«Novy čas»: Adzin z členaŭ Rady, što ŭchvaliła raźmiaščeńnie «restarana na kaściach», byŭ hałoŭnym architektaram kampanii Izraileviča

Hazieta «Novy čas» praciahvaje rasśledavać aśpiekty, źviazanyja z pabudovaj restarana «Pajedziem pajadzim» kala Kurapat. Aŭtar vydańnia Dzianis Ivašyn vyjaviŭ dakumienty, jakija śviedčać, što architektar Alaksiej Martynaŭ, jaki ŭvachodziŭ u Biełaruskuju respublikanskuju navukova-mietadyčnuju radu pa pytańniach historyka-kulturnaj spadčyny pry Ministerstvie kultury, paźniej byŭ hałoŭnym architektaram kampanii Arkadzia Izraileviča TAA «IV».

61-hadovy Alaksiej Martynaŭ ciapier pracuje hałoŭnym mastakom — namieśnikam dyrektara KVUP «Minskrekłama».

Raniej jon byŭ namieśnikam staršyni Kamiteta architektury, horadabudaŭnictva i ziemleŭparadkavańnia Minharvykankama. U 2003 hodzie jon zhadvajecca ŭžo jak hałoŭny mastak Minska, uvachodzić u skład respublikanskaj mastackaj ekśpiertnaj rady pa manumientalnym mastactvie. U hetym ža hodzie jon zhadvajecca i jak člen Navukova-mietadyčnaj rady.

U 2005 hodzie taja rada Minkulta ŭchvaliła eskizny prajekt pa abjekcie «na 51 km MKAD, z ulikam adpaviednaści padrychtavanaj dakumientacyi režymu ŭtrymańnia zony rehulavanaj zabudovy, vyznačanaj u składzie schiemy zonaŭ achovy materyjalnaj nieruchomaj historyka-kulturnaj kaštoŭnaści pieršaj katehoryi «Miesca zhuby achviaraŭ palityčnych represijaŭ 30—40 hadoŭ XX stahodździa va ŭročyščy Kurapaty».

Adnym z členaŭ Rady, jaki prahałasavaŭ za ŭchvaleńnie hetych rašeńniaŭ, źjaŭlajecca Alaksiej Martynaŭ, paznačany ŭ pratakole ŭ jakaści hałoŭnaha architektara TAA «IV» — kampanii Arkadzia Izraileviča, piša «Novy čas».

Kampanija TAA «IV», mierkavana, praz šerah afilavanych kampanijaŭ źviazanaja z zabudoŭnikam STAA «BiełRestInviest», jaki i pabudavaŭ «Bulbaš'-chołł», pierajmienavany potym na «Pajedziem pajadzim».

Sam Izrailevič publična napadaŭ na pratestoŭcaŭ suprać «restarana na kaściach» i abvinavačvaŭ praciŭnikaŭ budaŭnictva ŭ antysiemityźmie.

Ziamlu pad zabaŭlalny centr la MKADa kala miesca masavych rasstrełaŭ hramadzian u 1937—1941 hadach Minski rajvykankam vydzieliŭ u 2000-ch. U 2012 namieśnik hienprakurora rekamiendavaŭ uładam Minskaha rajona i vobłaści spynić budaŭnictva i ŭkazvaŭ na parušeńni pry vydzialeńni ziamli, ale kiraŭniki Minskaj vobłaści praihnaravali hety zvarot. Naadvarot, pry ministru Śviatłovie Ministerstva kultury zaćvierdziła takija miežy achoŭnych zon vakoł Kurapat, pry jakich restaran moh zastavacca stajać.

Zbudavany restaran nazvali spačatku «Bulbaš-chołam», ale ŭ vyniku hramadskich pratestaŭ tak i nie adkryli, jon prastajaŭ 4 hady pusty. Novaja sproba adkryć jaho adbyłasia hetym letam. Praciŭniki hetaha dziažurać na placoŭcy kala zabaŭlalnaha centra i infarmujuć ludziej pra Kurapaty. 

U Kurapackim lesie u brackich mahiłach lažać pareštki dziasiatkaŭ tysiač ludziej, rasstralanych savietami.

Ludzi patrabujuć pieranieści ci pieraprafilavać budynki «Pajedziem pajadzim». Z asudžeńniem adkryćcia restarana vystupili šmatlikija intelektuały i hramadskaja dziejačy — ad Śviatłany Aleksijevič da Mikałaja Čarhinca i Viačasłava Kiebiča. Ź imi salidaryzavalisia biznesoŭcy Juryj Zisier i Viktar Prakapienia.

Ułady pakul nie zrabili nijakich krokaŭ pa praviercy zakonnaści vydzialeńni placu pad zabudovu.

Čytajcie taksama:

«Kvoty pieravykanany»: kašmarnyja archiŭnyja dakumienty pra 1937 hod u Biełarusi

Haspadar skandalnaha restarana ŭ Kurapatach — 54-hadovy biznesmien Leanid Zajdes

Skandał u Kurapatach: kolišniaja televiadučaja BT i jaje muž-biznesmien najechali na aŭto na dvuch pikietoŭcaŭ

Prakuratura patrabavała ad Batury spynić budaŭnictva «Bulbaš-choła», ale toj nie spyniŭ

• 0
• 0
• 0
• 0
• 0
• 0
• 0
• 0