Troje słuččakoŭ zrabili pomnik sałdatam i aficeram Ruskaj impieratarskaj armii. Dniami jaho ŭstalujuć

Troje słuččakoŭ zrabili pomnik sałdatam i aficeram Ruskaj impieratarskaj armii, jakija zahinuli ŭ bajach Pieršaj suśvietnaj vajny. Jany ŭstalujuć jaho da 1 vieraśnia na miescy palavoha špitala i mohiłak tych časoŭ, jakija znachodziacca ŭ Lachavickim rajonie Bresckaj vobłaści, paviedamlaje kurjer.info.

Ideja ŭšanavać pamiać zahinułych źjaviłasia ŭ žychara Słucka Jaŭhiena Pičuhina čatyry hady tamu. Realizavać jaje ŭdałosia tolki sioleta dziakujučy siabram Alaksandru Kuršavu i Kiryłu Baranavu. Usie jany «kalehi pa cechu» — zajmajucca prodažam, ustalavańniem pomnikaŭ i dobraŭparadkavańniem pachavańniaŭ. Mužčyny stali rabić pomnik u traŭni, a zaviaršyli tolki ciapier. Ahułam na stvareńnie pamiatnaha znaka (jaho vaha kala 200 kh) syšło 10 dzion.

«U mianie ŭ Lachavickim rajonie znachodzicca dača. Na maim baku stajać niamieckija doty, a praz rečku znachodzilisia ruskija pazicyi. Tut dva z pałovaj hady stajaŭ front. I vialisia bajavyja dziejańni. I na ruskim baku byŭ palavy špital — pobač ź sielskimi mohiłkami, — raspavioŭ Jaŭhien Pičuhin. — Mohiłki ŭžo praktyčna źnikli, zaraśli, zastalisia strašennyja drevy. Padychodziš da kustoŭ i nahami adčuvaješ: na niešta nastupiŭ. Hladziš — a tam pomnik, prachodziš napierad — jašče adzin vyhladaje z-pad ziamli».

Jaŭhien raspytaŭ miascovych žycharoŭ, što jany viedajuć pra padziei taho času, pačytaŭ litaraturu na hetuju temu, pahladzieŭ staryja i sučasnyja karty. Słuččaki patracili svaje hrošy, kab zrabić pomnik sałdatam i aficeram Pieršaj suśvietnaj vajny

Pavialičyć

Jaŭhien Pičuhin zachaplajecca historyjaj. Jon stvaryŭ sajt predki.by, pryśviečany historyi voinskich pachavańniaŭ, u pryvatnaści apracoŭcy kamianioŭ. Achvotnyja padzialicca infarmacyjaj na hetuju temu mohuć źviazacca ź im praz zvarotnuju suviaź na sajcie.

Pavodle jaho słoŭ, na stvareńnie pomnika syšło $250. Mastak Alaksandr Kuršaŭ zajmaŭsia litarami. Spačatku jon hłyboka vybiŭ litary, potym nanios klej, hruntoŭki i minieralnaje zołata. Adna litara, zroblenaja pa takoj technałohii, zvyčajna abychodzicca ŭ $1,5. Košt usiaho nadpisu, kali b jaho rabili dla zakazčyka, — kala $150.

Akramia hetaha, Jaŭhien cikavicca ŭznaharodami taho času. Pavodle jaho słoŭ, dziakujučy im jon adkryŭ dla siabie šmat pachodaŭ ruskaha vojska, pra jakija nie raskazvali ŭ škole. Žychar Słucka ličyć, što Pieršaja suśvietnaja vajna zabytaja, a ŭsia ŭvaha nadajecca Druhoj. Mierkavańnie Jaŭhiena padtrymlivaje i Kirył: «Pieršaja suśvietnaja była jašče strašniejšaj, čym Druhaja. Tady źjavilisia zarodki nacyzmu, upieršyniu pajšli ŭ boj tanki i vykarystoŭvałasia chimičnaja zbroja… Ludzi zmahalisia na rodnaj ziamli hetak ža samaaddana, jak i ŭ časy Druhoj suśvietnaj. Nielha zabyvać podźvih prodkaŭ. Bo ŭ tych, chto nie pamiataje minułaha, niama budučyni», — adznačyŭ Kirył, raspaviadajučy pra matyvy svajho ŭdziełu ŭ prajekcie.

• 0
• 0
• 0
• 0
• 0
• 0
• 0
• 0