Načalnik sa Śledčaha kamiteta jechaŭ pjanym, hruba parušaŭ PDR, biŭsia z daišnikami i ŭciakaŭ ad ich. Atrymaŭ «chimiju»
Pjany namieśnik načalnika adździeła Śledčaha kamiteta jechaŭ pa Słonimskim rajonie ŭ mašynie razam sa svaim małaletnim synam. Padčas ruchu jon parušaŭ praviły: aŭtamabil vichlaŭ pa darozie, vyjazdžaŭ na sustrečnuju pałasu, a śviedka navat zaŭvažyŭ, što kiroŭca pry hetym niešta pje z butelki. Pra heta paviedamili supracoŭnikam DAI i pačali razhortvacca padziei, dzielicca adšukanymi ŭ banku sudovych rašeńniaŭ Miniusta padrabiaznaściami sudovaj spravy vydańnie «Lusterka».
Inśpiektary znajšli i spynili hety aŭtamabil. Jany adčuli ad kiroŭcy pach ałkaholu i prapanavali prajści pravierku, ale toj admoviŭsia i pačaŭ spasyłacca na svaju pasadu ŭ Śledčym kamitecie, prosiačy jaho adpuścić.
Paśla situacyja rezka abvastryłasia: mužčyna skarystaŭsia z momantu, sieŭ u mašynu i pasprabavaŭ uciačy. Adzin ź inśpiektaraŭ na chadu zaskočyŭ u aŭtamabil i sprabavaŭ jaho spynić, ciahnučy ručnik. Kiroŭca supraciŭlaŭsia, adšturchoŭvaŭ supracoŭnika i praciahvaŭ ruch z chutkaściu kala 60 km/h na praciahu prykładna paŭkiłamietra.
Druhi inśpiektar pačaŭ pieraśled na słužbovaj mašynie. U vyniku aŭtamabil usio ž spynili, a kiroŭcu zatrymali z užyvańniem siły i nadzieli na jaho kajdanki, bo jon praciahvaŭ supraciŭlacca.
Praz paŭtary hadziny paśla zatrymańnia mužčyna prajšoŭ miedahlad. U jaho kryvi znajšli 2,49 pramile ałkaholu, a taksama lekavy preparat ź siedatyŭnym dziejańniem.
Na jaho zaviali kryminalnuju spravu za supraciŭ supracoŭnikam milicyi z užyvańniem hvałtu. Da suda jon znachodziŭsia pad vartaj.
U sudzie mužčyna pryznaŭ vinu i rastłumačyŭ, što ŭ toj dzień byŭ u adpačynku, vypiŭ i vyrašyŭ pajechać z synam da babuli. Jon taksama pryznaŭ, što admaŭlaŭsia ad pravierki, bo razumieŭ, jaki budzie vynik. Svaje pavodziny rastłumačyŭ ałkaholnym apjanieńniem i paprasiŭ prabačeńnia ŭ supracoŭnikaŭ DAI.
Inśpiektary atrymali niaznačnyja traŭmy, a ŭ sudzie paprasili nie karać mužčynu zanadta stroha.
U vyniku sud pryznaŭ mužčynu vinavatym i prysudziŭ jamu čatyry hady abmiežavańnia voli z nakiravańniem u papraŭčuju ŭstanovu adkrytaha typu («chimija»). Taksama jaho pazbavili śpiecyjalnaha zvańnia majora justycyi.
Siarod źmiakčalnych abstavin sud uličyŭ pryznańnie viny, raskajańnie i najaŭnaść małaletniaha dziciaci. Adnak abciažarvalnymi faktarami stali ałkaholnaje apjanieńnie i parušeńnie prysiahi supracoŭnika Śledčaha kamiteta.
U Biarozaŭskim rajonie milicyja stralała pa pjanym
Pjany biaspraŭnik skraŭ furu i haniaŭ na joj pa trasie. Zatrymlivali jaho sa zbrojaj
«Bł**ź, dapamažycie mnie nach**, Alaksandr Ryhoravič!» Babrujčanin pad prymusam žonki zapisaŭ miemny zvarot da Łukašenki
Dvoje pjanych jechali na adnoj mašynie, i prablemy sabie zdabyŭ nie tolki kiroŭca
Kamientary
Ale Łukašenka źniaŭ Dałhalova nie za heta, a za toje, što tyj niešta tam nie vykanaŭ, ale pabudavaŭ sabie u centry Bieraścia šykoŭny katedž. Łukašenka tady mocna razzłavaŭsia, i Dałahaloŭ ekstrana za paru dzion źnios budynak. Potym jaho cichieńka pieraviali na siniakuru ŭ Maskvie ŭ aparat sajuznaha he.