Pakul u Biełarusi čakajuć pačatku aciaplalnaha sezonu, ŭ Niderlandach znajšli biaspłatnuju krynicu haračaj vady.
Novaja hieatermalnaja stancyja, što pracuje z pačatku miesiacu, hreje batarei sotniaŭ damoŭ, kramaŭ i ofisaŭ, i nie patrabuje ni vuhalu, ni hazu, ni ŭranu ź plutonijem.
Hieatermalnaja stancyja ŭ miastečku Chejerlen – pieršaja ŭ śviecie stancyja, jakaja nahraje vadu ŭ skarystanych šachtach. Vuhalnaja rudnia ŭ Chejerlenie była začynienaja z 1970-ch, ale zaraz vykarystoŭvajecca na karyść horadu.
Ekalahična čystaja biaspłatnaja enerhija biarecca z hłybiniaŭ Ziamli. Technalohija davoli prostaja: stancyja pampuje vadu sa stvałoŭ vypracavanych šachtaŭ hłybinioj 800 mietraŭ, dzie vada naturalna nahrajecca da 35 hradusaŭ Celsiju. Kali patrebna bolšaja tempieratura – vada padahrajecca bojlerami. Haračaja vada vykarystoŭvajecca dla aciapleńnia 350 budynkaŭ, paśla čaho zalivajecca nazad u šachtu, dzie znoŭku nahrajecca.
Letam ź viaršyni šachty možna brać vadu, dastatkova chałodnuju, kab achładžać pabudovy biaz kandycyjaneraŭ.
Technałohija nie daje škodnych vykidaŭ i moža adradzić inšyja šachtorskija rajony, dajučy tannuju nievyčarpalnuju enerhiju. Adzinaja chiba – budynki musiać stajać dastatkova blizka da šachtaŭ.
«Z hieatermalnaj enerhijaj vy majecie pastajanny ŭzrovień ciapłyni, - kaža Karł-Hajnc Volf, prafesar Techničnaha Ŭniversitetu horadu Delft. – Kruhły hod vy majecie aciapleńnie, a kali jano vam niepatrebnaje, prosta pierakryjcie kran da času. Heta nieskładana, ŭsio, što vam treba – šachta pablizu z pradpryjemstvami ci damami, jakija vy chočacie aciaplać».
JAS, pavodle TIMES
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary