Aŭtobus, jaki ŭjechaŭ u padziemny pierachod na Słavianskim bulvary ŭ Maskvie, pačaŭ ruch sam, śćviardžaje kiroŭca Viktar Cichanaŭ. Pavodle jaho słoŭ, jon sprabavaŭ spynić mašynu, ale nie zmoh.
Pra heta paviedamlaje SKR.
«Sa słoŭ kiroŭcy, aŭtobus, jaki stajaŭ na prypynku, raptam pačaŭ samastojna ruchacca. Pry hetym, niahledziačy na sproby spynić jaho, tarmaznaja sistema nie pracavała i aŭtobus praciahnuŭ ruch», — havorycca ŭ paviedamleńni viedamstva.
U vyniku zdareńnia, pavodle źviestak departamienta achovy zdaroŭja Maskvy, zahinuli čatyry čałavieki, pa dadzienych MUS — piać čałaviek. Bolš za dziesiać atrymali ranieńni.
Paśla avaryi z aŭtobusam była ŭzbudžanaja kryminalnaja sprava.
Vidavočca zdareńnia Ludmiła Ivancova raspaviała RBK, što pierachodziła Kutuzaŭski praśpiekt, kali pačuła mocny hrukat. «Ludzi, jakija biehli ŭ moj bok, kryčali, što ŭ pierachod zajechaŭ aŭtobus», — skazała jana. Pavodle jaje słoŭ, aŭtobus užo dastali, «u jaho raźbityja šyby z abodvuch bakoŭ, źniataja piaredniaja pravaja častka». «Asabliva surjoznych paškodžańniaŭ na pieršy pohlad niama», — dadała jana.
Pra toje, što aŭtobus stajaŭ na prypynku z vyklučanym ruchavikom, paśla čaho raptam pačaŭ ruch, paviedamiŭ telekanału «Doždž» vidavočca Alaksiej Karaścialoŭ. Pavodle jaho słoŭ, kiroŭca abiacaŭ jechać praz 15 chvilin, adnak pačaŭ ruch chutčej.
«Ja tolki sieŭ, chvilin piać prajšło, jon ni z taho ni ź siaho daje pa hazach. Vyjazdžaje na tratuar, jon moh u drevy pajechać, a jon admysłova, mnie tak padałosia, uziaŭ i ŭ pierachod padaŭsia», — pryvodzić jaho słovy vydańnie.
Paciarpiełyja atrymajuć strachavyja vypłaty ŭ miežach $8,5 tysiačy za škodu zdaroŭju i da $7 tysiač za stratu majomaści, paviedamili RBK na pradpryjemstvie «Mastransaŭta», jakomu naležyć aŭtobus. Svajakam zahinułych taksama praduhledžany vypłaty. «Pamier pakul nie vyznačany», — dadali ŭ kampanii.
Raniej RIEN TB biez ukazańnia krynicy infarmacyi paviedamiŭ, što kiroŭca padčas dopytu raspavioŭ, što «pierabłytaŭ haz i tormaz», kali «chacieŭ pieraparkavacca».
Za rulom aŭtobusa byŭ 58-hadovy Viktar Cichanaŭ. Pa słovach pradstaŭnika kampanii «Mastransaŭta», jakoj naležaŭ aŭtobus, pierad vyjezdam na maršrut jon prajšoŭ miedahlad i byŭ dapuščany da rejsa. «U jaho staž bolš za 20 hadoŭ, rasijskaje hramadzianstva, u «Mastransaŭta» jon pracuje z 2000 hoda», — paviedamili ŭ kampanii.
Kamientary