U FRH ustupiŭ u siłu zakon ab «šlubie dla ŭsich». Pieršaja cyrymonija rehistracyi prajšła ŭ ratušy bierlinskaha rajona Šeniebierh.
U FRH u niadzielu, 1 kastryčnika, upieršyniu zarehistravany adnapoły šlub. Paśviedčańnie ab zaklučeńni šlubnaha sajuza ŭ ratušy bierlinskaha rajona Šeniebierh atrymali 60-hadovy Boda Miendzi i 59-hadovy Karł Krajl, paviedamlaje Deutsche Welle.
Jany pražyli razam 38 hadoŭ i 19 kastryčnika 2002 hoda — taksama pieršymi ŭ Bierlinie — ŭzakonili hramadzianskaje partniorstva.
Na mierapryjemstvie, što adznačyła saboj ŭstupleńnie ŭ siłu pryniataha ŭ hetym hodzie zakona ab «šlubie dla ŭsich», prysutničali kala sta siabroŭ i svajakoŭ pary.
U niadzielu ŭ stalicy Hiermanii dla adnapołych par taksama byli adkryty ZAHSy akruhaŭ Tempielchof-Šeniebierh i Frydrychschajn-Krojcbierh. Pra svaje płany ŭ hety dzień aformić šlub zajavili ŭsiaho dzieviać par.
Tak, ab znamianalnaj padziei ŭ Twitter paviedamiŭ deputat bundestaha ad partyi «Sajuz-90» / «zialonyja» Folkier Biek, supravadziŭšy zapis chešteham #ehefueralle (# šlub dla ŭsich). Jon uzakoniŭ šlubny sajuz z Adryjanam Pietkavym.
***
Zakonaprajekt, jaki praduhledžvaje poŭnaje i raŭnapraŭnaje pryznańnie adnapołych šlubaŭ, jaki atrymaŭ u FRH nazvu zakona ab «šlubie dla ŭsich» byŭ pryniaty bolšaściu hałasoŭ deputataŭ bundestaha 30 červienia. Za prahałasavali 393 parłamientaryja, suprać - 226, čaćviora - ustrymalisia.
Pry hetym fiederalny kancler Niamieččyny Anhieła Mierkiel prahałasavała suprać pryniaćcia zakonaprajekta. «Dla mianie šlub, pavodle Asnoŭnaha zakona, heta sajuz mužčyny i žančyny, - patłumačyła svaju pazicyju paśla hałasavańnia kancler. - I tamu siońnia ja nie hałasavała za hety zakonaprajekt».
Da 1969 hoda homaseksualnyja suviazi ŭ Hiermanii kryminalna pieraśledavalisia. Adnapołyja sajuzy rehistrujuć u Hiermanii z 2001 hoda.
Kamientary