałaviectva i kolki hadoŭ žyćcia jany adymajuć. Spravazdačy słužać svojeasablivyj instrukcyjaj da dziejańnia dla palityčnych orhanaŭ AAN i prahram pa achovie zdaroŭja słužbaŭ asobnych krain.
Sioleta aŭtary zrabili ŭpor nie na chvaroby, sparodžanyja prablemami ŭ pracy arhanizma samoha čałavieka abo drennymi ŭmovami žyćcia, a na roznyja virusnyja, bakteryjalnyja i parazityčnyja infiekcyi. Dla składańnia karciny ich evalucyi za apošnija 40 hadoŭ navukoŭcy sabrali i praanalizavali miedycynskija archivy z 147 krain śvietu.
Na dolu infiekcyj u siarednim prypadaje prykładna 19,4% śmierciaŭ, jakija adbylisia za hetyja hady, i ich ahulnaja kolkaść pastupova raście. Navukoŭcy źviazvajuć heta z paharšeńniem standartaŭ achovy zdaroŭja i rezkim rostam nasielnictva ŭ krainach, jakija raźvivajucca.
U lidarach, da niekatoraha ździŭleńnia samich aŭtaraŭ spravazdačy, akazaŭsia virusny hiepatyt — u apošnija hady jon zabraŭ žyćci prykładna 1,34 miljona ludziej. Pryčynaj ich śmierci była nie tolki sama chvaroba, ale i źviazanyja ź joj cyroz i rak piečani, a taksama inšyja ŭskładnieńni. Druhoje miesca zaniali suchoty z 1,2 miljona śmierciaŭ, treciaje — VIČ, jaki zabiŭ prykładna miljon čałaviek, a čaćviortaje — malaryja (719 tysiač achviar).
Padobnyja ličby, jak adznačajuć miedyki, źjaŭlajucca dosyć kansiervatyŭnymi acenkami, bo tolki 25 krain pradastaŭlajuć dastatkova dakładnuju statystyku pa pryčynach śmierci ich žycharoŭ. Adpaviedna, realnaja kolkaść achviar VIČ, hiepatytu i inšych chvarob moža być prykmietna bolšaj.
Hiepatyt niebiaśpiečny tym, što kolkaść vyklikanych im śmierciaŭ nie źmienšyłasia za apošnija hady, jak heta adbyłosia ź VIČ, tubierkulozam i malaryjaj, a vyrasła na 22%.
Adnoj z pryčyn hetaha, akramia niedachopu ŭ finansavańni i darahoŭli vakcyn i lekaŭ ad hiepatytu, źjaŭlajecca toje, što bolšaść ludziej nie padazraje, što jany zaražanyja hetym virusam. Pavodle biahučych acenak daśledčykaŭ, tolki 5% žycharoŭ raźvitych i jakija raźvivajucca krain viedaje ab svaim dyjahnazie i prachodzić lačeńnie ŭ miedycynskich ustanovach.
Što cikava, samym «raskručanym», ale nie niebiaśpiečnym uzbudžalnikam chvarob staŭ virus Zika — na jaho dolu prypadaje ŭsiaho dźvie śmierci ŭ 2015 hodzie i 19 stračanych žyćciaŭ ŭ 2016 hodzie. Jak čakajuć navukoŭcy, padobny trend zachavajecca i ŭ dalejšym, pry hetym virus Zika naŭrad ci budzie ŭjaŭlać značnuju pahrozu, što daść navukoŭcam čas na stvareńnie vakcyny dla baraćby ź im.
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary