Kryminalnuju spravu žurnalista Źmitra Hałko pieradali ŭ sud
Aryštavany Źmicier Hałko zaviaršyŭ znajomstva z kryminalnaj spravaj, pavodle jakoj jon abvinavačvajecca ŭ hvałtoŭnych dziejańniach da supracoŭnika milicyi, piša Radyjo Svaboda.
Sprava pieradadzienaja ŭ sud Savieckaha rajonu Miensku. Pavodle Kryminalna-pracesualnaha kodeksu, sudździa moža vyvučać materyjały da dvuch miesiacaŭ, tamu praces pačniecca ŭ lipieni-žniŭni, miarkuje baćka Źmitra Mikałaj Hałko.
Mikałaj Hałko raskazaŭ Svabodzie, što Źmicier pa-raniejšamu ŭtrymlivajecca ŭ Žodzinskim śledčym izalatary, ale pierad sudom jaho pieraviaduć u mienskaje SIZA № 1 na vulicy Vaładarskaha.
«Umovy ŭtrymańnia paraŭnalna narmalnyja, u kamery dvoje. Praŭda, sa Źmitrom byŭ psychična chvory stary čałaviek, ale advakat kaža, što taho abiacali pieravieści ŭ inšuju kameru. Ad prahułak Źmicier admaŭlajecca, bo ličyć vielmi źnievažalnym sam «rytuał», praceduru vyvadu na prahułku, kali ruki nazad, prymušajuć zhinacca łbom da kalen i takim čynam pierasoŭvacca. Što da ježy, kašu na śniadanak jeści jašče možna, pisaŭ Źmicier, usio astatniaje jeści niemahčyma, na Vaładarcy charčavańnie značna lepšaje», — padzialiŭsia Mikałaj Hałko.
Źmicier nie pryznaŭ svajoj viny i naahuł ničoha, što jamu inkryminujuć, admoviŭsia supracoŭničać sa śledztvam. Jamu nie dazvolili nivodnaha spatkańnia z rodnymi.
Kamientary