Francyja nie pryznaje Katałoniju jak asobnuju dziaržavu ŭ vypadku adnabakovaha abviaščeńnia svajoj niezaležnaści. Pra heta zajaviła francuzski ministr pa jeŭrapiejskich spravach, paviedamlaje Radyjo Polšča.
Pa słovach Natali Łuazo, vyniki refierendumu ab niezaležnaści Katałonii, jaki Jeŭrapiejski sajuz pryznaŭ niezakonnym, nie mohuć vyznačać status rehijonu.
«Kryzis pavinien być vyrašany z dapamohaj dyjałohu na ŭsich uzroŭniach ispanskaj palityki», — padkreśliła Natali Łuazo. Jana taksama papiaredziła, što ŭ vypadku, kali Katałonija abvieścić ab niezaležnaści, jana pavinna budzie adrazu ž vyjści ź ES.
Varta adznačyć, što častka katałonskich ziemlaŭ — Paŭnočnaja Katałonija — uvachodzić u skład Francyi.
Nahadajem, raniej kiraŭnik katałonskaha ŭrada zajaviŭ, što ŭłady rehijonu majuć namier abviaścić niezaležnaść. Karles Pučdemon taksama abvinavaciŭ aficyjny Madryd u niežadańni iści na kampramis.
Kamientary