Pakarany za akcyju ŭ Aśviencimie: «Vy nienavidzicie mianie za pralituju kroŭ aviečki? Brava!»
Asudžany za arhanizacyju performansu kala bramy kanclahieru ŭ Aśviencimie i žorstkaje zabojstva žyvioły režyser Mikita Vaładźko vystupiŭ sa zvarotam da čytačoŭ na svajoj staroncy ŭ fejsbuk, paviedamlaje Radyjo Svaboda.
17 studzienia sud polskaha horadu Aśviencim vynies prysud udzielnikam performansu ŭ muzei Aŭšvic-Birkienaŭ. Arhanizatar akcyi Mikita Vaładźko asudžany na 1 hod 2 miesiacy źniavoleńnia, jamu zabaroniena mieć žyviołaŭ na praciahu 10 hadoŭ.
Druhi arhanizatar akcyi Adam Bialacki asudžany na 1 hod 6 miesiacaŭ źniavoleńnia. Jaho pryznali vinavatym u źniavazie miesca pamiaci i zabojstvie jahniaci. Jon pavinien spłacić 2 tysiačy złotych štrafu. Taksama jamu zabaroniena mieć žyviołaŭ na praciahu 10 hadoŭ.
Inšym abvinavačanym prysudzili štrafy ŭ pamiery 10 tysiač złotych i abmiežavańnie voli terminam na 1 hod.
24 sakavika minułaha hodu ŭ Aśviencimie, kala bramy byłoha kancentracyjnaha lahieru ź viadomym na ŭvieś śviet nadpisam «Arbeit macht frei» adbyŭsia performans. 12 čałaviek, siarod jakich było piać biełarusaŭ, raździelisia dahała, zaviesili słova «Arbeit» baneram z nadpisam «Love» i pačali vykrykvać antyvajennyja lozunhi. Adzin ź ich pry hetym zabivaŭ pryviedzienaje z saboj jahnia.
Asudžanyja zastajucca na voli da razhladu apelacyi.
U svaim zvarocie Mikita Vaładźko vykazaŭsia pra mety akcyi ŭ kanclahiery, a taksama prakamentavaŭ vyniesieny prysud.
«Dziakuj tym, chto nie zastaŭsia abyjakavy da našaj historyi. A što moža mastactva, pani Cholecka (sudźja Bažena Cholecka. — RS)? Mastactva moža zrabić čałavieka volnym navat u turmie».
«Sud abvinavaciŭ nas u ździajśnieńni zabojstva z asablivaj žorstkaściu. A ja, Mikita Vaładźko, abvinavačvaju śviet u štodzionnych zabojstvach. Lehalizavanych, zvykłych dla abyvacielaŭ. Mienavita ŭ śviatym miescy Aśviencim ja kažu: my nie vyvučyli ŭrok historyi.
Sotni tysiač ludziej hinuć prama ciapier na Blizkim Uschodzie, u Danbasie, u Afrycy. Vy nienavidzicie mianie za pralituju kroŭ aviečki? Brava! Vy pračnulisia, ale čas adkryć vočy šyrej. Vam škada aviečku? A ničoha, što ŭ Polščy za hod zabivajuć 860 miljonaŭ žyvioł? Vy kali-niebudź byli na bojni? Karovy razumnyja žyvioły, kali ich viaduć na śmierć, jany ŭsio razumiejuć i adčuvajuć strach», — piša Mikita Vaładźko.
Biełaruskija zoaabaroncy, kamentujučy prysud biełaruskim udzielnikam performansu ŭ Aśviencimie, asudzili vybar miesca akcyi i adznačyli, što ŭ Polščy dobraje i spraviadlivaje zakanadaŭstva ŭ halinie abarony žyviołaŭ.
Staršynia hramadzkaha abjadnańnia abarony žyviołaŭ «Zoaśviet», hałoŭny redaktar dabračynnaj hazety «Druźja životnych» Marharyta Puškievič skazała Svabodzie, što jana ŭ šoku ad samoha ŭčynku. «Ja pieradusim staju na baku žyviołaŭ i kažu, što va ŭsim zaŭsiody vinavatyja ludzi», — skazała jana.
«Jak možna zabivać kaho b tam ni było i kazać, što heta suprać vajny?», — skazała staršynia dabračynnaha hramadzkaha abjadnańnia dapamohi biazdomnym žyviołam «Zoašaniec» Volha Karpava.
Ciapier čytajuć
Na Dzień Voli i dzień inaŭhuracyi Łukašenki ŭ Biełarusi abmiažujuć internet9
Kamientary