Pradziaržaŭny kamunist Atamanaŭ u efiry ANT: «My z Rasijaj — adzin narod. Ale Pucin što, zbajaŭsia pryjechać na vučeńni?»

Na telekanale ANT vyjšaŭ novy vypusk pieradačy «Naša žyćcio» ź viadučym Dźmitryjem Bačkovym. Na hety raz pieradača była pryśviečanaja zakančeńniu vučeńniaŭ «Zachad-2017».

My ŭžo adznačali, što Bačkoŭ nie nadta achvotna šukaje novych haściej u svaje pieradačy. Tyja samyja asoby, jakija prychodzili da viadučaha jašče na «Biełaruś-1», pierakačavali i ŭ novy prajekt.

Admietnaściu pieradačy stała toje, što hości byli zaprašanyja ŭ roŭnaj praporcyi, jak tyja, chto abaraniaŭ vučeńni, hetak i pradstaŭniki niezaležnaha hramadstva. Apošnich pradstaŭlali namieśnik staršyni Partyi BNF Ryhor Kastusioŭ, palitołah Valeryj Karbalevič, vajskovy ahladalnik Alaksandr Alesin, pradstaŭnik «Libieralnaha kłuba» Vadzim Mažejka, a taksama kaardynatar «Havary praŭdu» Siarhiej Vaźniak.

Viadučy Dźmitryj Bačkoŭ zajaviŭ, što dla niekatorych treba pravodzić sapraŭdny psichaanaliz. «Rassłabciesia, usio, vučeńni skončanyja», — skazaŭ jon. Navat demanstravalisia kadry taho, jak rasijskija tanki pakidajuć terytoryju Biełarusi. Vadzim Mažejka nie prapuściŭ mahčymaść padkałoć viadučaha. Maŭlaŭ, hetki sajuźnik, što my supakojvajem, jak jahonyja vojski pakidajuć Biełaruś.

Pradstaŭnik aficyjnaj Kamunistyčnaj partyi Biełarusi Hieorhij Atamanaŭ tradycyjna nie padbiraŭ słovaŭ: «Kudy ni suniešsia — paŭsiul NATO! I jany jašče buduć šumieć, što my pravodzim vučeńni. My pavinny prosta abaraniacca i rychtavacca da toj situacyi, jakaja, nie daj boh, moža zdarycca».

Pavialičyć

I Vaźniak, i Karbalevič, i Mažejka havaryli pra toje, što pavyšanaja napružanaść adnosna vučeńniaŭ tłumačycca vielmi prosta — anieksijaj Kryma. Na heta Atamanaŭ zakryčaŭ na Mažejku: «Zamaŭčy! My nie abaroncy Rasii, my abaroncy Biełarusi. U armiju idzi pasłužy!»

U efir byŭ zaprošany načalnik Departamienta mižnarodnaha vajskovaha supracoŭnictva — pamočnik ministra abarony Aleh Voinaŭ. Viadučy spytaŭ u jaho, dyk chto naš patencyjny praciŭnik? «Naš praciŭnik — heta destabilizacyja abstanoŭki. Tyja ludzi, jakija sprabujuć raskačać abstanoŭku: i sa zbrojaj u rukach, i infarmacyjna. My imknulisia pakazać narodu, što jość armija, jakaja zdolnaja abaranić jaho», — byŭ abciakalny adkaz pradstaŭnika Minabarony.

Ryhor Kastusioŭ sprabavaŭ danieści, što Biełaruś prajhrała infarmacyjnuju vajnu Rasii: «Hałoŭny fejk — uviadzieńnie rasijskaj tankavaj armii ŭ Biełaruś». Aleh Voinaŭ rašuča nie pahadziŭsia z hetym, jak dokaz advarotnaha jon pryvioŭ prykład, što Minabarony štodzień ładziła bryfinhi z tłumačeńniem situacyi.

Palitołah Valeryj Karbalevič ličyć, što praviadzieńniem vučeńniaŭ Biełaruś pierakreśliła ŭsie namahańni Ministerstva zamiežnych spravaŭ, jakoje vypracoŭvała imidž Biełarusi jak miratvorcy ŭ rehijonie. «Pasiarednik nie moža być sajuźnikam ahresara», — vielmi rašuča adrezaŭ Karbalevič.

Pavialičyć

Cikava, što pytańnie, čamu ŭ Biełaruś nie pryjechaŭ prezident Rasii Uładzimir Pucin uźnikła nie tolki ŭ niedziaržaŭnych ekśpiertaŭ. Tym ža samym zadavaŭsia kamunist Atamanaŭ: «Čamu nie prylacieŭ siudy hałoŭnakamandujučy rasijskimi ŭzbrojenymi siłami? Heta pytańnie cikavaje, jano chvaluje mnohich biełarusaŭ. Mnie jak aficeru niezrazumieła, čamu padpałkoŭnik ci to zbajaŭsia, ci to što, ale nie pryjechaŭ siudy. Druhi momant — heta palityčnaja reŭnaść. Ale čym heta skončycca? My — adziny narod, my stahodździami žyli razam, tamu my nie možam asobna ładzić vučeńni. My pavinny navučycca abaraniać svoj dom, maci, padjezd». Darečy, Hieorhij Atamanaŭ naradziŭsia ŭ 1950 hodzie ŭ Rasii.

Zrešty, Aleh Hajdukievič i Alaksiej Dzierman usialak sprabavali davieści, što nijakich supiarečnaściaŭ miž Rasijaj i Biełaruśsiu niama, a kiraŭniki krain nie sustrelisia na vučeńniach z abjektyŭnych pryčyn.

• 0
• 0
• 0
• 0
• 0
• 0
• 0
• 0