Praces Fiadyniča i Komlika: užo druhi śviedka abvinavačańnia admoviŭsia ad pakazańniaŭ, spasłaŭšysia na cisk padčas śledstva

U Domie pravasudździa praciahvałasia słuchańnie pa spravie kiraŭnikoŭ prafsajuza REP, jakich abvinavačvajuć u niavypłacie padatkaŭ u asabliva bujnym pamiery, piša tut.by.

Za heta im pahražaje abmiežavańnie voli na termin da piaci hadoŭ abo pazbaŭleńnie voli na termin ad troch da siami hadoŭ.

31 lipienia da pačatku pracesu ŭsie vinšavali Hienadzia Fiadyniča z dniom naradžeńnia.

— Pavažanyja kalehi, siońnia dzień naradžeńnia ŭ Hienadzia Fiadyniča, jamu spaŭniajecca 61 hod. Davajcie pavinšujem! — prapanavaŭ adzin z prysutnych. U zale pačulisia apładysmienty, členy prafsajuza ŭručyli imianińniku kvietki.

Pasiadžeńnie pačałosia z dopytu śviedki Mikałaja Hierasimienki, jaki ŭ prafsajuz ustupiŭ u 1971 hodzie, kali pastupiŭ u radyjotechničny instytut. Pracavać u prafsajuz pryjšoŭ u 2012 hodzie i prapracavaŭ tam da 2016 hoda ŭ jakaści śpiecyjalista pa infarmacyjnaj pracy.

U sudzie Hierasimienka zajaviŭ, što ŭžo admoviŭsia ad pakazańniaŭ, dadzienych u Śledčym kamitecie ŭ žniŭni minułaha hoda.

— Ja aficyjna napisaŭ zajavu ab admovie ad pakazańniaŭ, dadzienych mnoj u SK. Tamu što na dopycie ŭ SK mnie dali tolki adzin dakumient, dzie ja byŭ padpisany jak padazravany, što mianie ahałomšyła.

Padčas dopytu mnie pahražali, kazali, što kanvoj pobač, što pajdu ŭ turmu. Dla mianie heta było jak abuchom pa hałavie. Pytańni zadavalisia va ŭltymatyŭnaj formie, na jakija možna było adkazać tolki tak ci nie: ci ja viedaju ludziej z prafsajuza, ci jeździli za miažu — viadoma, tak. My jeździli ŭ Vilniu, dzie brali ŭdzieł u kanfierencyjach, navučalisia, — raspavioŭ Hierasimienka.

Z nahody rachunkaŭ za miažoj, dadatkovych vypłat inšym supracoŭnikam REP śviedka zajaviŭ, što ničoha nie viedaje. Na sieminary ŭ Litvu Hierasimienka jeździŭ z Komlikam, Fiadyničam abo inšymi rabotnikami prafsajuza. Hrošy jamu kiraŭniki REP nie pieradavali, nie prasili pieravieźci, pra toje, ci pieravozili inšyja rabotniki abo kiraŭniki hrošy, śviedka ničoha nie viedaje. Juchnaviec, pavodle jaho słoŭ, jamu taksama ni pra jakija pieraviezienyja hrošy nie kazała.

— Nijakich hrošaj nikudy ja nie vaziŭ. Adzin raz mnie dali kanviert, ale heta było nie ŭznaharodžańnie, nijakich tysiač, jak učora napisali ŭsie sajty, heta była kampiensacyja za vydatki na prajezd na sieminar, tolki i ŭsiaho, — skazaŭ Hierasimienka.

U pratakole dopytu śviedki ŭ DFR, jaki začytała sudździa Maryna Fiodarava, skazana, što Hierasimienka, akramia zarpłaty, atrymlivaŭ ad kiraŭnictva prafsajuza hrošy ŭ kanviertach — kala 600 rubloŭ kožny miesiac na vypusk pres-materyjałaŭ.

Kali naviedvaŭ Litvu ź Fiadyničam i Komlik, tyja prasili śviedku pieravieźci ŭ Minsk hrašovyja srodki ŭ kanviertach. Pieravoziŭ hrošy vosiem razoŭ, kolki hrošaj u kanviercie nie viedaŭ. Razam z Hierasimienkam, pavodle źviestak pratakoła jaho dopytu, ź Vilni ŭ Minsk hrošy pieravozili i inšyja supracoŭniki prafsajuza: Jesipovič, Juchnaviec, Pičuškina.

U pratakole dopytu z DFR taksama śviedka pakazaŭ infarmacyju ab adkrytych bankaŭskich rachunkach u Litvie. U druhim pratakole dopytu Hierasimienki havorycca, što jon vyjazdžaŭ u Litvu na sieminary ŭ składzie delehacyi prafsajuza, kudy ŭvachodzili taksama Fiadynič i Komlik.

«Z nahody pieravozki hrošaj u kanviercie skazać što-niebudź ciažka», —adznačana ŭ pratakole dopytu.

— Dadzienyja pratakoły ja padpisvaŭ, tołkam nie čytajučy. Toje, što ja vosiem razoŭ pravoziŭ, byli kanvierty — ja hetaha nie kazaŭ, prasiŭ śledčaha ŭ SK hetyja pytańni ŭdakładnić. Tamu toje, što było zajaŭlena mnoju na dopytach, i toje, što kažu ciapier, i nie supadaje. Taksama nijakich hrošaj, nijakich 600 rubloŭ na niejkija našy ŭlotki ja nie atrymlivaŭ.

Na žal, pratakoł napisany nie z maich słoŭ. Maje pravy i abaviazki na dopycie nie začytvali. Skazali: padpišaš i tady pakinieš heta pamiaškańnie, ja padpisaŭ štości biez akularaŭ, a ja drenna baču. Da taho ž u dakumientach bačyŭ, što ja zapisany jak padazravany, — zajaviŭ u sudzie Hierasimienka.

— Jašče raz, vy paćviardžajecie, što z 20 kastryčnika 2011 hoda, viartajučysia ŭ Biełaruś ź Litoŭskaj Respubliki, pieravozili hrošy ŭ kanviertach, a potym atrymlivali za heta ŭznaharodžańnie 300 jeŭra, vy paćviardžajecie? — udakładniŭ dziaržabvinavaŭca Vadzim Kaziej.

— Nie, admaŭlaju.

— A z nahody adkrytych bankaŭskich rachunkach u Litvie źviestki paćviardžajecie?

— Hetyja źviestki ŭ śledčaha adrazu byli ŭ kamputary, adkul jany ŭzialisia, ja nie viedaju, — zajaviŭ Hierasimienka.

Padčas učorašniaha pasiadžeńnia adna sa śviedak, sakratarka prafsajuza REP Julija Juchnaviec, paćvierdziła punkty abvinavačańnia i pryznałasia, što ad samaha pačatku była ahientam KDB. Druhaja śviedka pa spravie, Śniažana Hryncevič, admoviłasia ad pakazańniaŭ, adznačyŭšy, što śledčyja na dopycie pahražali joj turmoj.

• 0
• 0
• 0
• 0
• 0
• 0
• 0
• 0