200 rasijskich vajskoŭcaŭ buduć sioleta zadarma adpačyvać u biełaruskich sanatoryjach

Dźvie sotni rasijskich vajskoŭcaŭ, siarod jakich — udzielniki vajny va Ukrainie, zmohuć atrymać pucioŭki ŭ biełaruskija sanatoryi ŭ 2026 hodzie zadarma. Za takoje «azdaraŭleńnie» voźmucca try biełaruskija sanatoryi, paviedamlaje «Radyjo Svaboda».

Pra heta stała viadoma ŭ vyniku praviedzienaha 20 sakavika ŭ Maskvie pasiedžańnia konkursnaj kamisii Pastajannaha kamiteta tak zvanaj Sajuznaj dziaržavy Biełarusi i Rasii. Na im vyznačali pieramožcaŭ adkrytaha tendaru, abvieščanaha hetaj ustanovaj na prava akazańnia pasłuh «arhanizacyi sanatorna-kurortnaha lačeńnia vieteranaŭ i invalidaŭ Vialikaj Ajčynnaj vajny i bajavych dziejańniaŭ» u 2026 hodzie.

Pačynajučy z 2011 hoda, takija pasłuhi, zhodna z pastanovaj Savieta Ministraŭ Sajuznaj dziaržavy, nadavali tolki biełaruskim i rasijskim vieteranam i invalidam, što ŭdzielničali ŭ Druhoj suśvietnaj vajnie. Ale 24 listapada 2022 hoda, užo paśla pačatku poŭnamaštabnaj rasijskaj ahresii va Ukrainie, u tekście pastanovy źmianili farmuloŭki. Tudy dadali šyrejšaje paniaćcie — «vieteran bajavych dziejańniaŭ». Heta značyć, što ŭ pieralik tych, chto maje prava atrymoŭvać biaspłatnyja pucioŭki ŭ sanatoryi Biełarusi i Rasii, trapili ŭsie rasijskija vajskoŭcy, što ŭdzielničali ŭ vajnie va Ukrainie.

Za lačeńnie takija vajskoŭcy ničoha nie zapłaciać. Finansujucca pucioŭki za košt biudžetu Sajuznaj dziaržavy, jaki ŭ svaju čarhu napaŭniajecca ź biudžetaŭ Biełarusi i Rasii. Na heta praduhledžana vydatkavać 33,6 miljona rasijskich rubloŭ (prykładna 415 tysiač dalaraŭ).

Zhodna ź infarmacyjaj ź dziaržaŭnaha rasiejskaha tendaru, dakumienty z paćvierdžańniem hatoŭnaści akazać pasłuhi lačeńnia i reabilitacyi ŭ konkursnuju kamisiju dasłali try biełaruskija sanatoryi i adzin rasijski. Tak, pra žadańnie zasvoić usiu vyłučanuju na prahramu sumu i vyłučyć 400 puciovak dla vieteranaŭ pahadziŭsia Lepielski vajskovy sanatoryj, zasvoić častku hrošaj i nadać 120 puciovak — baranavicki sanatoryj «Čabarok», 40 puciovak — minski sanatoryj «Sasnovy bor» adkrytaha akcyjaniernaha tavarystva «Biełdziaržzdraŭnica». 250 puciovak hatovy dać rasijski kardyjalahičny sanatorny centr «Pieriediełkino».

Pavodle kančatkovaha dakumientu konkursnaj kamisii, apublikavanaha 23 sakavika 2026 hodu, pryniata rašeńnie ŭva ŭsie čatyry sanatoryi vydać 361 pucioŭku, ź jakich 201 pucioŭka — u try biełaruskija. Lepielskamu vajskovamu sanatoryju nadadziena prava «azdaraŭleńnia» 155 vieteranaŭ, baranavickamu sanatoryju «Čabarok» — 26 i minskamu sanatoryju «Sasnovy bor» — 20 veteranaŭ.

Siarod pasłuh, jakija musiać zabiaśpiečyć biełaruskija sanatoryi: dyjahnastyčnaja, lačebna-azdaraŭlenčaja, reabilitacyjnaja dapamohi, arhanizacyja volnaha času, praviadzieńnie «zajezdaŭ i mierapryjemstvaŭ pa tematycy Sajuznaj dziaržavy». Za svoj ułasny košt sanatoryi majuć dastavić vieteranaŭ ad bližejšaha vakzału ci aeraportu, pravieści ekskursii «pa miaścinach bajavoj słavy», a taksama razdrukavać hrupavoje «fota na pamiać».

U Lepielski vajskovy sanatoryj rasijskija vajskoŭcy pryjazdžali i ŭ 2024 i 2025 hadach.

• 1
• 0
• 0
• 1
• 0
• 0
• 6
• 0