Vice-premjer Vasil Žarko dabudavaŭ katedž na 500 m2 u zakrytym elitnym pasiołku
U hetyja dni vice-premjer Vasil Žarko moža zaprašać na ŭłaziny. Jak stała viadoma «Našaj Nivie», jon narešcie dabudavaŭ sabie dom u katedžnym pasiołku za Nacyjanalnaj biblijatekaj.
Były ministr achovy zdaroŭja zajmieŭ sabie čarhovaje elitnaje žyllo. Jaho žoncy ŭžo naležać apartamienty ŭ Drazdach płoščaj bolš za 120 m2.
Miesca, dzie znachodzicca novy dom vice-premjera, pakul nie maje asobnaha nazovu. U bazach ahienctvaŭ nieruchomaści jaho apisvajuć «jak katedžny pasiołak na Jaźminavaj».
«Prajekt premium-kłasa, jaki arhanična spałučaje ŭ sabie pieravahi ekałahičnaha rajona i sučasnaj haradskoj infrastruktury.
Raźmiaščeńnie ŭ prestyžnym malaŭničym rajonie Minska, sučasnyja technałohii i jakasnyja materyjały, vykarystanyja pry budaŭnictvie, vydatny naturalny łandšaft — usio heta robić katedžny pasiołak na Jaźminavaj nie tolki statusnaj nieruchomaściu, ale i idealnym miescam dla cichaha siamiejnaha žyćcia.
14 kamfartabielnych katedžaŭ prajektujucca ŭ adzinym styli i ŭtvarajuć sucelny architekturny ansambl, jaki spałučajecca z pryrodnym łandšaftam miascovaści. Damy vykanany ŭ sučasnym minimalistyčnym styli, jaki padmacoŭvajuć i kalarovyja fasadnyja rašeńni ŭ strymanaj vochrystaj i ciomna-karyčnievaj hamie.
Na ŭčastkach katedžnaha pasiołka zapłanavana raźmiaščeńnie altanak dla adpačynku, u ahulnych zonach zaprajektavana dekaratyŭnaje azielanieńnie ź jadłoŭca, samšytu, ihlicy i pichty, piešachodnyja zony vykanany z klinkiernaj plitki z hranitnymi ŭstaŭkami.
Prastornyja pamiaškańni z vysokimi stolami i panaramnymi voknami zabiaśpiečać cudoŭny vid na vodny kanał i lasny masiŭ, svabodnaja płaniroŭka katedža dazvolić realizavać usie vašy pažadańni i ŭładkavać dom takim, jakim jaho bačycie vy i vaša siamja.
U katedžnym pasiołku na Jaźminavaj praviedzieny centralnyja sietki haza- i vodazabieśpiačeńnia, abharodžanaja terytoryja znachodzicca pad kruhłasutačnym videanazirańniem», — havorycca na sajcie budaŭničaj kampanij «Tapas».
U realnaści ŭsie 14 damoŭ, jakija ŭvachodziać u skład kompleksu, adnieśli da śpiecyjalna stvoranaj vulicy imia kampazitara Jaŭhiena Hlebava.
Prosty čałaviek trapić na vulicu Hlebava nie moža — niepažadanych haściej čakaje kantrolna-prapuskny punkt. Takich «zakrytych» vulic na ŭsiu Biełaruś litaralna dźvie albo try. Navat pa Drazdach, dzie žyvie bolšaść pradstaŭnikoŭ vyšejšaj namienkłatury, moža špacyravać luby achvotny.
Kampanija «Tapas», jakaja budavała katedžny pasiołak, viadomaja pieradusim dziakujučy biznesmienu Paŭłu Biełamu, adnamu z top-mieniedžaraŭ. Jon — napadajučy chakiejnaj zbornaj Alaksandra Łukašenki.
Dziva što sam Bieły pakinuŭ sabie niekalki elitnych katedžaŭ na Hlebava. Jon — niepasredny susied Vasila Žarko.
Vice-premjer atrymaŭ ziamlu pad svoj dom rašeńniem Minharvykankama №2626/1 ad 11 listapada 2010 hoda. Niezrazumieła, ci jon budavaŭ katedž svaimi siłami, ci z dapamohaj «Tapasa».
Płošča doma Žarko — bolš za 500 kvadratnych mietraŭ.
Kolki moža kaštavać žyllo vice-premjera pa sacyjalnych pytańniach?
Astatnija 13 damoŭ «Tapas» pradavaŭ pa kamiercyjnych cenach.
Naprykład,
adna z susiedak top-čynoŭnika niekalki miesiacaŭ tamu nabyła ŭ zabudoŭščyka svoj katedž (amal taki samy, jak u Žarko) za $700 tysiač.
Kab naźbirać takija hrošy, biełarus ź siarednim zarobkam pavinien ničoha nie jeści i nie pić dy aščadžać 161 hod.
Čytajcie taksama: Pa śladach Pastajałki: jak Vasil Žarko zrabiŭ karjeru ministra achovy zdaroŭja
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi22
Kamientary