U Minsku zaŭvažyli redkuju kačku, jakuju nazvali ŭ honar kitajskich vialmož

Nazva ekzatyčnaj kački źviazana nie z aranžavaj sadavinoj, a z vobrazam kitajskich vialmož — mandarynaŭ. Jarkaje, strakataje apiareńnie samcoŭ hetaj ptuški nahadvaje raskošnyja ŭbory čynoŭnikaŭ u impieratarskim Kitai, piša Onliner.by.

— Ptuška zdavałasia mnie pałachlivaj, inšych kačak pobač nie nazirałasia. Dačka kazała, što jašče ŭčora bačyła mandarynku ŭ parku, ale ja ŭ našym rajonie jaje nie sustrakała, chacia pastajanna tut hulaju, — adznačaje Volha.

Pryrodny areał raśsialeńnia mandarynki — Uschodniaja Azija. Jak ža hetyja kački traplajuć u Biełaruś? U Biełarusi mandarynka — redki zalotny vid.

— Mandarynki — vielmi jarkija i pryhožyja ptuški, tamu ludzi časta trymajuć ich u zaaparkach i pryvatnych haspadarkach, z-za čaho hetyja kački raspaŭsiudzilisia daloka za miežy svajho pryrodnaha areała na Dalokim Uschodzie. Z časam častka ptušak pačała ŭciakać, i ŭ Jeŭropie z takich asobin sfarmavalisia ŭstojlivyja dzikija papulacyi, jakija paśpiachova razmnažajucca ŭ pryrodzie i pastupova raśsialajucca, — raskazvaje arnitołah i kiraŭnik prajekta Kryly.by Siamion Levy.

Takim čynam, mandarynki ŭ Biełarusi mohuć źjaŭlacca pa dźviuch asnoŭnych pryčynach: albo heta ptuški, jakija ŭciakli z pryvatnych kalekcyj — takich, naprykład, rehularna nazirajuć na Biarezinie ŭ rajonie Barysava. Albo heta adzičełyja asobiny ź jeŭrapiejskich papulacyj.

Časta ŭładalniki dekaratyŭnych ptušak kalcujuć svaich hadavancaŭ, mienavita pa hetaj prykmiecie možna zrazumieć, ci była kaliści mandarynka svojskaj. A jašče — pa pavodzinach ptuški. Kali jana žyła pobač z čałaviekam, to pavodzić siabie bolš davierliva.

Miarkujučy z raskazaŭ Volhi, mandarynka na Śvisłačy, vierahodna, z adzičełaj papulacyi. Ale navat kali heta nie tak, to ničoha strašnaha nie pavinna zdarycca.

Pavialičyć

— Usie kački z naradžeńnia majuć instynkt samastojna zdabyvać ježu. Mandarynka nie vyklučeńnie: apynuŭšysia ŭ dzikich umovach, jana pačynaje łavić nasiakomych i znachodzić sabie ježu. Mnohija arnitołahi, praŭda, ličać, što našy zimy zanadta žorstkija dla hetych ptušak. I pieražyć ich jany zmohuć, tolki kali adlaciać u bolš ciopły rehijon.

Kački aryjentujucca pa ŭmovach pražyvańnia: kali na vadajomie niama karmoŭ abo jany zamiarzajuć, to jany mohuć źmianić miescaznachodžańnie. Padkormlivać vadapłaŭnych ptušak možna tolki zimoj. I to vielmi aściarožna i ni ŭ jakim razie nie chlebam. A naohuł ježy dla kačak zaraz dastatkova, i lepš nie turbavać ich lišni raz, a prosta pryjści i palubavacca mandarynkami z adlehłaści, — dadaje Siamion Levy.

• 4
• 0
• 0
• 0
• 0
• 0
• 0
• 0