Učora pozna nočču na niekalki hadzinaŭ byli zamarožanyja sotni kiryličnych błohaŭ na platformie LJ. Trapiŭ pad razdaču i błoh Andreja Chadanoviča.
Učora pozna nočču na niekalki hadzinaŭ byli zamarožanyja sotni kiryličnych błohaŭ na platformie Livejournal‑a.
U asnoŭnym, heta datyčyłasia dosyć viadomych u rasiejskaj błahasfery karystalnikaŭ. Tyja, kaho pryniata nazyvać «tysiačnikami», to bok chto maje bolš za tysiaču «frendoŭ». Trapiŭ pad razdaču i naš Andrej Chadanovič.
Karystalniki prosta nie mahli ŭvajści ŭ svaje błohi. Nijakich tłumačalnych listoŭ z administracyi Livejournal‑u, jakija prychodziać u padobnych vypadkach, nichto nie atrymaŭ.
Pa niekatorych źviestkach hetaj nočču było zamarožana bolš za 650 žyvych žurnałaŭ.Zrešty, na dadzieny momant usie jany ŭžo ažyli.
Pryčyny zdareńnia z ŽŽ pa‑raniejšamu niezrazumiełyja. Ci to heta byŭ zboj u systemie, ci to niejki mańjak‑uzłomščyk, ci to znoŭ dzivić SUP.
Nahadajem, što ŭ śniežni letaś rasiejskaja internet‑kampanija SUP poŭnaściu nabyła viadomy servis Livejournal. Raniej Livejournal, adkryty jašče ŭ 1999 hodzie, naležaŭ kampanii Six Apart.
Mnohija karystalniki paśla hetaj uhody syšli z servisu Livejournal, abraŭšy dla siabie novyja błohavyja placoŭki. Hałoŭnaja zaniepakojenaść zaklučałasia ŭ tym, što heta moža pravieści da kamercyjalizacyi ci navat da padaŭleńnia źmiestu błohu.
Niejkim časam SUPaŭcy sprabavali pazbavić karystalnikaŭ bazavych rachunkaŭ, jakija nie praduhledžvali reklamy. Paśla šerahu pratestaŭ bazavyja rachunki ŭdałosia zachavać.
Faktyčna, była ŭviedzienaja svojeasablivaja cenzura ŭ błohach. Za peŭnyja parušeńni dziońniki mahli zakryvacca administracyjaj SUP. Takaja źjava atrymała nazvu «zasuspendzili».
Biełaruś zajmaje adno ź viadučych miescaŭ u śviecie pa karystańni błohaŭ na Livejournal. Siońnia bolš za 28 tysiač žyvych žurnałaŭ viaduć biełarusy, a kraina zajmaje 13‑ie miesca pa kolkaści karystalnikaŭ LiveJournal.
U Livejournal‑y syšło šmat viadomych biełarusaŭ — piśmieńniki, muzyki, žurnalisty, palityki. Tam pišucca cikavyja, časam unikalnyja teksty. Paśla ŭčorašniaha zdareńnia ŭźnikaje pytańnie,
ci nia moža ŭsie stvoranaje ŭ ŽŽ być pierakreślenaje ŭ adnu chvilinu?Kali raptam niechta dziela žartu, albo ŭbačyŭšy niejkuju kramołu, vydalić vaš dziońnik.
Napeŭna, mnohija ciapier zadumajucca pra mahčymaść zachoŭvańnia svaich žurnalnych zapisaŭ. Jakim čynam? Napeŭna, kožny znojdzie svoj šlach.
Śpievaka z «Marafonu adzinstva» asudzili za palityku — pryhadali kamientary 2020-ha. Baranić u sud jaho chadzili siostry Hruździevy16
Kamientary