«Kali dzieci sprabujuć tkać na krosnach, ich za vušy nie adciahnuć» — zapisvajcie svaich

«My asvojvajem tradycyjnyja techniki. To bok habieleny my nie robim, a bolš zasiarodžanyja na tradycyjnych biełaruskich tkaninach, — tłumačyć Natalla. — Nasamreč, heta cikavy i niezvyčajny zaniatak.

Ja ŭžo z praktyki bačyła, što kali prosta zaprašaješ dziaciej na tkactva, to jany nie duža razumiejuć, što heta takoje, i asabliva nie reahujuć. Ale kali jany traplajuć da nas u majsterniu, dzie ŭ nas stajać staradaŭnija aŭtentyčnyja krosny, im usim stanovicca vielmi cikava. I kali ŭžo jany sprabujuć na ich tkać, to, kaniešnie, ich za vušy nie adciahnuć».

Natalla kaža, što najpierš zaniatki tkactvam raźvivajuć usiedlivaść i ŭmieńnie zasiarodzicca na samim pracesie. Naturalna, tvorčaść tut taksama jość, ale admietnaść mienavita ŭ voś hetych pieryjadach prosta manatonnaj pracy. Adnak Natalla ŭpeŭnivaje, što kali dzicia viedaje, što ŭ jaho na vychadzie atrymajecca, jano hatovaje prykładać namahańni, heta dyscyplinuje. Plus praca ź nitkami aktyŭna raźvivaje drobnuju matoryku, što, u svaju čarhu, dobra ŭździejničaje na ahulnaje raźvićcio, na myśleńnie.

«Što tyčycca raźvićcia tvorčych zdolnaściaŭ, to heta taksama jość. Treba padabrać koler, fakturu, ažyćciavić niejkuju svaju zadumu. Heta i fantaziju raźvivaje, i mastacki hust, bo my zaŭždy razhladajem tradycyjnyja ŭzory tkanin, analizujem kałarystyku, materyjały, sprabujem stvaryć štości novaje, pryhožaje, ale ŭ miežach našych tradycyjnych tekstylnych kanonaŭ», — dadaje Natalla.

Jana kaža, što pieršyja vyniki dzieci mohuć ubačyć užo na pieršych zaniatkach. Zusim niadaŭna da jaje pryjšli dźvie vaśmihadovyja dziaŭčynki i za adnu sustreču paśpieli sami zrabić branzaletki. Kaniešnie, nie z nula, byli padrychtavanyja asnovy, ale tym nie mienš.

Darečy, što tyčycca praciahłaści zaniatkaŭ. Tut dzieciam treba z baćkami samim vyznačycca, jak im bolš kamfortna. Kamu vosiem-dziesiać hod, zvyčajna chapaje niekalkich hadzin, nie bolš. Starejšyja mohuć siadzieć i try hadziny. Ale ŭsio indyvidualna. Kali dziciaci cikava, to čamu b nie papracavać daŭžej? Tym bolš, padčas zaniatkaŭ možna rabić pierapynki, možna vypić toj ža harbaty.

«Jość i jašče adzin vychavaŭčy momant. Padčas pracy ź nitkami zaŭždy sutykaješsia z tym, što jany błytajucca, źjaŭlajucca kaŭtuny, vuzły i hetak dalej. Ale lubyja kaŭtuny možna razbłytać i raspravić. I ja vuču, što kali niešta zbłytałasia, nie treba panikavać, a treba vydychnuć, zasiarodzicca i razabracca. Heta taki fiłasofski momant», — zaŭvažaje Natalla.

Jak trapić

Zaniatki ŭ Natalli prachodziać dva razy na tydzień, pa paniadziełkach i sieradach, ad 15-j da 21-j hadziny. Pakolki jany arhanizavanyja ŭ Centry dadatkovaj adukacyi dziaciej i moładzi «Vietraź» (Kastryčnicki rajon), to dla školnikaŭ całkam biaspłatnyja. Sustrečy prachodziać pa adrasie vulica Kazinca, 120 (kłub «Kniažy huf»).

Kali chočacie dałučycca, źviazvajciesia naŭprost z Natallaj (+375 29 3309940). Dla zapisu spatrebicca kopija paśviedčańnia ab naradžeńni dziciaci i zajava, jaje možna zapoŭnić na miescy.

• 0
• 0
• 0
• 0
• 0
• 0
• 0
• 0