25-hodździe preźbiterskaha paśviačeńnia ks. Ihara Łašuka adznačyli ŭ Bahdanavie
16 červienia ŭ parafii sv. Michała Archanioła ŭ Bahdanavie adbylisia ŭračystaści srebnaha jubileju preźbiterskaha paśviačeńnia ks. Ihara Łašuka. Uznačaliŭ ich arcybiskup Tadevuš Kandrusievič, Mitrapalit Minska-Mahiloŭski.
Na pačatku ŭračystaściaŭ vierniki parafii sustreli arcybiskupa pierad kaściołam. Zatym ijerarch błahasłaviŭ novuju zvanicu sv. Alaksandra i Rufa i čatyry zvany, dva ź jakich — novyja i pryśviečany miłasernaści: jany nosiać imiony Jezusa Miłasernaha i Maci Miłasernaści.
Potym adbyłasia sv. Imša, jakuju ŭznačaliŭ arcybiskup. Kancelebravali Eŭcharystyju dapamožny biskup Minska-Mahiloŭskaj archidyjacezii Juryj Kasabucki i šmatlikija śviatary.
U hamilii arcybiskup Tadevuš Kandrusievič paznajomiŭ prysutnych sa šlacham ks. Ihara Łašuka da śviatarstva i jaho śviatarskim słužeńniem.
Jubilar naradziŭsia ŭ 1966 h. u v. Makašy Niaśvižskaha rajona. Vychavany ŭ katalickaj viery pabožnymi baćkami, jon nie paddaŭsia savieckaj prapahandzie i nie zdradziŭ Chrystu ŭ časy vajaŭničaha ateizmu.
Paśla zakančeńnia škoły budučy śviatar pastupiŭ u Hrodzienski sielskahaspadarčy instytut.
«U toj čas ja, adnojčy pryjechaŭšy ź Vilni, pajšoŭ da ks. infułata Michała Aranoviča ŭ pabernardynski kaścioł u Hrodnie, — uzhadvaŭ Tadevuš Kandrusievič. — U plabanii sustreŭ maładoha chudzieńkaha vysokaha čałavieka. Potym siastra nazaretanka Stela, jakuju ŭsie nazyvali ciocia Ania, mnie šapnuła, što hety junak maryć pra śviatarstva».
«Viadoma, u toj čas, kali ateistyčny režym lutavaŭ u našaj krainie, ciažka było sabie ŭjavić, što našyja losy syjducca», — dadaŭ ijerarch.
Skončyŭšy dva kursy instytuta, Ihar Łašuk dabravolna pakinuŭ jaho z dumkaj ab sieminaryi. Ale pierad hetym daviałosia adsłužyć u vojsku, paśla čaho, budučy sakrystyjaninam u niaśvižskim kaściole, jon pačaŭ papadpolnuju padrychtoŭku da śviatarstva ŭ ks. infułata Vacłava Piantkoŭskaha ŭ Miadźviedzičach.
U 1988 h. Iharu, narešcie, udałosia pastupić na druhi kurs Ryžskaj duchoŭnaj sieminaryi.
«Jašče sieminarystam, jon pryjšoŭ da mianie ŭ 1990 h. z prajektam vydańnia Małoha katechizisa na biełaruskaj movie, — uzhadaŭ arcybiskup. — Taki katechizis byŭ vydadzieny nakładam 95 tysiač asobnikaŭ».U 1990 h. Ihar Łašuk praciahnuŭ śviatarskuju farmacyju ŭ salezijanskaj duchoŭnaj sieminaryi ŭ Londzie ŭ Polščy, jakuju skončyŭ u 1993 h. Hod słužyŭ śviatarom u Lidzie ŭ parafii Biezzahannaha Začaćcia Najśviaciejšaj Panny Maryi. U 1994—1997 hh. vučyŭsia ŭ Papskim salezijanskim univiersitecie ŭ Rymie, jaki skončyŭ sa stupieńniu licencyjata dahmatyčnaj teałohii.
U 1997—2011 hh. ks. Ihar Łašuk byŭ probaščam parafii sv. Jana Chryściciela ŭ Minsku. Pabudavaŭ kaplicu, adkryŭ moładzievy centr i raspačaŭ budaŭnictva pieršaha za 100 hadoŭ kaścioła ŭ Minsku.
Adnačasova jon vykładaŭ dahmatyku u Pinskaj duchoŭnaj sieminaryi i ŭ Katechietyčnym kaledžy ŭ Baranavičach.
