Fihuranty «pracesu 14-ci» źviarnulisia z adkrytym listom da Sukały i Vasileviča
Staršyni Viarchoŭnaha Sudu RB sp.Sukału
Hienieralnamu Prakuroru RB sp. Vasileviču
13 listapada 2008 hodu A. Łukašenka na naradzie pa pytańniach efektyŭnaści ŭžyvanych mieraŭ pa baraćbie z karupcyjaj ahučyŭ pierad šyrokaj hramadzkaściu šmat faktaŭ adnosna stanu karupcyi u RB. Tak, adpaviedna źviestkam, raspaŭsiudžanych u ŚMI,A Łukašenka daručyŭ Vam, sp.Vasilevič, vyzvalić ad zajmanych pasadaŭ namieśnika hienprakurora Mikałaja Kupryjanava i prakurora Mienskaj vobłaści Michaiła Śniehira. A taksama zavieści suprać abodvuch kryminalnyja spravy. A taksama Vam, sp.Sukała, było daručana vyzvalić ad pasad sudździaŭ Iljinu, Jeśmana i Paŭlučuk.
Nahadvajem vam, što vyšejpieraličanyja sudździ stali sumna viadomymi demakratyčnaj hramadzkaści zadoŭha da hetaha momantu. Tak, sudździa Iljina, akramia prysudu Andreju Klimavu, vyznačyłasia u krasaviku hetaha hodu taksama vyniasieńniem biesprecedentna žorstkaha prysudu Andreju Kimu (1,5 hady źniavoleńnia), a taksama niespraviadlivymi prysudami astatnim udzielnikam akcyi pratestu pradprymalnikaŭ. Sudździa Jeśman, jakomu daviałosia sudzić jašče troch udzielnikaŭ hetaj ža samaj akcyi, taksama vynies analahičnyja prysudy.
My, nižej padpisanyja, u krasaviku‑traŭni hetaha hodu byli asudžanyja da 2 hadoŭ abmiežavańnia voli biez nakiravańnia u vychavaŭčyja ustanovy. Byli asudžany za udzieł u mirnaj akcyi pratestu pradprymalnikaŭ. Byli asudžany prosta tamu, što patrebna było kahości pakarać za niečakana aktyŭnaje prajaŭleńnie svajoj hramadzianskaj pazycyi. Byŭ asudžany navat niepaŭnaletni Maksim Dašuk. Andrej Kim naohuł trapiŭ za kraty. Pierahlad spravy u Mienskim haradzkim sudzie pakinuŭ prysud bieź źmienaŭ. Za hety karotki čas, adnak, šmat čaho źmianiłasia. Niahledziačy na badzioryja zajavy kiraŭnictva dziaržavy pra adsutnaść u nas u krainie palityčnych źniavolenych, litaralna praź miesiac paśla pierahladu prysudu Andrej Kim byŭ «pamiłavany» kiraŭnikom dziaržavy.
Čym aŭtamatyčna ŭ čarhovy raz paćvierdziŭ palityčnuju matyvavanaść jahonaha prysudu. Heta stałasia mahčymym dziakujučy šmatlikim čyńnikam, i ŭ tym liku cisku mižnarodnaj supolnaści.
Usie ž namahańni pierahledzieć našy vyraki akazalisia biespaśpiachovymi. Tak, my pastajanna čuli, što biełaruskija sudździ nie pamylajucca, my pastajanna čuli, što u krainie niama palitviaźniaŭ, što sudovaja systema pracuje jak hadzińnik.
Ale kaho vy chacieli pierakanać? Nas, asudžanych? Inšych hramadzkich aktyvistaŭ, što ŭ toj ci inšaj stupieni paspytali na sabie usie plusy i minusy dziaržaŭnaj mašyny milicyi i sudoŭ? A moža prostych hramadzian? Dyk jany i tak ličać za lepšaje naohuł nie źviazvacca ź dziaržavaj. A moža zvyčajnaje čynavienstva? Dyk jak tady vy rastłumačycie im imhniennaje vyzvaleńnie Kima, Kazulina, Parsiukieviča? Ci jany nie viedajuć ničoha?
Dyk moža chopić kožny raz zaciahvać sytuacyju da kančatkovaha abvastreńnia?
Navošta psavać adnosiny z Eŭropaj, kab paśla handlavacca našymi dušami? I naohuł, ci majecie prava vy nas sudzić, kali navat vašy namieśniki i lepšyja supracoŭniki pa šyju u karupcyi? Čamu my musim vieryć vam i vašym prysudam?
Siońnia za kratami znachodzicca novy palitviazień—Alaksandar Barazienka. I usio pa toj ža «pradprymalnickaj» spravie. Našto trymać za kratami čałavieka, jaki sam źjaviŭsia da śledčaha?
Sp. Vasilevič, my patrabujem ad vas nieadkładnaha vyzvaleńnia Alaksandra Barazienki.
Patrabujem mienavita ad vas, tamu što, nakolki nam viadoma, sprava znachodzicca niepasredna pad kantrolem Hienprakuratury. Prynamsi, sankcyju na mieru pierasiačeńnia padpisvaŭ namieśnik prakurora h. Miensku. Sam prakuror stalicy — Kulik — uchiliŭsia ad padpisvańnia sankcyi. Takim čynam, kab paźbiehnuć biurakratyčnych niedarečnaściaŭ i zaciahvańniaŭ, my zaklikajem vas pryniać nieadkładnyja miery pa vyzvaleńniu Alaksandra Barazienki i spynić kryminalnuju spravu suprać jaho za adsutnaściu składu złačynstva.
Sp. Sukała, my zaklikajem vas samym bližejšym čynam pierahledzieć prysud pa našaj spravie. I nie treba pisać «adpiski», nie treba praciahvać nazyvać nas zvyčajnymi chulihanami. Bo sapraŭdnyja złačyncy nie my. Sapraŭdnyja złačyncy «akapalisia» u vas pad nosam u sudzie Centralnaha rajonu — Iljina, Jeśman, Paŭličuk. I tolki były staršynia sudu M. Samasiejka niejkim cudoŭnym čynam paśpieŭ schavacca za deputackaj niedatykalnaściu.
My patrabujem nieadkładnaha pierahladu ŭsich palityčnych spravaŭ.
My patrabujem nieadkładnaha vyzvaleńnia Alaksandra Barazienki.
My patrabujem spynić vykarystańnie sudovych i prakurorskich dziela palityčnaha cisku i pieraśledu.
Kamientary