Z 2011 h. ks. Ihar źjaŭlajecca probaščam u Bahdanavie. U 2014—2016 hh. vučyŭsia na fakultecie žurnalistyki BDU.
Niastomny i niaŭrymślivy, ks. Ihar Łašuk inicyjavaŭ rehistracyju parafii ŭ pasiołku Maładziožny kala Lidy, hreka-katalickaj parafii ŭ Lidzie, parafij u Raŭbičach i Baraŭlanach. Jon ža pabudavaŭ kaplicu ŭ Baraŭlanach i raspačaŭ budaŭnictva parafijalnych centraŭ u Baraŭlanach i ŭ Raŭbičach. Akramia taho, adnaviŭ kaplicu sv. Stanisłava ŭ v. Praści i raspačaŭ budaŭnictva kaplicy Jezusa Miłasernaha na Paŭnočnych mohiłkach u Minsku.
Kab u poŭnaj miery realizavać enierhiju Božaha Ducha, jakaja ŭ ks. Ihary prosta bje fantanam, jon byŭ pryznačany taksama probaščam parafii sv. Jana Paŭła II u Minsku, dzie imkniecca pabudavać ceły sanktuaryj.
Da hetaha «pasłužnoha śpisu», jak pa-kancylarsku adznačyŭ ijerarch, nieabchodna dadać šmatlikija pastyrskija inicyjatyvy ks. Ihara, ź jakich možna asabliva vyłučyć raspaŭsiudžvańnie kultu malitvy ŭ intencyi pamierłych — spravu dapamohi dušam, jakija cierpiać u čyscy.
Arcybiskup nahadaŭ i pra ramonty, jakija adbylisia i adbyvajucca ŭ Bahdanavie. Była adnoŭlena plabanija, kaścioł, na dachu jakoha źjaviłasia fihura sv. Michała Archanioła. Niadaŭna ks. Ihar pryvioz fihuru sv. Michała z adnajmiennaha sanktuaryja ŭ Harhana (Italija). Płanujecca, što hetaja fihura ździejśnić pilihrymku pa biełaruskich parafijach, pryśviečanych sv. Michału Archaniołu.
Arcybiskup Kandrusievič padkreśliŭ taksama značeńnie paklikańnia da śviatarstva jak daru i tajamnicy, pra što kazaŭ sv. Jan Pavieł II.
«Tajamnica — bo heta vybar nie paklikanaha, a Chrysta. Dar paklikanamu i ludziam. Tolki śviatar moža ździajśniać śviatyja tajamnicy, bo jon dziejničaje mocaju Chrysta», — patłumačyŭ arcybiskup.
Ijerarch padrabiazna spyniŭsia na patrojnaj funkcyi śviatara: abviaščać, aśviačać i kiravać.
Hałoŭnym zadańniem śviatara, pa słovach Mitrapalita, źjaŭlajecca abviaščeńnie zaŭsiody žyvoha i dziejsnaha Božaje słova, ź jakoha naradžajecca viera. U naš čas adychodu ad viery hetaje zadańnie źjaŭlajecca vielmi aktualnym.
Tolki śviatar moža celebravać sakramenty, i ŭ pieršuju čarhu Eŭcharystyju, kab adorvać ludziej patrebnaj dla zbaŭleńnia Božaj łaskaj.
Treciaj zadačaj śviatara źjaŭlajecca kiravańnie davieranym jamu Božym narodam najpierš praz słužeńnie.
Aceńvajučy słužeńnie ks. Ihara i jaho adkrytaść dla ludziej, arcybiskup nazvaŭ jaho «narodnym śviatarom», jaki «dobra viedaje «pach» svaich viernikaŭ», jak kaža pra heta papa Francišak, i imkniecca im dapamahčy.
Tadevuš Kandrusievič pažadaŭ jubilaru Božaha błahasłaŭleńnia na dalejšaje paśpiachovaje słužeńnie Bohu i Kaściołu, a taksama pažadaŭ dalej zastavacca słuhoj ludziej na ich šlachu da Boha i śviatarom, jaki mužna baronić pryncypy viery i pravy Kaścioła.
Paśla Imšy kala kaścioła adbyŭsia kancert, padčas jakoha vierniki ciopła pavinšavali svajho pastyra.
Ciapier čytajuć
Čaćviortuju liniju minskaha mietro paviaduć u Dražniu. A «Ślapianka» i «Daŭhabrodskaja» źmianili svajo miesca4
Kamientary